Read Jamaican Patois Gyalieshan 4 Bible Online

Gyalieshan 4 - Jamaican Patois bible

Gyalieshan 4

¹ Wen Jiizas di King kom bak fi ruul, im a-go joj di piipl dem we a liv an di piipl dem we ded. So infronta Gad an Jiizas Krais, mi a beg yu

² priich Gad wod an mek shuor se yu aalwiez redi fi priich. Ef di taim rait ar it no rait, priich it siem wie. Yu afi shuo di piipl dem di rang we dem a du an put dem iina dem plies kaaz dem a sin. Yu mos tek taim wid dem wen yu a tiich dem an push dem fi du wa rait.

³ Kaaz wan taim a-go kom wen piipl naa go put op wid ar lisn tu wa Gad piipl a tiich. Insted-a dat, fi mek demself api, dem a-go luk fi di tiicha dem we wi tel dem wa dem waahn fi ier, kaaz dem lov ier nyuu sitn.

⁴ An dem a-go ton dem bak pan di chuut an staat lisn tu di tuori dem we a no chuu.

⁵ Bot yu si yu Timoti, yu afi kanchuol yuself iina evriting. Yu a-go fies nof chobl bot yu mos push chuu it an gwaan priich Gad wod. An kaaz yu a Gad sorvant yu mos du aal di wok we im gi yu fi du.

⁶ Kaaz jos laik wen dem puor out wain wen dem don bon sakrifais, a siem so mi laif an di wok we mi a du fi Gad suun don.

⁷ Mi wok aad fi Gad; mi fait fi wa mi biliiv iina. Mi priich Gad wod an du aal a wa Gad tel mi fi du; mi ron da ries ya til it don an no gi op. Mi a-go sorv im til mi ded.

⁸ Di Laad we aalwiez fier tu evribadi wen im a joj dem, a-go gi mi wan kroun fi aal a di wok we mi du. Im a-go gi mi it wen im kom bak fi joj di worl. An a no mi wan a-go get kroun, im a-go gi evribadi we did a lang fi im kom bak.

⁹ Du yu bes an mikies kom si mi.

¹⁰ Kaaz Diimas gaan lef mi an gaan dong a Tesalonaika, kaaz im lov da worl ya. Kresens gaan a Gyaliesha an Taitos gaan a Dalmatiya.

¹¹ A onggl Luuk de ya wid mi. Wen yu a kom, go get Maak an bring im wid yu. Kaaz im kyan elp mi nof nof wen mi a priich an tiich Gad wod.

¹² Nou mi sen Taikikos gaan a Efisos.

¹³ Wen yu a kom, kyari di kuot we mi did lef wid Kyaapos iina Chuowas. An bring mi ruol op buk dem, speshali di wan dem we mek outa animal skin.

¹⁴ Aligzanda, di wan we wok wid metal, du nof wikid sitn tu mi. Gad a-go pie im bak fi aal we im du.

¹⁵ Yu mos wach out fi im, kaaz im a go gens wa wi tiich aad aad.

¹⁶ Wen mi did go a kuot fi di fos taim fi chrai difen miself nobadi neva kom sopuot mi, di uol a dem lef mi fi fen fi miself. Mi uop Gad no uol it gens dem.

¹⁷ Bot di Laad did tan op saida mi an gi mi chrent. Im gi mi chrent so dat mi kuda priich di uol a im mesij tu di piipl dem we a no Juu. An im siev mi fram di piipl dem we did waahn fi fling mi gi di laiyan dem.

¹⁸ Di Laad naa go mek no wikid sitn ort mi. Im a-go kip mi sief an kyari mi go a im uom iina evn. Priez im fi eva an eva! Iemen!

¹⁹ Tel Prisila an Akwila an evribadi we liv iina Onisiforos yaad oudi fi mi.

²⁰ Irastos did stie iina Korint an mi lef Chrofimos iina Miletos chuu im did sik.

²¹ Timoti, du yu bes fi kom ya bifuo winta. Yuubolos, Pyuudens, Lainos, Klaadiya an di uol a di breda dem sen oudi fi yu.

²² Mi prie se Gad wi tan wid yu an dat im wi shuo yu lov iivn duo wi no dizorv it.