Read Jamaican Patois 2 Tesiluoniyan 4 Bible Online

2 Tesiluoniyan 4 - Jamaican Patois bible

2 Tesiluoniyan 4

¹ Sins Krais Jiizas sofa wen im did a waak pan da ort ya, a siem wie unu fi get unu main redi fi sofa tu. Kaaz enibadi we staat sofa so, a ton dem ton dem bak pan sin.

² Fram nou aan den, da sumadi de no fi spen di res a dem laif pan da ort ya a du aal kain-a sitn we no av notn fi du wid Gad laka wan taim, kaaz a dat dem mait-a waahn fi du. Nuo, dem fi liv ou Gad waahn dem fi liv.

³ Unu spen inof taim a du wa di worliyan dem laik fi du. Iina di paas aal wa unu mosn du — a dat unu did lang fi du an galang go du. An unu yuus fi jringk uol iip aal di taim. Unu jringk chrang jringk we jongk unu aaf. Den som a di taim dem, unu an unu fren dem wuda av unu wail paati an jringk an galang wid aal kain-a naasinis. An ef dat neva bad, unu put ada gad uova Gad we av aal powa — wat a wikid wikid sitn!

⁴ An nou, dem piipl de we a gwaan wid di siem kain-a naasinis an wikidnis, dem no tap chat unu, an a se aal kain-a sitn bout unu, kaaz dem kyaahn andastan wa riili a gwaan. Ou kom unu naa ron galang wid dem, an a du di sed sitn dem laik wan taim?

⁵ Bot dem wi afi ansa tu Gad. Im redi fi joj evribadi — ded ar alaiv.

⁶ A dat mek di Gud Nyuuz did priich tu aal di piipl dem we ded nou, kaaz iivn duo dem get joj laik ada piipl, di Spirit wi mek dem kyan go liv wid Gad.

⁷ Bot, di taim wen aal a dis a-go don suun kom. So klier unu ed an staat tingk chriet, get unu main redi fi akshan, kanchuol unuself an staat liv siiros. Du aal a dat so dat unu kyan prie.

⁸ An muo dan notn els unu fi riili lov unu wan aneda aal di taim an wid aal a unu aat. Kaa lov kova op sin, no mata ou it mait-a uol iip.

⁹ Unu fi shier wid unu wan aneda — a dat unu fi du. Shier unu ous an no bada lang op unu mout an grombl grombl wen unu a du it.

¹⁰ Gad gi unu difrant difrant gif. Evri wan a unu fi yuuz wat-eva gif Gad gi unu, an yuuz it gud. Yuuz it elp ada piipl.

¹¹ So ef Gad mek non a unu fi priich — unu fi priich laik se a Gad wod itself unu a taak. Aal a uu fi sorv, fi sorv wid di chrent an powa we Gad gi unu. Da wie de Gad wi get di priez iina evriting wi du siek-a Jiizas Krais. Aal a di ana, priez an powa a fi Gad, tide, tumaro an fi eva! Iemen.

¹² Aal a unu we mi lov, no bada fraitn an gwaan laik se a sitn chrienj a apm tu unu siek-a di faiya we a riich unu iina dem ya chraiyal ya.

¹³ Bot unu fi api se unu a sofa laik ou Krais Jiizas did sofa, so unu kyan daans an praans iivn muo wen im kom bak wid aal a di powa, an piipl si ou big, ou laaj an ou powaful im riili bi!

¹⁴ Ef piipl shiem unu, an se aal kain-a bad sitn tu unu kaa unu a fala Krais Jiizas — a bles unu bles. Kaaz a di powaful Spirit — Gad Spirit, kom tan wich paat unu de.

¹⁵ No mek non a unu sofa siek-a unu a mordara, ar tiif, ar no kain-a kriminal, ar kaaz unu a sumadi we megl-megl iina piipl bizniz.

¹⁶ Nuo, a no so it fi go. Bot ef unu sofa chuu unu a piipl we biliiv iina Jiizas — a no notn dat fi shiem bout. Insted-a dat, unu fi priez Gad kaaz a big ting dat wen piipl a kaal unu Krais Jiizas falara.

¹⁷ Kaaz jojment taim kom ya nou; an wi we a Gad piipl, a wi it a staat wid fos. So, a wa a-go apm tu aal a di piipl dem we no biliiv Gad Gud Nyuuz?

¹⁸ An jos laik unu si iina Gad wod, “Ef Gad piipl we im a-go siev afi go chuu so moch chraiyal an chibilieshan, den a wa a-go apm tu di wikid piipl dem we no bizniz bout Gad an di sina dem?”

¹⁹ So wa mi riili a chrai se a dis: aal uu a sofa kaaz a dat Gad waahn fi dem, dem fi jos gwaan du wa rait. Da wie de, dem a gi Gad aal a dem laif an suol. Yes, a dat dem a gi Gad — di wan we mek dem. Di wan we naa go ton im bak pan dem. An di wan we kip wat-eva pramis im mek tu dem.