Read Jamaican Patois Revilieshan 12 Bible Online

Revilieshan 12 - Jamaican Patois bible

Revilieshan 12

² Den mi si wan powaful sain iina evn: wan uman we luk laik shi av aan di son — rap roun ar laik ar kluoz, an di muun anda ar fut an wan kroun pan ar ed wid twelv staar.

³ Di uman did av biebi iina beli. An shi did a chogl fi push out ar Biebi. An shi baal out wen biebi pien laik ar.

⁴ Den mi si wan neks powaful sain iina evn: wan big big red jragan we av sevn ed an ten aan, an sevn kroun pan im ed dem.

⁵ Im yuuz im tiel an jrag dong wan outa evri chrii staar we iina di skai an fling dem dong a ort. Di jragan tan op infronta di uman we did bout fi av ar biebi, so dat im kuda nyam aaf ar pikni az im baan.

⁶ Shi av wan bwai biebi. Ar biebi a-go ruul aal a di piipl dem iina di worl. A im a-go ron tingz an im naa go tek piti pan non a im enimi dem. An bifuo yu kuda kwint, ar pikni get tek op iina evn an go sidong pan Gad chuon.

⁷ Di uman ron we go a wan plies we Gad set op fi ar, faar faar we nobadi no liv. A de-so shi a-go get luk aafa fi wan touzn, tuu onjrid an siksti die.

⁸ Den waar brok out iina evn. Maikal an di ienjel dem we im liid fait gens di jragan, an di jragan an fi im ienjel dem fait bak.

⁹ Bot di jragan did tuu wiik, so im kudn win an im kudn tan a evn.

¹⁰ Di powaful jragan — di uol siniek we did de bout fram wie bak wen, we dem kaal di devl, ar sietan, we chrik di uol worl fi sin gens Gad, im an im ienjel dem get fling dong a ort.

¹¹ Den mi ier sumadi iina evn a baal out loud loud se: “Di taim kom nou wen fi wi Gad a-go siev im piipl dem. Nou im a-go tek im powa an ruul kaaz a im a king. Nou Krais Jiizas a-go ruul uova di worl. Kaaz di devl we yuuz tu tan op infronta Gad die an nait an tel lai pan wi breda an sista dem get kik outa evn.

¹² Gad piipl biit di devl an no gi iin tu di sitn dem we im waahn dem fi du, kaaz dem neva tap biliiv iina Jiizas we did gi op im laif pan di kraas fi dem. An dem neva tap pred di Gud Nyuuz bout Jiizas. An dem neva lov dem laif so moch dat dem wuda fried fi ded.

¹³ So evribadi iina evn, unu fi api! Bot aal uu liv pan di ort an piipl we de a sii, chobl fu’unu, kaaz di devl gaan dong tu unu! Im beks bad — beks til im tempa a bwail uova, kaaz im nuo se im taim shaat.”

¹⁴ Wen di jragan si se im get fling dong a ort, im staat ron dong di uman we did av di bwai biebi.

¹⁵ Sumadi gi di uman tuu wing laik wan powaful iigl, so shi kuda flai go a di plies we Gad set op fi ar — faar faar we nobadi no liv. A de-so shi a-go get luk aafa fi chrii an a aaf ier, we di jragan kyaahn du ar notn.

¹⁶ Den di jragan pit out wan uol iip a waata, laik wan riva, outa im mout fi chrai wash we di uman.

¹⁷ Bot di grong uopm op an tek iin di flod waata we di jragan pit outa im mout.