Read Jamaican Patois Koloshan 10 Bible Online

Koloshan 10 - Jamaican Patois bible

Koloshan 10

¹ Di laa we di Juu piipl dem get a no di riil ting, it a no notn laik di gud gud sitn we a kom. Da laa de a jos laik di sheda fi di riil sitn dem. Kaaz ier afta ier, uova an uova di priis tek di siem sakrifais gi Gad fi mek di piipl dem we kom kom worship get kliin, an stil di sakrifais kyaahn mek di piipl dem kliin iina evri wie.

² Ef dat kuda apm, dem no wuda tap gi dem sakrifais de, no so? Kaaz di piipl dem we kom fi worship, dem no wuda kliin wans an faraal? An ef a so, dem wudn fiil gilti bout no sin, no chuu?

³ Bot dem sakrifais de we dem tek gi Gad, dem dis a memba piipl bout dem sin ier afta ier.

⁴ Kaaz bulkou blod an guot blod kyaahn tek we nobadi sin.

⁵ So wen Krais Jiizas kom iina di worl im se, “A neehn sakrifais an aafrin yu did waahn, a dat mek yu get wan badi redi fi mi;

⁶ wen dem bon uol-a animal fi sakrifais, an gi yu aafrin fi tek we sin, dem sitn de no mek yu api.

⁷ Den mi se, ‘Gad si mi ya, mi kom fi du wa yu waahn mi fi du, jos laik ou it rait dong bout mi iina di ruol op buk.’ ”

⁸ Fos Jiizas se, “A neehn sakrifais an aafrin yu did waahn, yu neehn waahn dem fi tek no uol-a animal an bon mek sakrifais gi yu an yu neehn waahn no sin aafrin niida. Dem sitn de neehn mek yu api” — duo bies pan di laa a dem sitn de piipl did fi gi.

⁹ Den im se, “Si mi ya. Mi kom fi du wa yu waahn mi fi du.” So di fos plan we se piipl did afi gi op sakrifais fi tek we dem sin, Gad mek it naa no muo powa so di sekan plan kuda set op; da plan de gi di sakrifais we Krais Jiizas mek aal a di powa.

¹⁰ An siek-a dat, di uol a wi ton kliin iina Gad yai. Im sakrifais im uona badi jos wan dege-dege taim an dat kova evriting.

¹¹ An aal a di priis dem tan de die afta die, a sorv an a gi op di siem sakrifais uova an uova — an dem de sakrifais kyaahn tek we sin.

¹² Bot wen da priis ya gi onggl wan sakrifais, an da sakrifais ya kova evriting, im go sidong saida Gad, pan im rait-an-said.

¹³ An fram da taim de, im de de a wiet til di piipl dem we iet im ton wan stuul fi im put im fut pan,

¹⁴ kaaz im tek jos wan aafrin an mek di uol a wi we a ton kliin iina Gad yai ton jos laik ou wi fi ton fi eva an eva.

¹⁵ An di Uoli Spirit shuo wi se dem sitn ya chuu fi riil, kaaz fos im se,

¹⁶ “Di Laad se, ‘Likl muo fram nou, dis a di diil we mi a-go mek wid dem: Mi a-go put mi laa iina dem ed an rait it dong pan dem aat, so dem wi andastan it an lisn we mi se.’”

¹⁷ Den im se, “Mi naa go memba non at aal di piipl dem sin an ou dem did brok mi laa.”

¹⁸ So nou, wen Gad paadn sin, no muo sin aafrin no afi gi op.

¹⁹ So mi breda an sista, laik ou wi frii fi go iina di Uoliyis Plies siek-a Jiizas blod,

²⁰ kaaz im go sakrifais im badi we komiin laka di kortn we put op iina Gad ous fi kova di plies we Gad de; an di sakrifais im go sakrifais im badi, dat uopm op wan nyuu wie fi wi, wan wie we gi laif — wan wie we liid tu Gad.

²¹ Plos wi av wan priis we a wan a di bigis wan eva, an a im ruul uova Gad ous.

²² So siek-a aal a dem sitn de, kom mek wi jraa kluos tu Gad an no fried. Bot mek wi go tu im an riili chos im wid aal a wi aat. Kaaz Jiizas blod don kliin wi aat so wi kanchens frii, an wi badi don wash iina kliin waata tu.

²³ Mek wi uol aan chrang an gwaan biliiv se wi a-go get di sitn dem we Gad se im a-go gi wi — a dat wi tel di worl se wi biliiv. So mek wi uol aan pan dat an no staat tingk sitn els. A Gad pramis wi, an wat-eva im pramis fi du, im a-go du fi chuu.

²⁴ An mek wi tingk bout ou wi kyan gwaan push wi wan aneda fi shuo lov an fi du di gud sitn dem.

²⁵ Mek wi gwaan miit tugeda an kip choch — no tap, laik we som piipl a du. Insted-a dat mek wi kom tugeda an taak so wi wan aneda aat kyan get chrangga; wos laka ou di Laad suun kom bak, mek wi du dem sitn de muo an muo nou.

²⁶ Kaaz ef wi mek op wi main se wi a-go gwaan sin galang afta wi don nuo wa chuu, no muo sakrifais no de fi tek we wi sin yu nuo.

²⁷ Bot notn no lef fi wi du dan fi wiet an fried a Gad jojment we a kom, plos di wikid wikid faiya we im a-go tek bon op di piipl dem we fait gens im.

²⁸ Ef sumadi did brok di Laa we Gad did gi Muoziz, an tuu ar chrii sumadi se dem si im ar shi a brok di Laa, dem wuda kil da sumadi de an dem naa sari fi dem niida.

²⁹ So a umoch wos Gad fi ponish sumadi we chrampl op pan im Bwai Pikni, an we chriit Jiizas blod laik se it chiip, wen a it yuuz fi set op di nyuu plan we Gad mek? An a it yuuz fi tek we da siem sumadi de sin. Umoch wos im ar shi fi get ponish wen dem taak gens di Uoli Spirit we shuo wi wan kain-a lov we wi no iivn dizorv — iihn, umoch wos?

³⁰ Kaaz wi nuo a uu se, “A mi a di wan we a-go ponish piipl fi di wikidnis we dem du, an mi a-go pie dem bak fi aal a di bad sitn dem we dem du.” An wan neks taim im se, “Di Laad wi joj im piipl dem.”

³¹ A no wan nais sitn fi jrap iina di an fi di Gad we a liv, an im ponish yu yu nuo — enibadi we dat apm tu fi kech dem fried!

³² Bot unu fi memba iina di paas wen unu did jos andastan Gad wie, di sofarieshan we unu did afi go chuu, bot unu uol aan an kot chuu siem wie.

³³ Som a di taim dem, dem did biit unu op an chriit unu bad infronta evribadi; wen a no dat gwaan, a jain unu jain op wid di piipl dem we dem chriit so, an tan saida dem iina fi dem chraiyal an chibilieshan.

³⁴ Kaaz fi riil, unu aal sari fi di piipl dem we dem chuo iina prizn. An wen dem kom tek we unu sitn dem, unu mek dem galang wid dem, an aal a sumail sed wie, kaaz unu nuo se unu uon tingz we moch moch beta dan dem sitn de, an wa unu uon a-go laas fi eva.

³⁵ So no bada gi op. Gwaan uol tait, kaaz siek-a dat unu a-go get som blesn de!

³⁶ Unu afi uol aan an pres chuu fi du wa Gad waahn unu fi du, an so get di sitn dem we im pramis fi gi unu.

³⁷ Kaaz tuu tuuz, “Di wan we a kom a-go riich — im naa go lie-lie.

³⁸ An mi piipl dem we du di rait sitn dem a-go liv kaaz dem biliiv iina mi. An ef dem go ton bak mi naa go api wid dem at aal at aal.”

³⁹ Bot wi a no non a dem piipl de we ton bak an en op get laas, mash op an dem sitn de. Nuo sa! Wi a wan a dem piipl de we chos iina Gad an so im a siev wi suol.