Read Jamaican Patois 2 Korintiyan 6 Bible Online

2 Korintiyan 6 - Jamaican Patois bible

2 Korintiyan 6

¹ Aal uu a sliev, mos nuo se dem maasta fi get rispek so nobadi kyan taak bad bout Gad ar bout wa wi tiich.

² Ef enibadi av wan maasta we biliiv iina Jiizas tu, dem no fi rispek dem no les jos chuu di tuu a dem a breda. Bot sins dem an dem maasta ya a breda, dem fi rispek dem iivn muor an sorv dem beta. Kaaz it miin se dem a elp fi tek kier a Gad piipl we im lov. A dem sitn ya mi a beg yu fi tiich an fi push di piipl dem fi du.

³ Ef enibadi tiich notn we no ad op wid we wi Laad Jiizas tiich wi an ou Gad se wi fi liv, ar wos, a tiich se Gad wod a no chuu,

⁴ im ful-a imself an no nuo ar andastan notn. Im lov fi kwaril an fait wid ada piipl uova wa som wod miin. Im kaaz piipl fi waar an kos wid dem wan aneda an fi red yai fi dem wan aneda sitn dem.

⁵ Dem sitn ya onggl kaaz bier aagiment mongks piipl we main wikid an no nuo di chuut. Dem piipl de tingk se fi fala Gad, a wan wie fi mek moni.

⁶ Yu laif wi ful op a gud sitn wen yu staat liv ou Gad waahn yu fi liv, bot onggl ef yu api wid wa yu av.

⁷ Kaaz wi no kyari notn kom iina di worl, so wi kyaahn lef wid notn.

⁸ So den, ef wi av fuud fi iit an kluoz fi wier, wi fi api wid dat.

⁹ Bot di piipl dem we waahn fi rich, di devl chrik dem an mek dem du aal kain-a wikid sitn. Im kech dem wid di fuul-fuul sitn dem we dem waahn an we no gud fi dem. Dem kyaahn si se di sitn dem we dem waahn a-go mash dem op an singk dem.

¹⁰ Kaaz di lov fi moni a di ruut fi aal kain-a wikidnis. Som piipl waahn moni so bad dat dem ton dem bak pan Gad an bring dong nof kraasiz pan demself.

¹¹ Bot aal laik yu Timoti we a wan man a Gad, yu fi ron fram dem wikid sitn de. Yu fi chrai yu bes fi liv ou Gad waahn yu fi liv an fi liv di sitn dem we yu tiich. Yu mos gwaan tiich di Wod an chos se Gad wi gi yu chrent. No gi op, shuo lov an tek yu taim wid piipl tu.

¹² Yu chos iina Gad so yu a-go av nof tingz we yu a-go afi chogl chuu. Gwaan tan op chrang an priich Gad wod. Ef yu du dis yu kyan nuo fi shuor se yu a-go liv fi eva. Kaaz dat a di pramis we Gad gi yu wen yu did se dat yu biliiv iina im infronta evribadi.

¹³ Infronta Gad we gi evriting laif an Jiizas Krais we tan op tu Ponchos Pailat an se wa im biliiv, mi a tel yu

¹⁴ fala aal a di sitn dem we mi tiich yu. Du dis so nobadi kyaahn se notn bad bout yu. Fala dem til di die wen wi Laad Jiizas kom bak.

¹⁵ Gad we di piipl priez an uu a di onggl chuu ruula, di Laad an King uova evribadi, wi sen bak Jiizas wen im redi.

¹⁶ A Gad wan kyan liv fi eva an no ded. Im liv iina wan brait brait lait, it so brait no man kyaahn luk pan im ar kom nier im. A dat mek nobadi neva si im ar kyan si im. Ana an powa tu Gad fi eva! Iemen!

¹⁷ Waan di rich piipl dem se dem no fi gwaan laik dem beta dan enibadi els jos chuu dem av moni. Dem no fi put dem chos iina moni niida kaaz moni kom an moni go. Wa dem fi du a put dem chos iina Gad kaaz im wi gi wi aal we wi niid fi liv api.

¹⁸ Tel dem fi du nof gud sitn — a dat dem fi rich wid, an tel dem se dem mos gi tu ada piipl an shier wa dem av.

¹⁹ Ef dem du dis, dem wi bil wan salid fyuucha fi demself an wi get di laif we Gad pramis.

²⁰ So Timoti, gyaad di sitn dem we Gad gi yu fi tek kier a. Mek shuor yu kip dem sief. Stie faar fram taak we no av notn fi du wid Gad. No lisn tu di fuulinish wa som piipl taak chuu dem tingk dem waiz. Dem waahn fi kaal we dem a se nalij bot a no nalij dat.

²¹ A da siem nalij de we kaaz nof a dem fi tap biliiv iina wa Gad tiich. Mi prie se Gad wi shuo unu lov iivn duo wi no dizorv it.