Read Jamaican Patois Koloshan 4 Bible Online

Koloshan 4 - Jamaican Patois bible

Koloshan 4

¹ So wi fi mek shuor se Gad no pramis fi gi wi piis an res an wi en op no get it kaaz wi gilti a sopm.

² Kaaz wi did ier di Gud Nyuuz priich jos laik ou di Izrel piipl dem did ier it tu. Bot di wod we priich neehn elp dem at aal at aal kaaz dem neehn biliiv laik di res a piipl dem we did ier it.

³ Nou wi we biliiv a-go get di kain-a piis iina wi aat we Gad gi an wi a-go get fi go iina di plies we wi kyan jos res. Jos laik wa im se, “Mi did get beks bad an mi pramis se, ‘Dem naa go get di kain-a piis iina dem aat laik we mi a-go gi mi piipl dem an dem naa go get fi go iina di plies we dem kyan jos res!’ ”. Gad se dis iivn duo wa im did a plan fi du did don aredi — Gad wok don fram di taim im mek di worl.

⁴ Kaaz im did se dis somwe bout di sevn die, “an pan die sevn im res fram aal a im wok”

⁵ An rait ya-so agen im se: “dem naa go get di piis we mi pramis fi gi mi piipl dem an fi res laik wa mi pramis tu.”

⁶ So, som piipl stil kyan get di piis iina dem aat we Gad pramis fi gi im piipl dem an fi res laik ou im pramis, bot di wan dem we did ier di Gud Nyuuz priich, dem neehn get dat, kaaz dem neva du wa dem did fi du.

⁷ So Gad set wan neks die agen, dat a “tide.” Wi nuo se dis a chuu, kaaz afta umoch umoch ier im mek Dievid rait dis we mi did tel unu aredi, “Ef unu ier im vais tide, du, no get aad-iez an no lisn im an no du wa im se.”

⁸ Kaaz ef Jashwa did liid di piipl dem an mek dem get fi res, Gad wudn taak bout wan neda die afta dat.

⁹ So jos laik ou Gad did res pan die sevn, afta im did don mek di worl, a so wan Sabat res stil de de fi Gad piipl dem.

¹⁰ Kaaz di wan we get fi res ou Gad mek piipl res, im did res tu an no du no wok, jos laik ou Gad did res wen im did don fi im wok.

¹¹ So wi fi chrai aad aad fi mek shuor se wi get da kaina res de we Gad gi, so nobadi no mis di chaans fi get it kaaz dem go du di sed sitn dem we dem faada faada did du — no lisn Gad an no du wa im se dem fi du.

¹² Kaaz wen Gad taak, a laik se di sitn dem we im se alaiv, av powa an kyan du tingz! Gad wod kot beta dan eni wan a di tuu-saidid kotlis dem, an aal buor chuu an plit op suol fram spirit, an kot we wich paat di buon dem jain op fram di blod an sitn dem we de insaida di buon dem. It kyan joj we wi tingk iina wi aat an di sitn dem we wi waahn.

¹³ No iivn wan sitn kyan aid fram Gad! Bot evriting uopm op an im kyan si di uol a dem, an a im wi afi go ansa tu bout evriting we wi du.

¹⁴ Wi av wan liida fi di priis dem we a di bigis wan outa aal a di liida dem fi priis. Im go we Gad de — dat a Jiizas, Gad Bwai Pikni. So laik ou im a fi wi liida fi priis, di uol a wi we se wi biliiv iina im fi uol aan chrang chrang an gwaan biliiv siem wie.

¹⁵ Kaaz wi no av wan liida fi di priis dem we kyaahn andastan we wi a go chuu, an we no nuo se wi no so chrang wen wi fies notn we wi kaaz wi fi sin. Insted-a dat wi av wan we did get presha fi du aal kain-a rang sitn tu, siem laka wi — bot im neehn sin.

¹⁶ So mek wi go tu di wan we shuo wi lov iivn duo wi no dizorv it, an no bada if-an-bot an galang laik wi fried, so im we gud an kain, wi kain tu wi an shuo wi lov iivn duo wi no dizorv it an elp wi enitaim wi niid di elp.