Read Jamaican Patois Koloshan 3 Bible Online

Koloshan 3 - Jamaican Patois bible

Koloshan 3

¹ So mi breda an sista we bilang tu Gad, an we im kaal jos laik ou im kaal mi, unu fi kip unu main pan Jiizas. Im a di mesinja we Gad sen wi, an di liida fi di priis dem we go tu Gad fi wi, siek-a wa wi se wi biliiv iina.

² Gad kaal im an im aalwiez du we Gad se im fi du, jos laik ou Muoziz did du wa Gad tel im fi du wen im did a liid di piipl dem.

³ Bot im kom get muo priez dan Muoziz, an Gad lif im op aiya dan Muoziz, jos laik ou di wan we bil wan ous get muo big op dan di ous wuda get.

⁴ Kaaz evri ous we de bout, a sumadi bil it, bot a Gad bil evriting.

⁵ Az wan sorvant we elp an liid Gad piipl dem, Muoziz did aalwiez du wa Gad se im fi du. Im did taak bout di sitn dem we Jiizas wuda se lietaraan.

⁶ Bot Krais Jiizas, im a Gad Bwai Pikni. Gad put im inchaaj an im tek kier a Gad piipl dem an du wa Gad tel im fi du, jos laka ou wan bwai pikni we aalwiez du we im mada an faada tel im fi du wuda luk aafa dem ous an fambili. An ef wi uol aan chrang an gwaan luk tu Gad laik we wi buos bout aal di wail, den wi a paat a Gad piipl.

⁷ So den, jos laik wa di Uoli Spirit se, “Ef unu ier im vais tide,

⁸ du, no get aad-iez an no pie im no main. No galang siem laka wen unu faada faada dem did ton dem bak pan Gad an mek op dem main se dem naa lisn we im se. Dem mek op dem main fi tes im iina di dezot fi si we im a-go du.

⁹ A de-so unu faada faada dem did tes mi fi si ou lang mi did a go kip op wid dem, an dem si wa mi du fi faati ier

¹⁰ A dat mek mi did beks so wid da jinarieshan de, an mi se, ‘Fi dem aat eva a chrie, dem no waahn liv ou mi se dem fi liv an dem naa fala di wie we mi shuo dem.’

¹¹ So mi get beks bad an swier se, ‘Dem wi neva eva kom get da piis de we mi gi; dem naa go eva get fi kom a da plies de we dem kyan jos res!’ ”

¹² Mi breda an sista, mek shuor se non a unu no av aat we so wikid dat unu no biliiv iina di Gad we alaiv — di siem wan we mek piipl liv.

¹³ Insted-a dat, elp unu wan aneda evridie, so langks a ‘Tide’ it niem, so sin no ful op non a unu aat, an mek it tof op.

¹⁴ Kaaz wi an Krais Jiizas, wi staat wok tugeda ef wi gwaan uol aan an chos iina im no mata wa, laik ou wi yuus tu du wen wi did fos staat biliiv iina im.

¹⁵ Laik mi jos se, dis a wa Gad wod se, “Ef unu ier im vais tide, Unu no fi get aad-iez an no pie im no main No galang siem laka wen unu faada faada dem did ton dem bak pan mi an mek op dem main se dem naa go lisn.”

¹⁶ Kaaz a uu dem piipl de we ier Gad an mek op dem main se dem naa lisn we im se? A neva di siem piipl dem we Muoziz did liid outa Iijip?

¹⁷ An a uu Gad did beks wid fi faati ier? No di wan dem we did sin an jrap dong ded iina di dezot?

¹⁸ An a uu Gad swier se naa go eva kom get di piis we im gi, an naa go eva get fi kom a di plies we dem kyan jos res, iihn? Ef a neva di wan dem we neehn lisn im an du wa im se dem fi du, den a uu?

¹⁹ So wi si se dem neehn get di piis we Gad gi, an dem neehn get fi go a di plies we dem kyan res, jos kaaz dem neehn biliiv iina im laik ou dem fi biliiv.