Read Jamaican Patois Filipiyan 1 Bible Online

Filipiyan 1 - Jamaican Patois bible

Filipiyan 1

¹ Mi gud gud fren Failiiman we wok wid mi, dis a Paal we de iina prizn kaaz mi tiich bout Jiizas. Mi an wi breda Timoti a rait da leta ya tu: yu,

² wi sista Afiya, Aakipos we a suoja laik wi an tu aal a di piipl dem we gyada iina yu yaad fi av choch.

³ Mi prie se wi faada Gad an wi Laad Jiizas Krais wi shuo unu lov iivn duo wi no dizorv it an gi unu piis iina unu aat.

⁴ Evritaim mi prie tu Gad mi memba yu Failiiman. An mi gi Gad tangks fi yu,

⁵ kaaz mi ier bout ou yu chos iina di Laad Jiizas an ou yu lov aal a Gad piipl.

⁶ Az yu andastan aal a di gud sitn dem we Gad gi wi kaaz wi an Krais Jiizas a wan, mi prie se di fiet we yu shier wid wi an aal a Gad piipl wi gruo.

⁷ Failiiman, mi breda, yu lov fi Gad piipl, du mi aat gud an gi mi chrent. Yu lov kaaz aal a Gad piipl fi api.

⁸ Nou, chuu mi a wan a Gad apasl, mi kuda aada yu fi du wa yu sopuoz fi du.

⁹ Bot siek-a ou yu lov Gad piipl mi a beg yu insted. Mi, Paal, wan oul man an we nou iina prizn kaaz mi tiich bout Jiizas.

¹⁰ Mi a beg fi mi pikni Oniisimos. Wen mi iina prizn, mi tek im fi mi pikni kaaz a mi elp im fi biliiv iina Jiizas.

¹¹ Wan taim im neehn av no yuus tu yu, bot nou im av nof yuus fi yu an fi mi.

¹² Oniisimos a mi aat, an mi a sen im bak tu yu.

¹³ Mi iina prizn kaaz mi tiich bout Jiizas an wail mi de ya mi wuda lov fi kip im ya wid mi, so im kuda elp mi laik ou yu wuda elp mi ef yu did de ya.

¹⁴ Bot mi no waahn du notn widout aks yu fos an mi no waahn fi fuos yu an. Mi waahn wen yu fi elp mi yu du it kaaz yu waahn fi elp mi.

¹⁵ Miebi im did gaan we fram yu likl, so dat wen im kom yu wuda tek im bak fi gud.

¹⁶ Nou im a no jos wan sliev, im a muor dan dat. Oniisimos a yu sliev bot nou im a yu breda tu. Im a yu gud gud breda chuu im biliiv iina Jiizas jos laik wi. Im miin uol iip tu mi an im a-go miin nof muor tu yu.

¹⁷ So ef yu tingk se mi an yu a fren sins mi an yu wok tugeda fi di Laad, yu wi tek im bak iina yu ous an welkom im laik ou yu wuda welkom mi.

¹⁸ Ef im did du notn rang tu yu ar im uo yu, mi wi tek kier a it.

¹⁹ Mi, Paal we a rait da leta ya miself, wi pie yu bak. An mi nuo se mi no afi memba yu se yu uo mi, kaaz a mi elp yu fi biliiv iina Krais.

²⁰ Mi breda mi wish se yu wuda du mi da fieva ya an mek mi api, sins mi an yu biliiv iina di siem Gad.

²¹ Yu si chuu mi nuo se yu wuda fala aal we mi se, mi rait yu. Mi rait yu kaaz mi nuo se yu wuda aal du muor dan wa mi aks yu fi du.

²² Wan neda ting, get wan ruum redi fi mi, kaaz mi a uop se Gad wi ansa unu prieya an sen mi bak tu unu.

²³ Epafras we iina prizn jos laka mi kaaz im tiich bout Jiizas, sen oudi fi yu.

²⁴ Maak, Ieristaakos, Diimas an Luuk, we wok wid mi, sen oudi fi yu tu.

²⁵ Mi prie se Jiizas Krais wi Laad wi shuo di uol a unu lov iivn duo wi no dizorv it.