Read Jamaican Patois Koloshan 11 Bible Online

Koloshan 11 - Jamaican Patois bible

Koloshan 11

¹ Wen wi chos iina Gad it mek wi shuor bout di sitn dem we wi onggl uop se wi a-go get, an wi nuo se di sitn dem we wi kyaahn si, dem de de fi chuu.

² A dis mek Gad did api wid wi faada faada dem.

³ Kaaz wi chos iina Gad, wi andastan se im jos se di wod an di worl mek, so di sitn dem we wi kyan si, dem kom fram di sitn dem we wi kyaahn si.

⁴ A kaaz Iebl chos iina Gad mek im bon wan beta sakrifais gi Gad dan Kien. A kaaz im chos iina Gad mek Gad se im api wid im, an se im a sumadi we du di rait sitn dem. An siek-a di chos we im chos iina Gad, im stil a chat iivn duo im ded, kaaz wa Iebl did du stil a sen wan mesij tu wi.

⁵ Kaaz Iinok did chos iina Gad, Gad did tek im op wich paat im de wen im did stil alaiv, so im neehn ded at aal, an nobadi kudn fain im kaa Gad did tek im op. An Gad du dat kaa im did mek Gad api siek-a wa im du.

⁶ Nou ef sumadi no chos iina Gad, dem kyaahn mek im api non at aal. Kaaz enibadi we kom kom worship Gad afi biliiv fos se Gad de fi chuu, an dat im a-go du som uol iip a gud sitn fi di wan dem we luk fi im aad aad.

⁷ Afta Gad waan Nowa bout di sitn dem we Nowa kudn si yet, a kaaz Nowa chos iina Gad an av nof nof rispek fi im mek im lisn we Gad se an go bil wan big buot fi siev im fambili. Kaaz Nowa did chos iina Gad so, im kot aaf imself fram di piipl dem iina di worl an shuo se dem rang kaa dem no chos iina Gad. Gad se, “Nowa a sumadi we du wa rait” kaaz Nowa chos iina im.

⁸ Kaaz Iebriyam chos iina Gad, wen Gad kaal im, im lisn. An so im go a wan plies we im did bout fi get fram Gad, im go de iivn duo im neehn nuo a wich paat im did a go.

⁹ An kaa im chos iina Gad im muuv go a di lan we Gad pramis im an liv de laik farina. Im liv iina tent wid Aizak an Jiekob. Gad did mek di siem pramis tu dem tu.

¹⁰ Iebriyam tan de kaaz im did a luk faawod fi wan siti we Gad did jraa op an bil. Da siti de tan op pan som chrang foundieshan.

¹¹ Aal wen Siera neehn av no pikni, an did paas di taim fi av biebi, an Iebriyam did tuu oul fi gi ar non, im chos se Gad wuda kip im pramis an so Gad mek Iebriyam kuda gi ar biebi.

¹² Az a matarafak, fram da wan man ya, wan bag a pikni kom; pikni we nof laik di staar dem we de op iina di skai, an we plenti plenti laik san a sii, iivn duo im did so oul dat im de a griev mout.

¹³ Aal a dem piipl ya we ded did a chos iina Gad siem wie, aal wen dem neehn get iina dem an, di sitn we Gad did pramis. (Dem did si dem fram faar faar — lang bifuo dem apm an dem did wel api). An dem neehn fried fi se dem no kom fram ya-so — dat dem a farina pan ort.

¹⁴ Piipl we se dem sitn ya, shuo se dem a luk fi wan konchri we a riili fi dem uon.

¹⁵ Az a matarafak ef dem did a tingk bout di plies we dem did lef dem wuda get di chaans fi go bak de.

¹⁶ Insted-a dat dem did a luk fi wan beta plies — wan we de a evn. So Gad no shiem fi se im a fi dem Gad, kaaz im get wan siti redi fi dem.

¹⁷ Kaaz Iebriyam did chos iina Gad wen Gad did tes im, im did redi fi sakrifais Aizak gi im. Im did get di pramis we Gad did mek wid im, an im did stil redi fi gi op im wan dege-dege bwai.

¹⁸ Gad did se tu im se, “A Aizak a-go mek yu av pikni pikni gu dong.”

¹⁹ Iebriyam did don riizn out se, Gad kuda mek ded piipl kom bak alaiv, an iina wan wie a ded Aizak did ded an im get im bak.

²⁰ Aizak chos iina Gad an so im bles Jiekob an Iisaa, an biliiv se fi dem blesn a-go kom iina di fyuucha.

²¹ Kaaz Jiekob chos iina Gad, wen im did a ded, im bles evri wan a Juozif pikni dem an im liin op pan im waakn tik a worship Gad.

²² Kaaz Juozif did chos iina Gad, wen im did bout fi ded im did taak bout di taim wen di Izrel piipl dem did a go kom outa Iijip, an im did tel dem bout wa dem fi du wid im badi wen im ded.

²³ Wen Muoziz did baan, kaaz im mada an faada chos iina Gad, dem aid im fi chrii mont kaaz dem si se di pikni did priti, an dem neehn fried a di laa we di king did mek.

²⁴ Siek-a ou Muoziz chos iina Gad wen im did get big, im neehn waahn nobadi kaal im Fiero daata pikni.

²⁵ Im did prefa fi sofa wid Gad piipl dem, dan fi go av fon fi wan likl wail an miks op iina sin.

²⁶ Im did fiil se di sofarieshan we di wan we Gad sen fi siev piipl go chuu, wot muo dan aal a di rich sitn dem we de a Iijip. Im did fiil so, kaaz im yai did de pan di blesn dem we im did a-go get.

²⁷ Siek-a ou im chos iina Gad, im lef Iijip an neehn fried se di king mait-a beks. An im neehn ton bak. Im uol aan pan di Gad we nobadi kyaahn si, laik se im kuda si im.

²⁸ Kaaz im chos iina Gad im did kom bring iin di Paasuova alidie an did mek di blod springkl pan di duor dem, so di Ienjel we kom fi kil wudn kil di fos bwai pikni dem fi di izrel piipl dem.

²⁹ Kaaz di piipl dem did chos iina Gad, dem did paas chuu di Red Sii laik se a jrai lan dem a waak pan, bot wen di Iijip piipl dem did chrai fi du dat tu, di uol a dem joun aaf.

³⁰ Kaaz di piipl dem did chos iina Gad, Jeriko waal did jrap dong afta di piipl dem did maach roun it fi sevn die.

³¹ Rieyab we did sliip wid man fi moni, shi neehn ded wen di piipl dem we neva lisn Gad did a ded aaf. Shi neehn ded kaaz shi did chos iina Gad, an wen di chrienja dem kom fi spai out di siti, shi did tek dem iina ar ous an aid dem.

³² An wa els mi fi se? Kaaz mi naa no taim fi tel unu bout Gidiyan, Barak, Samsn, Jefta, Dievid, Samwel an di prafit dem.

³³ Siek-a ou dem chos iina Gad, dem fait waar gens konchri an win; som did inchaaj a piipl an dem ruul iina wan wie we rait iina Gad yai; an Gad gi dem wa im pramis fi gi dem tu. An kaaz dem chos iina Gad, dem shot laiyan mout so di laiyan dem no nyam dem.

³⁴ Kaaz dem chos iina Gad, dem put out faiya we a bon red; an dem get we fram dem enimi we out fi tek suod kil dem aaf. Iivn duo dem wiik, dem get chrang. An dem get big an bad iina waar an mek aami we no kom fram bout de afi ron we.

³⁵ Uman get bak dem ded fambili, kaaz dem kom bak alaiv. Bot som ada wan, dem enimi did mek dem sofa bad bad, bot dem mek op dem main se dem naa go go frii. Da wie de, dem kyan kom bak alaiv an liv wan beta laif.

³⁶ So a dat apm tu som a dem kaaz dem chos iina Gad, bot yu av som ada wan — dem laaf aafa dem an tek wip biit dem. Som aal get tai op wid chien an lak op iina prizn tu.

³⁷ Dem stuon som a dem, an tek saa kot dem iina tuu an yuuz suod kil dem aaf tu. Dem piipl de we sofa so, dem waak bout iina shiip skin an guot skin, dem neehn av no moni — dem did wel puor. Piipl mek dem sofa an did taament dem.

³⁸ Dem did tuu gud fi da worl ya! Dem go bout an liv iina dezot an op iina mountn, iina kiev an uol we de iina grong.

³⁹ Di uol a dem chos iina Gad an so im did api wid dem. Bot non a dem stil neehn get di sitn dem yet we im did pramis.

⁴⁰ Kaaz Gad did plan fi du sitn we wie wie beta fi wi, so wi an dem kyan bi aal a wa Gad waahn wi fi bi di siem taim.