Read Jamaican Patois 2 Korintiyan 5 Bible Online

2 Korintiyan 5 - Jamaican Patois bible

2 Korintiyan 5

¹ No disrispek di uol man dem iina di choch an taak tu dem eni an eni wie. Taak tu dem laik ou yu wuda taak tu yu faada. Taak tu di yong bwai dem laik dem a yu breda.

² Di uol uman dem, yu fi taak tu dem laik ou yu wuda taak tu yu mada an di yongga uman dem taak tu dem laik dem a yu sista. Du dis wid wan kliin aat.

³ Rispek an tek kier a di uman dem we ozban ded an we riili niid elp.

⁴ Bot ef wan uman we ozban ded av pikni ar granpikni, a dem sopuoz fi tek kier a ar. Dem fi tek kier a ar jos laik ou shi di tek kier a dem. Dem fi tek kier a ar kaaz a dat Gad waahn dem fi du.

⁵ A di uman we ozban ded an we no av no fambili, a di wan di choch mos elp. Shi a di wan we chos iina Gad wid aal ar aat, prie nait an die, an aks Gad fi elp ar.

⁶ Bot di uman we ozban ded an onggl kier bout wa shi waahn an no we Gad waahn, fi ar spirit ded iivn duo shi stil a liv.

⁷ Mek shuor di choch andastan dem sitn ya so nobadi kyaahn av notn bad fi se bout dem.

⁸ Bot enibadi we no tek kier a dem uona fambili dem a ton dem bak pan Gad wod an wosa dan sumadi we neva biliiv iina Gad at aal.

⁹ No uman we ozban ded no fi de pan di lis bifuo shi ton siksti. Shi mos onggl did av wan ozban tu.

¹⁰ Ef shi a-go go pan di lis, piipl mos nuo ar fi di gud sitn dem we shi du. Dem mos nuo ar kaaz shi bring op ar pikni dem gud, aalwiez uopm op ar yaad tu piipl an shi wash di fut a di biliiva dem. Dem mos nuo ar kaaz shi elp enibadi we niid elp an kaaz shi du aal kain-a gud sitn.

¹¹ No put no uman we anda siksti pan da lis ya. Kaaz dem niecha wi kaaz dem fi go marid agen an jraa dem fram Gad.

¹² Dat miin se dem wuda brok dem pramis tu Gad. Kaaz di uman dem pan di lis pramis fi no marid agen bot liv di res a dem laif a du Gad wok.

¹³ Plos, ef dem go roun fram yaad tu yaad dem wi get liezi. Dem wi get liezi an staat susu-susu, kaaz chobl, an taak tingz we dem no fi a taak.

¹⁴ So mi waahn di yongga uman dem we ozban ded fi go marid agen. Dem fi get marid, av pikni an tek kier a dem fambili so dat di piipl dem we no laik wi, kyaahn av notn bad fi se bout wi.

¹⁵ Kaaz som a di yongga wan dem don ton we gaan fala Sietan.

¹⁶ Ef wan uman we biliiv iina Gad, av wan sumadi iina ar fambili we ozban ded, shi fi elp da uman de. Shi fi elp ar, so dat di choch kyan go elp di uman dem we riili niid elp.

¹⁷ Unu fi ana an rispek di elda dem we a gud liida, wos ef dem wok aad fi priich an tiich. Unu fi ana dem an pie dem gud tu.

¹⁸ Kaaz Gad wod se, “Yu no fi tap di aks fram nyam wen im a mash out di grien” an “Di piipl dem we wok fi get di moni we dem wok fa.”

¹⁹ No biliiv notn bad we nobadi tel yu bout di elda dem. Yu fi onggl biliiv wa dem se ef a tuu ar chrii piipl we did de de tel yu wa apm.

²⁰ Di elda dem we sin duo, unu fi karek dem infronta evribadi. Unu mos du dis fi waan di res a piipl dem.

²¹ Gad, Jiizas Krais an di uol a di ienjel dem we Gad pik a mi witnis, du wa mi tel yu fi du. Du it an mek shuor se yu chriit evribadi di siem wie. No av no fievrit.

²² No kwik fi put yu an pan nobadi an mek dem liida iina di choch. No shier iina dem sin bot kip yuself kliin.

²³ (Tap jringk waata wan bot yu fi jringk likl wain tu fi elp yu tumok an fi mek yu no so siki-siki).

²⁴ Som piipl sin yu kyan si so plien dat nobadi no iivn afi se notn fi yu nuo se dem gilti. Bot ada piipl sin no so iizi fi si, it no shuo til lieta.

²⁵ A di siem wid di gud sitn dem we piipl du. Som a dem iizi fi si an som no iizi fi si, bot non a dem kyaahn aid.