Read Jamaican Patois 1 Tesiluoniyan 2 Bible Online

1 Tesiluoniyan 2 - Jamaican Patois bible

1 Tesiluoniyan 2

¹ Mi breda an sista, sins unu se unu chos iina wi powaful Laad Jiizas Krais, unu kyaahn chriit som piipl beta dan som.

² Ef sumadi iina buosi kluoz an wan guol ring kom a unu choch, an wan puo sumadi we av aan uol kluoz kom iin tu,

³ an unu chriit di wan iina fansi kluoz speshal an tel im se, “Sidong a da nais siit ya,” bot tel di puo wan se, “yu tan op uova de-so,” ar “sidong ya-so pan di fluor a mi fut,”

⁴ ef unu du dat, no paashal unu paashal? Dat shuo se unu tek said an a joj piipl rang.

⁵ Mi breda an sista, ier wa mi a se. No Gad pik di puo piipl iina di worl fi bles dem kaaz dem biliiv iina im? Im pik dem fi tek paat iina im kindom wa im pramis fi gi aal uu lov im.

⁶ Bot unu shiem puo piipl. Tel mi sopm, no di siem rich piipl dem a presha unu an a jrag unu go a kuot ous?

⁷ No dem siem wan a chat aal saat a torbl sitn buot di Wan we wi bilang tu gud niem?

⁸ A gud sitn ef unu fala di Laa we aiya dan eni ada laa, an we rait dong iina Gad wod se, “Unu fi lov unu nieba siem laik ou unu lov unuself.”

⁹ Bot ef unu chriit som piipl beta dan som, a sin dat, unu a brok di Laa.

¹⁰ Kaaz iivn ef unu kip aal a di Laa dem an onggl brok wan, unu brok di uol a dem siem wie.

¹¹ Kaaz di siem wan we tel wi se, “No sliip wid sumadi we a no yu waif ar yu ozban,” tel wi se, “No morda.” So iivn ef wi no sliip wid sumadi we a no wi waif, ar wi ozban, bot wi morda sumadi, wi brok di uol Laa siem wie.

¹² Wi mos taak an gwaan laik piipl we di Laa a-go joj. An a di sed Laa a-go set wi frii,

¹³ kaaz piipl we no paadn nobadi, naa go get no paadn pan jojment die. Ef unu paadn piipl unu wi get frii fram jojment.

¹⁴ Mi breda an sista, wa sens unu tingk it mek ef sumadi se dem biliiv sopm, bot no du di sitn dem we wi shuo se dem riili biliiv? Unu tingk dem kyan get siev da wie de?

¹⁵ Ef unu si wan a unu breda ar sista niekid an onggri,

¹⁶ no bada jos tel im se, “Gad bles yu yu ier. Mek shuor yu tan waam an kip yu beli ful.” Unu tingk dat kyan elp im ef unu no gi im notn at aal?

¹⁷ A siem so ef unu se unu biliiv sopm an no av no akshan fi bak it op, wa unu se unu biliiv no wot notn — it no mek no sens.

¹⁸ Bot sumadi wi se, “Wan sumadi biliiv iina Jiizas, an wan neks sumadi du gud wok.” Bot mi wuda ansa im se, “Aarait den, shuo mi ou nobadi kyan biliiv iina Jiizas an no du gud wok, an mi wi shuo yu se mi biliiv iina Jiizas an a dat mek mi du di gud sitn dem we mi du.”

¹⁹ Yu biliiv se a onggl wan Gad de — gud! Aal di diiman dem biliiv dat an chrimbl.

²⁰ Ou unu so fuul-fuul! Unu waahn mi shuo unu se, ef sumadi se dem biliiv sopm bot no av no wok fi bak op wa im se im biliiv, it no wot notn?

²¹ Aarait, unu memba ou Gad did tes an pruuv se faada Iebriyam did riili biliiv iina im? Iebriyam did put im bwai pikni Aizak pan di alta fi kil im an bon sakrifais gi Gad.

²² So unu si se wa Iebriyam du shuo se im riili biliiv Gad.

²³ So it apm jos laik wa Gad wod did se, “Iebriyam biliiv iina Gad, an Gad se im eva du di rait sitn.” A so Iebriyam kom fi bi Gad fren.

²⁴ So unu si se Gad wi se sumadi a liv rait, no jos chuu dem se dem biliiv iina im, bot kaaz dem du wa im se dem fi du.

²⁵ A di siem wie Rieyab we did sliip wid piipl fi moni, did du we rait iina Gad yai wen shi tek iin di Izrel spai dem an sen dem we wan neda wie.

²⁶ So siem laik ou di badi ded an no wot notn wen di spirit lef it, a siem so it no wot notn wen sumadi se dem biliiv iina Gad an no du di wok wa shuo se dem riili biliiv.