Read Jamaican Patois Koloshan 5 Bible Online

Koloshan 5 - Jamaican Patois bible

Koloshan 5

¹ A pik Gad pik evri wan a di liida fi di priis dem fram mongks dem uona piipl, so dem kuda kom tu Gad fi di piipl dem. An so, dem kyan kom gi Gad aafrin an bon sakrifais gi im fi di piipl dem sin.

² Kaaz di liida fi di priis dem a piipl tu, im wi nuo ou fi tek taim wid piipl we no nuo beta an a du rang, sins im wiik an wi du rang tu.

³ A dat mek im afi bon sakrifais gi Gad fi fi im sin an fi ada piipl uon.

⁴ Fi ton di liida fi di priis dem a wan big ting dat, an nobadi kyaahn jos kom kom se dem waahn ton wan, an go ton wan. A no so it go. Gad afi kaal im fi ton di liida fi di priis dem, jos laik ou im did kaal Ieran.

⁵ A siem ting wid Krais Jiizas. Im neehn jos go tek op liida fi priis pozishan jos so, an big op imself — nuo, a Gad se tu im se, “Yu a fi mi Bwai Pikni; tide mi ton fi yu faada!”

⁶ An somwe els im se, “Yu a wan priis fi eva, wan priis laka Melkezidek.”

⁷ Wen Jiizas did de ya pan ort a liv, im did prie tu Gad aad aad, di wan we kuda siev im an no mek im ded. Im krai out loud an baal yai-waata. An Gad did ier im kaaz Jiizas did ombl imself, chos iina Gad an did eva redi fi du wa Gad tel im fi du.

⁸ Iivn duo Krais Jiizas a Gad uona pikni, wen im go chuu sofarieshan im did lorn fi lisn wa Gad se an du wa Gad se fi du.

⁹ An nou dat im go chuu aal a dat, an kom ton aal a we im sopuoz fi bi, im en op ton di wan we siev piipl fi eva, so langks dem du wa im tel dem fi du.

¹⁰ Kaaz Gad pik im fi ton di liida fi di priis dem laik Melkezidek.

¹¹ A uol iip wi av fi se bout dem sitn ya we wi a taak bout. Bot it aad fi brok it dong tu unu kaaz unu jos naa andastan.

¹² Kaaz wen unu shudaana tiich ya nou, unu niid sumadi fi tiich unu uova di fos sitn dem we Gad se. Unu ton piipl we niid milk; unu kyaahn nyam aad fuud!

¹³ Enibadi we liv pan milk, no riili nuo wa rait fram rang, kaaz dem a stil biebi.

¹⁴ Bot aad fuud a fi big piipl kaaz dem chrien demself fi nuo wa rait fram rang, so dem nuo ou fi luk pan tingz.