Read Jamaican Patois Koloshan 2 Bible Online

Koloshan 2 - Jamaican Patois bible

Koloshan 2

¹ Siek-a dat, wi afi lisn di Gud Nyuuz we wi did ier nou muo dan wi yuus tu, so wi no chrie.

² Kaaz ef di mesij we di ienjel dem did gi, ton out chuu, an ef aal a di piipl dem we du rang, an dem we neva lisn, did get ponish laik ou dem fi get ponish,

³ den a ou wi a-go get we, ef wi ton wi bak pan da impuotant mesij ya bout ou Gad a-go siev wi, an no pie it no main, iihn? A di Laad Jiizas imself did fos tel piipl bout it yu nuo. An den di piipl dem we did ier im, mek wi nuo se it go so fi chuu.

⁴ An Gad yuuz sain an shuo se dis a chuu sopm. Som sitn we im du, piipl kyaahn biliiv dem yai di wie dem sopraiz! Plos im yuuz aal kain-a mirikl. An im aal mek piipl get wa di Uoli Spirit kom gi. Dem get it jos laik ou im did waahn it fi go. An aal a dat shuo se wa di piipl dem did se riili riili chuu.

⁵ Kaaz di worl we a-go kom — di worl wi a taak bout nou, im neehn mek ienjel kanchuol it.

⁶ An sumadi, somwe iina Gad wod, did se, “Gad, wa piipl wot mek yu bizniz wid dem so? Wa mek wi, we a jos piipl, mata so moch tu yu mek yu kier bout wi, iihn?

⁷ Fi wan likl wail yu mek man luo dong dan di ienjel dem. Yu gi im powa. Yu riez im op ai ai, laik a kroun yu put aan pan im ed.

⁸ Yu mek im av powa uova evriting.” An wen yu mek im inchaaj a evriting, dat miin se notn no de we im naa no kanchuol uova. Bot rait ya nou, wi no si se a im kanchuol evriting.

⁹ Wa wi si ya nou a Jiizas. Fi wan likl wail im did de luo dong dan di ienjel dem, bot nou im av powa. Nou Gad riez im op ai ai laik a wan kroun im put pan im ed. Im av powa an Gad riez im op ai ai kaaz im sofa an ded. An kaaz Gad lov wi so moch iivn duo wi no dizorv it, im mek Jiizas ded fi evribadi.

¹⁰ Evriting a Gad uon, an im yuuz im powa mek evriting an kip dem ou dem fi tan. So a di rait ting im du wen im mek di wan we a-go liid piipl fi get siev, sofa, an da wie de get fi im rait pozishan. Gad du dat so im kuda yuuz im fi mek uol iip a piipl kom fala im an ton Gad pikni dem.

¹¹ Di tuu a dem kom fram wan fambili: di wan we mek piipl gud an kliin an di piipl dem we a ton gud an kliin. So chuu dat, Jiizas no shiem fi se dem a im breda an sista dem.

¹² Im se tu Gad se, “Mi wi tel mi breda an sista dem wa yu du an ou yu tan; wen dem gyada fi worship, mi wi sing im, an priez yu infronta di uol a dem.”

¹³ An im se agen se, “Mi — mi wi chos iina im.” An im se dis tu, “Si mi ya, mi de ya wid di pikni dem we Gad did gi mi.”

¹⁴ So den, sins dem pikni ya a piipl laik evribadi els, im did ton sumadi jos laka dem, da wie de, wen im go ded, im kuda tek we di devl powa, an mek im naa no muo powa fi kil nobadi.

¹⁵ An siek-a dat, im frii di piipl dem we komiin laik sliev fi aal a dem laif jos kaaz dem fried fi ded.

¹⁶ Kaaz fi riil, a no di ienjel dem im bizniz wid so moch, bot a Iebriyam pikni pikni dem.

¹⁷ So siek-a aal a dem sitn de nou, im did afi ton laik im breda an sista dem we de pan ort. Im did afi ton laik dem iina evri wie. Da wie de, az Gad elpa, im kuda ton wan liida fi di priis dem we Gad kyan chos, an im wi gud an kain tu piipl kaaz im andastan we dem a go chuu. An im kuda kom tek we di piipl dem sin tu.

¹⁸ An kaaz im fi wan did sofa wen di devl did chrai fi mek im du rang, im kyan elp di piipl dem we a fies notn we wi kaaz dem fi sin.