Read Jamaican Patois 1 Tesiluoniyan 3 Bible Online

1 Tesiluoniyan 3 - Jamaican Patois bible

1 Tesiluoniyan 3

¹ Mi breda an sista, nof a unu no fi ron go chrai ton tiicha, kaaz unu nuo se wi we a tiicha a-go get joj aada.

² Aal a wi du rang sitn nof taim. Bot ef sumadi neva se notn rang yet dem no av no sin at aal. Kaaz ef nobadi kyan kanchuol dem tong dem kyan kanchuol dem uol badi tu.

³ Wen wi waahn kanchuol wan aas, wi put wan bit iina im mout. Da wie de wi kyan ton im eni wie wi waahn im fi go.

⁴ Luk ou ship big, bot di kyaptin yuuz wan likl stierin ton it eniwe im waahn it fi go, iivn duo a chrang briiz a bluo it.

⁵ A siem so piipl tong tan. Iivn duo di tong a wan likl likl paat a dem badi, it kyan chat big buosi chat, an kaaz nof chobl fi ada piipl. Tingk buot ou wan likl gyash a faiya kyan bon dong wan uol faris.

⁶ Iivn duo di tong a paat a wi badi, it komiin laik wan torbl faiya. It ful op a wikid powa we kyan mes op yu uol laif an put yu iina so moch chobl dat it komiin laik aal el brok luus pan yu, kaaz di tong komiin laik it set pan faiya we kom chriet fram el.

⁷ Piipl kyan chrien aal kain-a animal: wail animal, bod, animal we kraal pan di grong an animal we liv iina di sii — piipl chrien dem animal de aal di taim.

⁸ Bot nobadi kyaahn kanchuol di tong. It bizi-badi, wikid an ful-a paizn fi kil aaf piipl. Nobadi kyaahn kanchuol it at aal at aal.

⁹ Di siem tong we wi yuuz fi priez Faada Gad, a di siem tong wi a yuuz fi kos aaf piipl we Gad mek fi tan laik imself.

¹⁰ Di mout we wi a yuuz fi priez Gad a di siem mout wi a yuuz fi kos out piipl. Mi breda an sista, notn kyaahn go so.

¹¹ Ou fresh waata an saalt waata fi kom outa di siem spring, iihn?

¹² Breda an sista, fig chrii kyan bier aliv fruut? Griep vain kyan bier fig? Saalt spring kyaahn sen out fresh waata mi breda an sista!

¹³ Enibadi mongks unu waiz an av sens? Ef unu liv gud, ombl unuself an du wa rait, dat wi shuo se unu waiz.

¹⁴ Bot ef unu aat bita, an unu bad main an onggl a fait fi av unu uona wie, no bada buos bout unuself an ton we fram di chuut, kaaz wen unu du dat unu a mek di chuut luk laik se a lai.

¹⁵ Wa dem de piipl de kaal waiz no kom fram evn. Wa dem kaal waiz kom fram di worl, an no av notn fi du wid di Spirit — it kom fram di devl.

¹⁶ Eniwe yu fain piipl we onggl tingk bout demself an we bad main, yu fain chobl, kanfyuuzhan, an aal kain-a wikidnis tu.

¹⁷ Bot unu si di piipl dem we Gad mek waiz, fos ting bout dem, dem aat kliin, dem a no waar-buot, dem kier bout ada piipl, an dem no aad-iez. Dem kwik fi paadn piipl we du dem rang, an dem aalwiez du we rait. Dem no paashal an dem a no ipokrit niida.

¹⁸ Jos laik ou wen wan faama plaant gud siid im riip gud krap, a siem so di wan dem we du wa gud an liv iina piis wi mek ada piipl du wa gud an liv iina piis tu. An dat wi kaaz evribadi fi liv gud wid dem wan aneda tu.