Read Jamaican Patois Gyalieshan 1 Bible Online

Gyalieshan 1 - Jamaican Patois bible

Gyalieshan 1

¹ Timoti, dis a Paal, Jiizas Krais apasl. Gad pik mi fi bi Jiizas apasl an sen mi fi go tel evribadi bout di laif we Gad pramis fi gi wi ef wi biliiv iina Krais Jiizas.

² Timoti, yu komiin laik mi uona pikni we mi lov, mi prie se Faada Gad an wi Laad Jiizas Krais wi shuo yu lov iivn duo wi no dizorv it, mi prie tu se im wi gud an kain tu yu an gi yu piis iina yu aat.

³ Evritaim mi prie tu Gad mi memba yu an gi Gad tangks fi yu. Mi prie tu Gad jos laik ou mi granfaada an fi im faada an fi im faada faada dem yuus tu prie, an mi kanchens no bada mi.

⁴ Mi memba ou yu did baal an it mek mi waahn fi si yu. Kaaz mi nuo se ef mi si yu mi wuda api.

⁵ Mi memba ou yu chos iina Gad nof nof. Jos laik ou yu mada Yuunis an yu granmada Lai did biliiv iina Gad an did chos iina im nof nof tu. Mi shuor se jos laik dem yu biliiv an chos iina Gad nof nof tu.

⁶ Siek-a dat yu mos mek shuor se yu gwaan yuuz di gif we Gad gi yu wen mi did put mi an dem pan yu an prie.

⁷ Kaaz di spirit we Gad gi wi, neva mek wi friedi-friedi. Gad Spirit gi wi powa, lov an mek wi kyan kanchuol wiself.

⁸ So no shiem fi tel di piipl dem bout Gad. No shiem fi se yu nuo mi niida, jos chuu dem fling mi iina jiel kaaz mi sorv Gad. Yuuz di powa we Gad gi yu. Sofa wid mi an gwaan tel di piipl bout Gad.

⁹ Gad siev wi an pik wi fi bi im piipl. A no kaaz a notn we wi du mek im du dat. Gad pik wi kaaz im did plan fi gud an kain tu wi. Wie bifuo taim im di plan fi shuo wi lov iivn duo wi no dizorv it an sen Krais Jiizas fi siev wi.

¹⁰ Nou Jiizas Krais wi sievya shuo wi ou im kain wen im kom an mek it so dat wi kyaahn ded. Im tiich di Gud Nyuuz so dat wi kuda andastan wa it miin fi liv fi eva.

¹¹ A da siem Gud Nyuuz de Gad se mi fi tiich. Im mek mi wan a Jiizas apasl dem so mi kuda tel di piipl dem di Gud Nyuuz.

¹² A kaaz mi tiich di Gud Nyuuz mek mi a sofa nou. Bot iivn duo mi iina prizn mi no shiem, kaaz mi nuo uu mi biliiv iina. An mi nuo se im wi kip sief aal a di sitn dem we im chos mi wid til di die Gad kom fi joj wi.

¹³ Yu si di sitn dem we mi tiich, tek kier an fala dem, no tiich notn difrant. Yu fi du dis wid di sitn dem we wi biliiv an we Jiizas Krais gi wi an wid di lov we im gi wi tu.

¹⁴ Gyaad di sitn dem we Gad gi yu fi tiich. Gyaad dem wid di elp a di Uoli Spirit we liv iina yu.

¹⁵ Yu nuo se evribadi roun a Iezha said ton dem bak pan mi, aal di wan Fijilos an di wan Ormajinis.

¹⁶ Mi prie se Gad wi gud an kain tu Onisiforos an im fambili. Kaaz im neva shiem fi kom luk fi mi iina jiel an fi mek mi aat api.

¹⁷ Wen im riich a Ruom im luk fi mi aad aad an neva tap til im fain mi.

¹⁸ Mi prie se pan di die Gad kom bak fi joj di worl dat im wi gud an kain tu Onisiforos. Yu nuo se im did elp mi nof nof wen mi did iina Efisos.