Read Jamaican Patois Revilieshan 10 Bible Online

Revilieshan 10 - Jamaican Patois bible

Revilieshan 10

² Den mi si wan neda powaful ienjel a kom dong fram evn. An im did av wan kloud rap roun im laik kluoz, an wan rienbuo uova im ed. An im fies shain brait laik di son. An im fut dem komiin laik som kalom we mek outa faiya.

³ Di ienjel did av wan likl ruol op buk uopm op iina im an. Im tan op wid im rait fut pan di sii an im lef fut pan di lan.

⁴ Den im baal out wid wan loud vais laik wen wan laiyan ruor. Wen im baal out mi ier sevn tonda ruol.

⁵ Wen di sevn tonda ruol, mi did out fi rait dong wa dem se. Bot sumadi iina evn se tu mi se, “No tel nobadi wa di sevn tonda dem se. No rait it dong.”

⁶ Den di ienjel we did tan op pan di sii an pan di lan lif op im rait an tu evn.

⁷ An im mek da pramis ya pan di Laad — di Laad we liv fi eva an eva, di Laad we mek evn an evriting we op de, di Laad we mek di ort an evriting pan it, an di Laad we mek di sii an evriting wa iin de, im se, “Dis ya naa go wiet no langga!

⁸ Wen di taim kom fi ienjel nomba sevn bluo fi’im chompit, Gad siikrit plan a-go kom chuu. It a-go kom chuu siem laik ou Gad did tel im prafit dem se it a-go apm.”

⁹ Siem taim di vais we mi did ier fram evn taak tu mi agen. Im se, “Yu si di ienjel we tan op pan di sii an pan di lan wid di uopm ruol op buk iina im an, go tek it fram im.”

¹⁰ So mi go tu di ienjel an aks im fi gi mi di likl ruol op buk. Im se tu mi se, “Si’it ya. Tek it an nyam it. It a-go ties swiit laik oni iina yu mout, bot it a-go mek yu tumok sowa.”

¹¹ So mi tek di likl ruol op buk fram di ienjel an nyam it. It did ties swiit laik oni iina mi mout, bot afta mi nyam it, it mek mi tumok ton sowa.