Read Jamaican Patois Koloshan 6 Bible Online

Koloshan 6 - Jamaican Patois bible

Koloshan 6

¹ So, mek wi muuv op man, an muuv paas di sitn dem we wi don tiich unu bout Krais Jiizas. Mek wi gruo paas dem sitn de, so wi kyan tiich unu siem laka ou wi wuda tiich piipl we chrang iina wa dem biliiv iina. Wi shudn afi tiich unu agen se piipl fi beg Gad paadn, chienj dem wiez an tap du di sitn dem we naa riili elp dem at aal, an dat dem fi biliiv iina Gad. Wi tiich unu dem sitn de wen unu did jos staat fala Jiizas.

² Wi shudn afi a tiich nou bout ou wi fi baptaiz, ar ou fi put an pan piipl wen dem a baptaiz an prie fi Gad bles dem, ar se ded piipl a-go kom bak alaiv an dat Gad a-go joj piipl — an a wa im mek op im main pan a-go laas fi eva. Nuo sa! wi shudn afi a tiich dem sitn de agen.

³ An a dem sitn de wi plan fi muuv paas, ef a dat Gad waahn.

⁴ Notn kyaahn mek piipl we did a waak wid Gad an ton bak an tap biliiv iina im, we did nuo di chuut we kom fram Gad, we did nuo ou it fiil fi Gad gi dem sopm kaaz dem get tingz fram im, we get di Uoli Spirit tu laik ada piipl,

⁵ we did ties an nuo fi demself se Gad wod gud, an we fiil an nuo di powa we kom wen Gad staat ruul iina evri wie,

⁶ an den afta aal a dat ton dem bak pan Gad, notn kyaahn mek dem piipl de kom bak tu Gad agen. Kaaz a niel dem a niel Gad Bwai Pikni pan di kraas wan muo taim, an mek piipl a luk dong pan im an tek im fi fuul.

⁷ Kaaz di grong we suok op di rien we faal pan it nof nof, an we mek plaant gruo an bier fuud we di faama kyan nyam — Gad bles da grong de.

⁸ Bot di grong we onggl mek makabush an we eva wiid op wiid op, da grong de naa no yuus, an Gad suun mek it kyaahn bier notn; faiya a-go en op bon it dong.

⁹ Bot fren, iivn duo wi taak so, wi shuor se fi unu kies difrant — wi shuor se beta sitn a-go apm tu unu, kaaz unu a liv laik piipl we Gad siev.

¹⁰ Gad fier yu nuo. Im naa go figet wa unu du. Im naa figet ou unu shuo umoch unu lov im wen unu elp di breda an sista dem we biliiv iina Gad, an ou unu stil a elp dem.

¹¹ Muo dan notn els, wa wi waahn unu fi du, a gwaan du di sitn dem we unu a du wid aal a unu aat til unu ded. Da wie de, unu wi en op get di sitn dem we unu a luk faawod tu; di sitn dem we Gad av fi unu.

¹² Wi no waahn unu fi get liezi an no waahn du notn. Nuo! unu fi tan laik di piipl dem we biliiv iina Krais Jiizas. Dem no gi op, an so dem get wa Gad did pramis fi gi dem.

¹³ Nou wen Gad did mek Iebriyam di pramis, sins nobadi no de we biga dan Gad an muo powaful dan im, im swier pan imself.

¹⁴ Im se, “Mi pramis yu se mi a-go bles yu uol iip, an mi a-go gi yu pikni pan tap a pikni, an fi dem pikni gweehn av uol iip a pikni, an fi dem pikni pikni gu dong a-go av uol iip a pikni tu!”

¹⁵ An afta Iebriyam wiet ou lang an gwaan chos Gad, im get wa Gad pramis im.

¹⁶ Piipl swier pan sumadi we biga dan demself an we muo powaful tu, an dis aalwiez shuo se wa dem se a riili so it go — aal aagiment don.

¹⁷ A siem so Gad did waahn shuo di piipl dem we im pramis klier klier se im riili a-go gi dem wa im pramis dem, an im naa go chienj im main, so im no jos pramis dem, bot im swier pan tap a dat.

¹⁸ Gad du tuu sitn we kyaahn chienj, kaaz wi nuo se Gad kyaahn lai. Im du dem tuu sitn de, so wi we ron tu im fi kip sief, wi wi fiil laik wi kyan uol aan chrang kaaz wi nuo fi shuor se wi a-go get di sitn dem we im pramis fi gi wi.

¹⁹ Wen wi chos Gad, an wi nuo fi shuor se im a-go gi wi wa im pramis wi, dat mek wi suol chrangga, an notn we a gwaan kyaahn kom shiek wi op. Wi tan todi jos laik wen di angka fi di ship jrap a di batam a di sii so di ship tan wan plies. An wen wi chos iina Gad so, di sitn dem we wi set wi aat pan, dem sitn de go insaid baka di kortn, go wan speshal speshal plies we Gad tan an we di priis dem wan kyan go.

²⁰ A de-so Jiizas go tu. Im go de bifuo wi, so im kyan elp wi. An im ton wan liida fi di priis dem fi eva, jos laka Melkezidek.