Read Jamaican Patois Revilieshan 17 Bible Online

Revilieshan 17 - Jamaican Patois bible

Revilieshan 17

¹ Som big uol ielstuon jrap outa di skai pan piipl. Som a dem wie nieli onjrid poun. An di piipl dem kos Gad siek-a di torbl sofarieshan we dem fies siek-a di ielstuon dem we jrap pan dem.

³ Wan a di sevn ienjel dem we av di sevn boul dem kom an se tu mi se, “Kum ya! Mek a shuo yu ou Gad a-go joj an ponish di powaful an wikid uor — dat a di siti we bil op saida uol iip a waata,

⁴ we di king dem pan di ort du aal kain-a naasi seks sin wid, an di piipl dem we liv iina di worl get jongk fram di wain we shi gi dem an du aal kain-a seks sin laik ar.”

⁵ Den di Spirit tek kanchuol a mi, an di ienjel kyari mi go iina wan plies we nobadi neva liv, an mi si wan uman sidong pan wan red red wail animal. Di wail animal did av wan uol iip a torbl niem rait op aal uova im we kos out Gad. An im av sevn ed an ten aan.

⁶ Di uman did jres op iina porpl an red kluoz. Shi did a wier som guol an ada juwil laik porl an dier stuon. Iina ar an shi did av wan guol kop. Di kop did ful op a di wikid an torbl naasinis we shuo ar seks sin dem.

⁷ Shi av wan niem rait pan ar farid we nobadi no nuo wa it miin. Di niem se: A MI A POWAFUL BABILAN. MI A DI MUMA FI AAL UOR AN FI AAL KAIN-A SEKS SIN AN NAASINIS IINA DI WORL.

⁸ Mi si se di uman did jongk. Shi did jringk an get jongk wid Gad piipl dem blod — di wan dem we dem did kil. Dem kil dem kaaz dem did tan op chrang fi wa dem biliiv bout Jiizas. Wen mi si ar, mi fraitn so til.

⁹ Bot di ienjel se tu mi se: “Wa yu a fraitn bout? Mek mi tel yu di siikrit bout di uman niem an di wail animal we shi a raid we av di sevn ed wid di ten aan dem.

¹⁰ Di wail animal we yu did si, did alaiv wan taim bot im ded nou. Im a-go kom op outa di diip diip singk uol we na’av no batam, an Gad a-go don im. Aal a di piipl dem pan ort uufa niem no rait dong iina di buk bifuo di worl mek, dem a-go shak wen dem si di wail animal, kaaz im did de ya bifuo, bot im did ded, an im a-go kom bak alaiv. Da buk de av iin di niem a di piipl dem we riili a liv.

¹¹ “(Aal dem sitn ya we mi a se, dem kaal fi sumadi we tingk waiz). Di sevn ed dem tan fi di sevn mountn we paat di uman sidong. Di sevn ed dem tan fi sevn king tu.

¹² Faiv a dem ded, wan a liv, an di neks wan no kom yet, bot wen im du kom, im a-go tan fi wan likl wail.

¹³ Di wail animal we did de ya aredi, an ded nou, a-go ton king nomba iet. Im a did wan a di sevn king dem, bot Gad a-go don im.

¹⁴ “Di ten aan dem we yu did si a ten king we neva get fi ruul yet, bot dem a-go get powa fi ruul wid di wail animal fi wan owa.

¹⁵ Aal a dem onggl a tingk fi du wan sitn, dat a fi gi di wail animal fi dem powa an mek im ruul.

¹⁶ Dem a-go mek waar gens di Biebi Shiip, bot di Biebi Shiip a-go biit dem kaaz im a Laad uova aal laad an King uova evri king — im a-go av im speshal piipl dem wid im, we im kaal, pik, an we du we im se.”

¹⁷ Den di ienjel tel mi se, “Di waata we yu si, (we di uor sidong), a piipl — kroud a piipl fram aal kain-a konchri we taak aal kain-a langwij.

¹⁸ Di wail animal an di ten aan dem we yu did si a-go iet di uor. Dem a-go mash ar op an lef ar niekid. Dem a-go nyam ar flesh an tek faiya bon ar op.