Read Jamaican Patois Failiiman 1 Bible Online

Failiiman 1 - Jamaican Patois bible

Failiiman 1

¹ Da leta ya a kom fram mi, di Elda — tu mi speshal fren, Gaiyos. Mi fren, mi riili riili lov yu.

² Mi prie se evriting aarait wid yu, an dat yu badi aati jos laik ou yu suol aati.

³ Mi did riili api wen som a di breda an sista dem kom luk fi mi an tel mi ou yu tan op chrang fi di chuut.

⁴ Notn no mek mi api so laik wen mi ier se mi pikni dem a liv ou di Laad se dem fi liv — azkaadn tu di chuut.

⁵ Mi fren, wen yu tek kier a Jiizas sorvant dem, aal di wan dem we yu neva nuo, dat shuo se Gad kyan dipen pan yu.

⁶ Dem tel di choch ou yu lov dem. So mi a beg yu, sen dem pan dem wie jos laik ou yu nuo Gad wuda waahn yu fi du.

⁷ Wen dem lef fi go luk bout Krais Jiizas bizniz, dem neehn tek notn fram di worliyan dem.

⁸ So wi afi kain tu dem breda an sista ya, tek dem iin, luk aafa dem, an wok wid dem fi pred di Gud Nyuuz.

⁹ Mi rait wan leta tu di choch, bot Daiyachrofiiz uu lov fi big op imself, no waahn av notn fi du wid mi.

¹⁰ So wen mi kom, mi a-go mek evribadi nuo bout di wikid lai dem wa im a tel pan mi. Bot a no onggl dat im du, im ton we di breda an sista dem we kom a di choch an chriit dem riil bad. An di ada breda an sista dem iina di choch we kain tu di wan dem we a priich Gad mesij, Daiyachrofiiz chriit dem riil torbl tu, an ron dem outa di choch.

¹¹ Mi breda, no fala bad kompni. Enibadi we du wa rait kom fram Gad. Enibadi we lov du we rang no nuo Gad.

¹² Evribadi av gud sitn fi se bout Dimiichriyos, dem kyan si se im riili a liv ou di Laad se im piipl fi liv. Wi taak gud bout im tu, an yu nuo se wi no tel lai.

¹³ Mi av nof muo sitn fi rait tu yu bout, bot mi no waahn rait it wid pen an piepa.

¹⁴ Mi suun kom luk fi yu, so wi kyan sidong an chat.