Read Jamaican Patois Revilieshan 16 Bible Online

Revilieshan 16 - Jamaican Patois bible

Revilieshan 16

¹ Gad brait brait lait an im powa ful op im ous wid sumuok. Nobadi kudn go iina Gad ous til di sevn torbl sitn dem don — di torbl sitn wa di sevn ienjel dem did av fi mek piipl sofa.

³ Den mi ier wan loud vais fram Gad ous se tu di sevn ienjel dem, “Unu go pich out wa iina unu boul pan di ort fi shuo se Gad wel beks.”

⁴ Di fos ienjel pich out wa iina fi im boul pan di lan. Den som ogli suor we kaaz nof pien brok out pan di piipl dem we av di wail animal maak, an we worship di sitn we dem mek fi luk laik im.

⁵ Di sekan ienjel pich out wa iina fi im boul pan di sii, an it ton iina sitn we luk laik ded man blod, an evriting we liv iina di sii ded aaf.

⁶ Di tord ienjel pich out wa iina fi im boul pan di riva an spring waata dem, an dem ton iina blod.

⁷ Den mi ier di ienjel we inchaaj a di waata se tu Gad se: “Yu a di Uoli Gad, di wan we liv, di wan we de bout fram wie bak wen, an we eva liv. Yu fier, an yu joj di piipl dem pan di ort ou dem fi get joj,

⁸ kaaz dem kil yu piipl an yu prafit dem an mek fi dem blod ron, so yu gi dem blod fi jringk, an a dat dem dizorv.”

⁹ Den mi ier wan vais fram di alta se: “Yes, Laad Gad, nobadi no powaful laik yu, yu joj piipl ou dem fi get joj an gi dem wa dem dizorv!”

¹⁰ Den ienjel nomba fuo pich out wa iina fi im boul pan di son, an Gad lou di iit fram di son fi skaach op di piipl dem laik faiya.

¹¹ Di son did so at it bon di piipl dem bad bad. An iivn duo dem a bon op, dem stil a kos Gad, Gad we av powa uova di sitn dem we mek piipl sofa. Dem kos im an stil wudn ton we fram dem sin an gi Gad priez.

¹² Den ienjel nomba faiv pich out wa iina fi im boul pan di wail animal chuon, an kaaz daaknis fi kom dong pan di uol a im kindom. Di torbl pien we piipl sofa, mek dem chaa op chaa op dem tong.

¹³ Siek-a ou dem a sofa an di suor we dem av, dem kos aaf Gad we iina evn, bot dem stil wudn ton we fram di torbl sitn we dem did a du.

¹⁴ Ienjel nomba siks pich out wa iina fi im boul pan di big big riva Yuufrietiiz, an di waata jrai op an mek wie so dat di king dem fram di Iis konchri dem kyan kraas wid dem aami.

¹⁵ Den mi si chrii wikid spirit we luk laik bulfrag; wan kom outa di jragan mout, wan outa di wail animal mout an wan outa di laiyad prafit mout.

¹⁶ Di spirit dem a diiman spirit we du som powaful sitn. Dem go out aal uova di worl go gyada op di king dem fi waar — di waar we a-go apm pan di big die wen Gad, we muo powaful dan evribadi, a-go joj piipl.

¹⁷ “Luk, mi a-go kom laik wan tiif! Di wan dem we gwaan luk out an kip aan dem kluoz so dat dem na’afi go bout niekid an shiem se evribadi si dem niekid, a dem wel bles.”

¹⁸ Di wikid spirit dem gyada op di ruula dem an dem aami dem a wan plies we iina di Iibruu langwij dem kaal Aamagedan.

¹⁹ Ienjel nomba sevn pich out wa iina fi im boul iina di ier, an wan loud vais kom fram Gad chuon we iina Gad ous, it se, “It don.”

²⁰ Den laitnin flash, an wan piis a tonda klap, an wan torbl torbl ortkwiek shiek. Fram Gad put piipl pan ort, no ortkwiek so torbl neva apm yet — it did wel torbl.

²¹ Di ortkwiek plit op di powaful siti iina chrii paat, an aal a di siti iina aal di konchri dem iina di worl mash op. Gad memba Babilan, di powaful siti. Im joj ar, an fuos ar fi jringk di wain we did iina di kop we shuo se Gad did wel beks.