Read Jamaican Patois Koloshan 1 Bible Online

Koloshan 1 - Jamaican Patois bible

Koloshan 1

¹ Iina di uol taim die dem Gad yuus tu yuuz im prafit dem uol iip a taim, an iina aal kain-a wie fi taak tu wi faada faada dem.

² Bot iina dem laas die ya, im yuuz im Bwai Pikni fi taak tu wi. Im pik im, an kom gi im evriting. Gad pik im tu, so Gad kuda mek di worl.

³ Wen yu luk pan Gad Bwai Pikni, yu kyan si Gad brait brait lait. An im shuo ou Gad tan, kaaz im komiin jos laik Gad. An im powaful wod mek evriting tan jos laik ou dem fi tan. So wen im don mek di wie so piipl kyan get paadn fram sin im go sidong op a evn, rait saida di wan we muo powaful dan evribadi els. An wich paat im sidong iina evn, a di tap-a-tap pozishan dat, an im get fi ruul uova evriting.

⁴ A so kom im get fi ton aiya dan di ienjel dem, kaaz di niem we im get aiya dan fi dem uon.

⁵ Kaaz wich wan a di ienjel dem Gad eva se dis tu, iihn, “Yu a fi mi Bwai Pikni; tide mi ton fi yu faada”? Ar wich wan a dem im eva se dis bout, “Mi a-go ton fi’im faada, an im a-go ton fi mi Bwai Pikni”?

⁶ Bot wen Gad bring im fos bwai kom iina di worl, im se, “Aal a Gad ienjel dem — worship im!”

⁷ An wen im a taak bout di ienjel dem, a dis im se, “Gad mek im ienjel dem fi komiin laka briiz, an im mek dem fi komiin laka faiya we de bliez op.”

⁸ Bot dis a wa im se bout di Bwai Pikni, “Uo Gad! Yu a-go ruul fi eva an eva! An yu a-go ruul di rait wie fi chuu.

⁹ Yu lov wa rait, an yu iet wa no rait. A so kom mi, fi yu Gad, pik yu uova yu fren dem an mek yu wel api.

¹⁰ Im se dis tu, “Laad, wen notn neva de bout yet, a yu mek di ort. An yu tek fi yu uona an dem an mek di skai an evriting els.

¹¹ Aal a dem sitn de duo, a-go mash op an don fa, bot yu — yu a-go de bout fi eva, bot di uol a dem a-go wier out laka uol kluoz.

¹² Yu a-go fuol dem op laik jakit we no gud agen. So dem a-go chienj laik uol kluoz, bot yu naa chienj, yu a tan siem wie an yu naa ded niida.”

¹³ Wich wan a di ienjel dem Gad eva se dis tu: “Sidong rait saida mi, a mi rait an, an kom ruul uova evriting. Sidong de til mi mek yu enimi dem kom ben dong infronta yu, mek yu kak op yu fut pan dem”?

¹⁴ Aal a di ienjel dem, no spirit dem — spirit we Gad sen fi go sorv di piipl dem we a-go get siev? No so?