Read Jamaican Patois Koloshan 7 Bible Online

Koloshan 7 - Jamaican Patois bible

Koloshan 7

¹ Da Melkezidek ya we wi a taak bout, im did a king fi Sielem, an did a di priis fi di Muos Ai Gad tu. A im did miit op Iebriyam an bles im wen Iebriyam did jos a kom baka im yaad afta im go biit aaf di king dem.

² Iebriyam tek wan outa evri ten sitn we im did get iina di waar an a kyari go baka im yaad, an gi im. Nou di niem Melkezidek riili miin ‘king we du wa rait,’ bot den ‘king fi Sielem’ kyari wan difrant miinin, dat miin ‘king we mek piis.’

³ Melkezidek naa no mada, im naa no faada, im naa no fambili chrii fi shuo a we im kom fram. Im neehn baan an im neehn ded, laik Gad Bwai Pikni im tan wan priis fi eva.

⁴ Jos tingk bout ou big im bi, wen aal wan man laka Iebriyam, we a di faada fi di uol Izrel, gi im wan outa evri ten sitn we im did tek we!

⁵ Nou di laa se, aal a Liivai pikni pikni dem go dong, we ton priis, fi tek wan outa evri ten sitn fram Gad piipl dem. Dat miin se fi dem uona piipl a gi dem wan outa evri ten, iivn duo dem piipl de a Iebriyam pikni pikni dem go dong tu.

⁶ Da man ya duo, Melkezidek, nobadi kudn shuo se im kom fram Liivai fambili bot im get wan outa evri ten fram Iebriyam. An a im did aal bles Iebriyam tu — wen a Iebriyam Gad did mek pramis tu.

⁷ An evribadi don nuo aredi se sumadi we a bles sumadi els, biga dan di wan we a get bles.

⁸ Nou, di priis dem we kom fram Liivai, we get wan outa evri ten, di uol a dem ded, bot Melkezidek we get wan outa evri ten, Gad wod tiich se im no ded.

⁹ An wi kuda se Liivai imself, we get wan outa evri ten sitn, did pie Melkezidek wan outa evri ten tu di taim wen Iebriyam did gi im wan outa fi im ten.

¹⁰ Kaaz wen Melkezidek did miit Iebriyam, Liivai neehn baan yet, an a Iebriyam fambili Liivai wudaana kom fram.

¹¹ Gad did gi di Izrel piipl dem di laa. Di priis dem did fi kom fram Liivai fambili an dem did impuotant tu di laa. Nou ef di priis dem fram Liivai fambili kuda du aal we dem did fi du, wan difrant kain-a priis wudn afi kom? Wan we tan laka Melkezidek, an we no kom fram Ieran fambili, no chuu?

¹² Wen Gad chienj di kain-a priis we kom, di laa mos chienj tu.

¹³ Im, Melkezidek, we wi a taak bout, im kom fram wan difrant chraib an nobadi fram da chraib de neva wok az priis a di alta yet.

¹⁴ Kaaz evribadi mos nuo aredi se a Juuda wi Laad kom fram, an Muoziz neva se priis a-go kom fram da chraib de.

¹⁵ An aal a wa wi se, dat klier klier ef sumadi laka Melkezidek kom ton priis;

¹⁶ an im no kom ton priis siek-a di fambili we im kom fram laik ou di laa se it fi go. Im ton priis kaaz im kyaahn ded — an dat powaful.

¹⁷ Kaaz Gad wod se, “Yu a-go ton wan priis fi eva, jos laka Melkezidek.”

¹⁸ So di fos laa did put wan said kaaz it neehn wot notn, an it kudn du wa it did fi du.

¹⁹ Kaaz di laa kudn mek notn ton aal we it fi ton. Bot nou Gad gi wi sitn beta fi luk faawod tu an dat bring wi kluos tu im.

²⁰ An Gad neehn mek im priis an no mek wan pramis tu. Im did mek wan pramis! Bot di ada priis dem did ton priis an im neehn mek no pramis.

²¹ Bot Jiizas did ton wan priis wen Gad pramis im se, “Mi, di Laad, pramis se yu a-go bi wan priis fi eva, an mi naa go chienj mi main!”

²² An kaaz Gad aal mek pramis wid Jiizas, dis shuo se Jiizas mek di pramis we Gad gi wi beta dan di uol wan fi shuor shuor.

²³ Nou a uol iip a priis yu did afi av. Kaaz priis wuda ded an so ada priis wuda afi kom tek uova.

²⁴ Bot Kaaz Jiizas naa no ded a ded, im a-go tan priis fi eva an nobadi naa tek uova fram im.

²⁵ Piipl kyan kom tu Gad siek-a im an im kyan siev dem piipl de fi eva an eva. Im kyan siev dem fi eva kaaz im naa ded so im kyan aalwiez taak tu Gad fi dem.

²⁶ Liida fi priis we komiin laik Jiizas, a riili di kain-a liida fi priis we wi niid. Im mek Gad api iina evri kain-a wie. Im no du notn rang; im neva sin. Nobadi kyaahn bliem im fi notn. Gad mek im difrant, im no komiin laka sina piipl. An Gad riez im op ai ai, aiya dan aal evn.

²⁷ Im no tan laik di ada liida dem fi di priis dem we afi bon sakrifais fi fi dem uona sin an den fi di piipl dem sin die afta die afta die. Nuo sa! Im sakrifais imself gi Gad wan taim, fi evribadi, an a it dat.

²⁸ Di Laa gi piipl we wiik, an we wi du rang, pozishan fi ton di liida fi priis. Bot di pramis we Gad mek, we kom afta di laa, da pramis de mek di Bwai Pikni liida fi di priis dem. An im ton di wan we kyan du evriting we im sopuoz fi du fi eva.