Read Jamaican Patois 1 Tesiluoniyan 1 Bible Online

1 Tesiluoniyan 1 - Jamaican Patois bible

1 Tesiluoniyan 1

¹ Da leta ya a kom fram Jiemz wan sliev fi Gad an di Laad Jiizas Krais. Mi a rait da leta ya tu di twelv chraib a Gad piipl dem wa skyata skyata aal uova di worl. Oudi tu aal a unu.

² Mi breda an sista, unu fi wel api wen chobl an kraasiz tek unu.

³ Kaaz unu nuo se dem sitn de kom fi tes unu fi si ef unu a-go stil chos iina Gad. Wen dem chobl de tek unu, ef unu gwaan chos iina Gad siem wie, unu wi kyan tan op chrang no mata wa.

⁴ Unu fi gwaan uol aan chrang no mata wa apm an chos iina Gad so unu kyan bi aal we Gad waahn unu fi bi, an so unu wi no shaat a notn.

⁵ Ef sumadi no waiz, aal dem afi du a aks Gad an im wi mek dem waiz, kaaz Gad naa go uol bak notn fram dem. Im wi gi dem wa dem aks fa so dem wi nuo se im lov dem.

⁶ Bot wen yu aks yu mos biliiv se Gad a-go gi yu we yu aks fa. Enibadi we aks Gad fi sopm an stil a wanda ef Gad gweehn gi dem, tan jos laik wen briiz a bluo sii waata an it jos a-go op an dong so.

⁷ Sumadi laik dat no fi bada tingk se di Laad a-go gi im notn at aal.

⁸ Kaaz da man ya kyaahn mek op im main bout notn we im a du — wan minit im se sitn — di neks minit im chienj im main.

⁹ Gad piipl dem we puor mos buos bout ou Gad lif dem op an put dem pan tap.

¹⁰ Bot di rich piipl dem mos buos bout ou Gad ombl dem, kaaz rich piipl a-go get bluo we laik wail flowaz.

¹¹ Wen di son kom op an jrai op di plaant dem, di flowaz jrap aaf so it no priti no muo. A di siem ting a-go apm tu rich piipl we bizi a luk bout dem bizniz.

¹² Ef unu uol aan chrang an no gi op wen unu a go chuu chraiyal an kraasiz we kom fi tes unu, unu a-go wel api. Kaaz wen unu tes don, Gad gweehn gi unu di kroun a laif we im pramis fi gi evribadi we lov im.

¹³ Wen yu fiil fi du sopm wa yu nuo se rang, no bada se a Gad mek yu fiil fi du it. Kaaz nobadi kyaahn presha Gad fi du wa rang, an Gad no presha nobadi fi du wa rang niida.

¹⁴ Bot wen sumadi fiil fi du wa rang, a siek-a di wikid sitn we iina dem aat. Di sitn dem iina dem aat presha dem fi du wa rang.

¹⁵ Afta dem don plan, di wikid sitn dem tek kanchuol a dem an mek dem sin. An wen sin don wid dem, it kil dem.

¹⁶ Mi breda an sista, no fuul unuself.

¹⁷ Evri gud sitn — di sitn dem we no av notn bad bout dem — kom fram Faada Gad we mek aal a di lait dem we iina di skai. Bot im no tan laik di lait dem we im mek. Dem eva a chienj, bot im no chienj op chienj op.

¹⁸ Gad mek op im main fi gi wi nyuu laif, so im sen wi di chuu mesij, so wi kuda komiin laik di fos set a fuud fram di fiil fi im.

¹⁹ Mi breda an sista, ier wa mi a se, unu mos kwik fi ier an sluo fi taak ar get beks.

²⁰ Kaaz wen unu get beks, unu kyaahn du di gud sitn dem we Gad waahn unu fi du.

²¹ So unu fi get rid a aal a di naasi an torbl sitn dem we so nof bout di plies. Ombl unuself an tek iin di mesij we Gad put iina unu aat we kyan siev unu laif.

²² Unu no fi onggl ier Gad mesij — unu fi du wa it se! Ef unu onggl a lisn an naa du wa Gad se, unu onggl a fuul unuself.

²³ Ef nobadi ier di mesij an no du wa it se, dem komiin laik wan man we luk pan imself iina wan lukin glaas, si wa im luk laik,

²⁴ an afta im don luk, im go we an no memba a ting we im luk laik.

²⁵ Bot ef nobadi tek a gud luk iina di Laa we rait iina evri wie, an wa set piipl frii, ef im gwaan du wa it se an no figet it — a im a-go get bles.

²⁶ Ef nobadi tingk se im a sorv Gad di rait wie, bot im kyaahn kanchuol im tong, im jos a fuul imself, an we im se im a du fi Gad no wot notn.

²⁷ Di kain-a wok we gud an kliin iina Faada Gad yai a dis: elp di pikni dem uufa faada an mada dem ded an we a sofa, an di uman dem we ozban ded an we a sofa tu, an kip we fram di wikid sitn dem we iina di worl.