Read Jamaican Patois 2 Timoti 5 Bible Online

2 Timoti 5 - Jamaican Patois bible

2 Timoti 5

¹ Enibadi we biliiv se Jiizas a riili di Krais, dem a Gad pikni. An evribadi we lov di Faada lov im pikni tu.

² Dis a ou wi a-go nuo se wi lov Gad pikni dem, wen wi lov Gad an du wa im tel wi fi du.

³ Wen wi du wa Gad tel wi fi du, wi shuo se wi riili lov im, an wa Gad tel wi fi du no aad.

⁴ Kaaz wen wi chos iina Jiizas, Gad gi evri wan a wi we a im pikni di powa fi no gi iin tu di wikid sitn dem we iina di worl.

⁵ So a uu av di powa fi no gi iin tu di wikid sitn dem iina di worl? No onggl di wan dem we biliiv se Jiizas a Gad Bwai Pikni?

⁶ Jiizas Krais a di wan we did kom iina di worl fram evn. Wen im kom im did get baptaiz an den im ded pan di kraas. Im neva onggl get baptaiz, bot im ded pan di kraas tu. Di Spirit taak bout im, an di Spirit onggl taak di chuut.

⁷ So wi av chrii wie fi nuo se Jiizas riili riil:

⁸ di Spirit, di waata, an di blod, an di chrii a dem se di siem ting.

⁹ Wi biliiv we piipl se, bot wa Gad se wot muo dan wa piipl se, kaaz dis a wa Gad se wen im taak bout im pikni.

¹⁰ Enibadi we biliiv iina Gad pikni nuo iina dem aat se wa Gad se a chuu. Bot enibadi we no biliiv Gad, tek im fi wan laiyad, kaaz dem no biliiv we Gad se bout im pikni.

¹¹ An dis a wa Gad se: im gi wi laif we wi mek wi liv fi eva, an wi get da laif ya wen wi an im pikni kluos.

¹² Enibadi we kluos wid Gad pikni av laif. Bot enibadi we no kluos wid Gad pikni no av laif.

¹³ Mi rait unu we biliiv iina Gad Bwai Pikni so dat unu wi nuo se unu a-go liv fi eva an eva.

¹⁴ Wi shuor se Gad wi ier wi prieya wen wi aks im fi di sitn dem we im waahn wi fi aks fa.

¹⁵ Sins wi nuo se Gad ier wi prieya, wi shuor se wi prieya dem don ansa aredi.

¹⁶ Ef nobadi si im breda ar sista sin iina wan wie we naa go mek im ded, unu fi prie fi dem se Gad wi paadn dem, an da sumadi we sin da sin de we naa go mek im ded, Gad wi mek im liv. Som sin kaaz piipl fi ded. Mi naa tel unu fi prie fi sumadi we du dem sin de.

¹⁷ Evriting wa rang a sin, bot a no evri sin sen piipl go ded.

¹⁸ Wi nuo se nobadi we baan Gad pikni no jos kip aan a sin so. Gad Bwai Pikni kip dem sief, so di devl kyaahn toch dem.

¹⁹ Wi nuo se wi bilang tu Gad an dat di devl kanchuol di uol worl.

²⁰ Wi nuo se Jiizas Krais, Gad Bwai Pikni kom an shuo wi di riil Gad. Siek-a Jiizas, wi bilang tu Gad nou — di riil Gad we mek piipl liv fi eva an eva.

²¹ Mi pikni, kip unuself fram faalz gad.