Read Jamaican Patois Ifiijan 3 Bible Online

Ifiijan 3 - Jamaican Patois bible

Ifiijan 3

¹ Mek shuor di piipl dem memba se dem fi rispek an fala di ruula dem fi di konchri an di piipl dem we iina powa; dem fi lisn, fala an eva redi fi du aal kain-a gud sitn.

² Dem no fi taak bad bout nobadi an dem no fi kwaril-kwaril. Insted-a dat, dem fi tek taim wid piipl an shuo rispek tu evribadi.

³ Kaaz wan taim wi yuus tu fuul-fuul tu, wi neva waahn fala notn we nobadi se an wi a did sliev tu aal a di wikid sitn dem we wi waahn. Evridie wi beks wid wi wan aneda an wi eva waahn wa sumadi els av. Aal wi du a iet: wi iet evribadi an evribadi iet wi.

⁴ Bot wen Gad wi sievya shuo wi ou im lov wi an ou im gud tu wi,

⁵ im siev wi. A no kaaz a notn gud we wi du bot kaaz im lov wi an im andastan wa wi go chuu. Gad siev wi wid di powa a im Uoli Spirit we wash wi an gi wi nyuu laif.

⁶ Gad sen Jiizas Krais wi sievya, an mek im gi wi di Uoli Spirit.

⁷ Gad gi wi im Spirit, so nou dat tingz aarait wid wi an im, siek-a ou im lov wi iivn duo wi no dizorv it, wi kyan get wa wi Faada Gad pramis wi; kaaz wi nuo fi shuor se im a-go mek wi liv fi eva.

⁸ Aal a wa mi jos tel yu, a chuu sopm. An a dat mi waahn yu fi tiich aad aad. Tiich it so dat aal a di piipl we biliiv iina Gad wi mek shuor se dem onggl du gud sitn; dem sitn ya gud an wi elp evribadi.

⁹ No fait wid nobadi uova no fuul-fuul taak ar mek op tuori. An no bada kos-kos wid nobadi uova uu a uufa jinarieshan ar bout di laa. Stie faar fram dem sitn de kaaz dem no wot notn an dem kyaahn elp nobadi.

¹⁰ Ef sumadi iina di choch a kos-kos, gi chobl an a mek ada piipl kwaril an ton gens dem wan aneda, waan im fi tap. Ef im no lisn, waan im agen. Bot ef im no lisn da taim de, no av notn fi du wid im.

¹¹ Kaaz yu nuo se da man de ed mes op an im ful-a sin; a im bring dong jojment pan imself.

¹² Wen mi sen Aatimas ar Taikikos tu yu, chrai yu bes fi kom miit mi a Nikapolis, kaaz mi a-go tan de til winta don.

¹³ Du aal we yu kyan du fi elp Ziinas di laaya an Apalos. Mek shuor se wen dem redi fi lef de, dem av aal we dem niid.

¹⁴ Di piipl we biliiv iina Jiizas an we iina Kriit mos lorn fi wok aad an du gud sitn, so dat dem wi aalwiez av inof, so dem kyan gi piipl we niid it.

¹⁵ Evribadi we de ya wid mi sen dem lov. Tel aal a Gad piipl we de dong de wid yu, oudi! Mi prie se Gad wi shuo unu lov iivn duo wi no dizorv it.