Read Jamaican Patois 2 Korintiyan 4 Bible Online

2 Korintiyan 4 - Jamaican Patois bible

2 Korintiyan 4

¹ Di Uoli Spirit tel wi plien plien se iina dem laas die ya, nof piipl a-go ton dem bak pan di chuut bout Jiizas an go biliiv iina wa di wikid laiyad spirit tel di faalz tiicha dem fi priich.

² Dem tiicha ya a ipokrit, dem no nuo rait fram rang kaaz dem naa no kanchens.

³ Dem tiich se piipl no fi get marid an dem no fi nyam sortn an sortn fuud. Bot di piipl we biliiv iina di chuu Gad nuo se Gad mek aal fuud fi nyam, aal yu afi du a gi tangks fos.

⁴ Evriting we Gad mek gud, so ef yu gi tangks yu no afi fried fi nyam notn.

⁵ Kaaz prieya an Gad wod mek di fuud kliin.

⁶ Timoti, yu wi bi wan gud sorvant fi Jiizas Krais ef yu tiich di piipl di chuut bout dem sitn ya, gwaan kip di chuu mesij bout Krais Jiizas kluos tu yu aat an gwaan fala di chuu sitn dem we mi did tiich yu.

⁷ No av notn fi du wid di tuori dem we no chuu an we a jos fuulinish, bot wok aad fi fala we Gad se an liv ou yu nuo Gad waahn yu fi liv.

⁸ Kaaz jos laik ou wi eksasaiz an chrien wi badi so it wi chrang, wi afi eksasaiz an chrien wi aat fi fala Gad. Kaaz wen wi chrien wi aat fi fala Gad wi no jos get chrang bot Gad kaaz wi fi liv nou an fi eva an eva.

⁹ Dat a di chuut an evribadi fi fala it.

¹⁰ Wi put wi chos iina di Gad we kyaahn ded an we siev evribadi, speshali di wan dem we biliiv iina im. Gad pramis fi mek wi liv fi eva ef wi chos iina im an a so mek wi afi chogl an wok aad.

¹¹ Tiich dem sitn ya an tel evribadi fi mek shuor dem fala dem.

¹² No mek nobadi put yu dong kaaz yu yong. Mek shuor yu liv rait so piipl kyan fala yu: lov piipl, chos iina Gad an liv wan kliin laif an no sin.

¹³ Gwaan tiich an riid Gad wod out loud mek evribadi ier, an gwaan elp di piipl fi andastan dem til mi kom.

¹⁴ No figet bout di gif we di Uoli Spirit gi yu, mek shuor se yu yuuz it. A da gif de yu did get wen di prafit dem did taak uova yu an di elda dem did put dem an pan yu an prie.

¹⁵ Memba dem sitn ya. Tingk bout dem aal di taim an put evriting iina di wok we mi gi yu, so piipl kyan si ou faar yu kom.

¹⁶ Wach ou yu liv an wach wa yu tiich. Gwaan tiich an du aal we mi tel yu fi du, kaaz ef yu du it, yu no onggl a siev yuself bot yu a siev di piipl dem we ier yu tu.