Read Jamaican Patois Gyalieshan 2 Bible Online

Gyalieshan 2 - Jamaican Patois bible

Gyalieshan 2

¹ So yu, Timoti, we komiin laik mi pikni, mek di lov we Krais Jiizas gi iivn duo wi no dizorv it, kip yu chrang.

² Yu si di sitn dem wa yu ier mi tiich an priich bout Jiizas Krais infronta nof piipl, yu fi tiich it tu piipl we yu kyan chos an we kyan tiich tu. Tiich it tu dem so dat dem kyan go tiich ada piipl.

³ Sins yu a wan a Krais Jiizas gud suoja dem, yu afi go chuu nof sofarieshan laik di res a Jiizas suoja dem. Mek shuo se yu uol aan.

⁴ Riil suoja no bada imself wid evridie laif. Im onggl bizniz wid di aami wok, kaaz im waahn fi mek im komaanda api.

⁵ Jos laik sumadi we du spuots, yu kyaahn win notn ef yu no fala di ruul dem.

⁶ An di faama we wok aad, shuda di fos fi iit we gruo iina di fiil.

⁷ Tingk pan dem sitn ya an Gad wi elp yu andastan di uol a dem.

⁸ Memba uu Krais Jiizas bi. Jiizas a di wan we Gad bring bak fram di ded an we kom fram di siem fambili we Dievid kom fram. Dat a di mesij we mi tiich.

⁹ A chuu mi a tiich da mesij ya mek mi a sofa so. An a kaaz mi tiich da mesij ya mek dem fling mi iina prizn an chriit mi laik se mi a kriminal. Bot dem kyaahn tap Gad mesij ar lak it op laik ou dem lak mi op iina prizn.

¹⁰ An sins di mesij no iina prizn mi wi gwaan sofa fi di piipl dem we Gad pik. So dat Jiizas Krais wi siev dem an so dem kyan liv fi eva wid Gad.

¹¹ Nou lisn mi gud kaaz wa mi bout fi tel yu a no no lai bot a chuu sopm: Ef wi did ded wid im, Wi a-go liv wid im tu.

¹² Ef wi no gi op, Wi a-go ruul wid im tu. Ef wi gwaan laik wi no nuo im, im wi gwaan laik im no nuo wi.

¹³ Ef wi ton wi bak pan im, im stil naa ton im bak pan wi. Kaaz Jiizas Krais kyaahn gwaan laik im no nuo uu im bi.

¹⁴ No mek nobadi figet dem sitn ya. Waan dem iina Gad niem fi tap fait uova wa som wod miin. Dem sitn de no elp nobadi. It onggl mash op di piipl dem we ier it.

¹⁵ Chrai aad an du yu wok di wie Gad waahn yu fi du it. Mek shuor yu du yu wok gud an onggl tiich di chuut. Ef yu du dis, yu naa go av notn fi shiem bout an Gad wi api wid yu.

¹⁶ Stie faar fram aagiment we no rispek Gad. Kaaz di piipl dem we get iina dem kain-a aagiment de wi staat jraa we fram im.

¹⁷ Fi dem mesij a-go pred laik gyanggriin. Aimeniyos an Filiitos a tuu a dem kain-a piipl de.

¹⁸ Dem a tiich sopm we faar fram di chuut. Dem a se ou Gad piipl ded an kom bak aredi, an a kaaz som piipl fi tap biliiv iina Jiizas Krais.

¹⁹ Bot Gad foundieshan salid an chrang, it a tan op siem wie. An it av dis rait pan it: “Di Laad nuo di piipl dem we a fi im uon,” an “Enibadi we se Jiizas a ‘Laad’ mos tap du wikid sitn.”

²⁰ Iina wan griet ous yu av nof difrant kain-a boul. Yu av guol boul an silva boul, boul we mek outa wud, boul we mek outa klie, boul we yu yuuz fi speshal taim an boul we yu yuuz evridie.

²¹ A siem wie it go wid piipl. Ef enibadi wi kliin op demself an ton fram aal we wikid, im wi komiin laik wan a di speshal boul dem. An Gad wi kyan yuuz im fi du speshal tingz. Im wi redi fi du aal kain-a gud sopm.

²² So ron we fram di wikid sitn dem we di yong piipl dem waahn fi du an chrai aad aad fi du we rait. Yu mos liv ou Gad waahn yu fi liv an yu fi shuo lov an tek taim wid ada piipl. Chos iina Jiizas an no gi op. Timoti dis a wa yu fi du. An aal a di piipl dem we worship Gad wid wan kliin aat fi du it tu.

²³ No av notn fi du wid no fuul-fuul ar chupid aagiment an no bada kos-kos wid nobadi uova Gad wod, kaaz yu nuo se dem sitn de onggl kaaz piipl fi fait.

²⁴ An Jiizas Krais sorvant dem no fi fait; dem fi kain tu evribadi. Dem fi kyan tiich gud an wen dem a diil wid piipl dem fi tek dem taim wid dem.

²⁵ Gad sorvant, wen im a karek di wan dem we go gens di chuut, fi tek im taim wid dem. Kaaz Gad mait-a mek dem chienj dem wiez an lorn di chuut.

²⁶ An dem mait-a get sens an si se di devl chrap dem an kyan get outa it. Di devl did chrap dem so im kuda yuuz dem fi du im wok.