Read Jamaican Patois Koloshan 12 Bible Online

Koloshan 12 - Jamaican Patois bible

Koloshan 12

¹ So laik ou wan kroud a piipl de aal bout roun wi, an dem shuo wi aredi ou fi chos iina Gad, wi afi dash aaf evriting we a sluo wi dong iina da ries ya. Di sin we tai op wi fut iizi iizi, wi afi dash dem aaf man, an ron di ries we de infronta wi an no wier out pan di wie.

² Wi fi kip wi yai lak pan Jiizas. A im fos shuo wi wa it miin fi chos iina Gad, an mek wi kyan chos im iina evri wie. Im nuo se im did a-go en op wel api, so im go chuu di sofarieshan an go ded pan di kraas, an im neehn bizniz se im did a du sitn we evribadi els wuda shiem fi du. Afta dat im galang go sidong a Gad rait an.

³ Unu fi luk pan Jiizas, luk ou di wikid sina dem chriit im wel bad, bot im uol aan an pres chuu siem wie. Unu fi tingk bout dat so unu no get taiyad an waahn gi op.

⁴ Unu a fait gens sin, bot unu neva yet fait so til blod staat ron.

⁵ A memba unu no memba wen Gad did taak tu unu kaaz unu a im pikni, an tel unu tingz we mek unu aat chrang? Iihn? “Mi pikni, wen mi ponish unu fi mek unu si se unu du sitn rang, unu no fi tek it laik se a no notn, an no bada gi op kaaz mi rof unu op an set unu chriet,

⁶ Mi rof op uu mi lov, an mi ponish evribadi we mi tek fi mi pikni.”

⁷ So, go chuu unu aad taim an tek it laik se unu a get chrietn out, kaaz wen Gad du dat a chriit im a chriit unu laik fi im uona pikni. An wich pikni unu fain we di faada no rof op an chrietn out? iihn?

⁸ Ef unu no get rof op an chrietn out laik evri naamal pikni, den unu a baastad pikni, an unu wudn riili bi fi Gad pikni den.

⁹ Pan tap a dat, di uol a wi faada we de pan ort, dem rof wi op wen wi du rang, an wi rispek dem fi dat. Den a umoch muo so wi fi gi iin tu di faada we de a evn so wi kyan riili liv.

¹⁰ Wi faada we de pan ort, dem ponish wi fi wan likl wail, an dem ponish wi ou dem tingk bes fi ponish wi. Bot Gad ponish wi fi wi uona gud, an a kaaz im waahn wi gud an kliin laka ou im gud an kliin mek im du dat.

¹¹ Nobadi neva eva tingk se it nais wen dem a get ponish di taim wen dem a get ponish — nuo sa, it at dem taim de man. Bot lieta dong it elp wi. Kaaz siek-a dat, wi lorn fi waak chriet an du di sitn dem we rait, plos it mek wi liv iina piis wid piipl.

¹² So lif op unu an dem we a jrap dong an mek unu wiik nii dem tan op chrang.

¹³ Waak pan ruod we chriet so di piipl dem uufa fut wiik an kyaahn waak gud, dem fut naa go get no wos, bot wi get beta.

¹⁴ Chrai aad fi liv iina piis wid evribadi, an chrai fi no dabl-dabl iina sin bot tan gud an kliin kaaz nobadi naa get fi si Gad ef dem no gud an kliin.

¹⁵ Gad lov wi iivn duo wi no dizorv it, so mek shuor se nobadi no ton dem bak pan wa im du fi dem. An mek shuor se nobadi no galang laik bita ruut we gruo kom ton bita chrii. Dem piipl de wi kom kom mek chobl an brok out wan bag a piipl. Mek shuor se dat no apm.

¹⁶ An mek shuor tu, se nobadi no kom liv no luus laif an naa no rispek fi Gad an Gad sitn dem laik Iisaa. Evriting we Iisaa wuda get, kaaz im a im faada fos bwai pikni, im gi we aal a dat fi wan dege-dege pliet a fuud.

¹⁷ Yu nuo se likl muo fram dat wen im did waahn get da blesn de nou, dem ton im bak. Im kudn tek bak wa im did du, aal wen im kom a baal.

¹⁸ A no laik di Izrel piipl dem wen dem did kech a Mount Sainai, unu no kom a no mountn we unu kyan toch, wich paat faiya a bon at, an di plies daak roun unu; no lait neehn de de an staam a bluo.

¹⁹ Unu no kom kom ier wan chompit a bluo loud loud an wan vais a chat som wod de, so aal uu did ier beg fi no ier no muo.

²⁰ Kaaz dem kudn tan di ruul we dem did a ier: “Aal ef a wan animal toch di moutn, stuon im.”

²¹ Az a matarafak wa did a gwaan did fraitn di piipl dem so moch, Muoziz se, “Mi a shiek di wie mi fried.”

²² Insted-a dat, unu kom a Mount Zaiyan, di Jeruusilem we de a evn, di siti fi di Gad we mek piipl liv. Unu kom tu wan iip a ienjel we gyada de an we api so til.

²³ Unu kom wich paat di fos set a pikni we a fala Krais Jiizas gyada op. Fi dem niem don rait dong iina evn aredi. Unu kom tu Gad tu, we joj evribadi. An unu kom tu dem piipl de we du rait iina Gad yai. Gad don mek dem rait iina evri wie.

²⁴ Unu kom tu Jiizas, di wan we iina di migl we mek di nyuu plan bitwiin Gad an piipl. An unu kom tu im blod, we ron an wash we sin, an da blod de tan fi sitn wie beta dan Iebl blod.

²⁵ Wach out an mek shuor se unu no ton unu bak pan di wan we a chat! Kaaz ef dem neehn get we wen dem did ton dem bak pan di wan pan ort we waan dem, unu tingk se wi a-go get we ef wi ton wi bak pan di wan fram evn we a waan wi?

²⁶ Wen im did taak da taim de, im vais did shiek op di ort, bot nou im pramis se, “Mi a-go shiek op di ort wan muo taim, bot da taim ya a no ort wan mi a-go shiek op, mi a-go shiek op evn tu.”

²⁷ Nou wen im se, ‘wan muo taim,’ dat shuo se di sitn dem we get shiek op im a-go tek dem we, an dem sitn de a di tingz we im did mek. Im a-go du dat so wa kyaahn shiek op, kyan tan.

²⁸ So laik ou Gad a gi wi di rait fi ruul wid im, an dat a sitn we kyaahn shiek op, mek wi gi Gad tangks an yuuz dis an worship im iina wan wie we wi mek im api. Mek wi rispek im big taim.

²⁹ Kaaz fi riil, wi Gad a laik wan faiya we bon op tingz.