Read Jamaican Patois Revilieshan 14 Bible Online

Revilieshan 14 - Jamaican Patois bible

Revilieshan 14

¹ Unu afi waiz ef unu waahn andastan dis ya. Enibadi we waiz kyan ad op di wail animal nomba, kaaz a man nomba. Im nomba a 666.

³ Den mi luk, an mi si di Biebi Shiip tan op pan mount Zaiyan, an im 144,000 sorvant dem we av im niem an im Faada niem rait dong pan dem farid did de de wid im.

⁴ An mi ier wan vais fram evn we soun laik wen wan powaful riva kom dong, an laik wen loud tonda ruol. Di soun did komiin laik wa yu ier wen piipl a plie dem aap.

⁵ An dem sing wan nyuu sang infronta di chuon an infronta di fuo laiv wail animal an di elda dem. Nobadi kudn lorn di sang, onggl di 144,000 we Gad did siev.

⁶ Dem man ya neva sliip wid no uman — dem neva av seks. Dem fala did Biebi Shiip evriwe im go. Dem did get siev fram mongks di piipl dem we de pan di ort, so dem bilang tu Gad an di Biebi Shiip. Dem komiin laik di fos paat a di sitn we sumadi gi Gad fram dem faam.

⁷ Dem no tel no lai, an nobadi kyaahn paint no fingga pan dem.

⁸ Afta dat, mi si wan neda ienjel a flai iina di skai. Im did av wan mesij fram Gad we a-go laas fi eva fi go tel di piipl dem we liv pan di ort. Di mesij a did fi evri konchri, chraib, piipl, an evri langwij.

⁹ Di ienjel kaal out loud loud an se, “Unu beta gi Gad nof rispek an priez, kaaz a fi’im taim nou fi joj aal di piipl dem we de pan di ort. Unu fi worship di wan we mek evriting: di evn an di ort, di sii an di spring dem.”

¹⁰ Den mi si wan sekan ienjel iina di skai an mi ier im kaal out se, “Mash op! Babilan di powaful siti mash op! Shi mek aal a di konchri dem iina di worl jringk di wain we mek dem du aal kain-a seks sin laik ar.”

¹¹ Den ienjel nomba chrii kom afta di ada tuu ienjel dem an kaal out loud loud: “Ef nobadi worship di wail animal an di sitn we dem mek fi luk laik im an tek im maak pan dem farid ar pan dem rait an,

¹² Gad a-go beks bad an a-go ponish dem wikid. A laik se dem a jringk chrang wain we Gad chuo gi dem iina wan kop an it no waata dong. Gad gweehn ponish dem wid solfa we a-go bon dem op laik faiya infronta im uoli ienjel dem an di Biebi Shiip.

¹³ An di sumuok fram di solfa we a bon dem, go op fi eva an eva. Di piipl dem we worship di wail animal an di sitn we dem mek fi luk laik im, an we tek im maak pan dem badi a-go sofa die an nait fi eva an eva an dem naa go get no iiz op.

¹⁴ So Gad piipl we du we im se afi tan op chrang an gwaan chos Jiizas.”

¹⁵ Den mi ier wan vais fram evn se tu mi se, “Rait dong dis: fram nou aan, di piipl dem we ded an dem an di Laad a wan, a dem bles.” Di Spirit se, “Yes, dem aad wok don, an dem a res nou, an aal a di sitn dem wa dem did du wi taak fi dem.”

¹⁶ Wen mi luk, mi si wan wait kloud infronta mi, an sumadi laik di Man we Gad Pik did a sidong pan di kloud wid wan guol kroun pan im ed, an sitn laik wan shaap kotlis iina im an.

¹⁷ Den wan neda ienjel kom outa Gad ous an kaal out luod loud tu di sumadi we sidong pan di kloud, im se, “Tek yu kotlis an staat chap dong di fiil, kaaz di fruut dem pan di ort wel raip an di taim kom nou fi staat gyada op wa de pan di ort.”

¹⁸ So di sumadi we did sidong pan di kloud, flash im kotlis uova di ort, an gyada op we fi gyada.

¹⁹ Wan neks ienjel kom outa Gad ous iina evn wid wan shaap kotlis tu.

²⁰ An wan neks ienjel we inchaaj a faiya kom fram di alta an kaal out loud loud tu di wan we av di shaap kotlis. Im se, “Tek yu shaap kotlis an gyada di bonch a griep fram di griep vain dem pan di ort, kaaz di griep dem raip nou.”