Read Jamaican Patois Revilieshan 21 Bible Online

Revilieshan 21 - Jamaican Patois bible

Revilieshan 21

¹ Enibadi uufa niem no rait dong iina di buk we Gad rait di niem a di piipl dem we a-go liv fi eva an eva, dem a-go get fling dong iina di liek a faiya tu.

³ Den afta Gad don joj evribadi, mi si wan nyuu evn an wan nyuu ort, kaaz di fos evn an di fos ort did disapier, an di sii did disapier tu.

⁴ Mi si di uoli siti, di nyuu Jeruusilem, a kom dong fram Gad outa evn. It did luk laik wan uman we jres op nais nais fi go a ar wedn fi miit di man we shi a-go marid.

⁵ An mi did ier wan loud vais fram di chuon a se, “Fram nou aan Gad yaad a-go de mongks piipl. Im a-go liv wid dem an dem a-go bi fi’im piipl. Gad imself a-go de wid dem an im a-go bi fi dem Gad.

⁶ Gad a-go waip dem fies an jrai op aal a dem yai-waata. Nobadi naa go ded agen, so nobadi naa go ala ar baal. An nobadi naa go fiil no pien, kaaz dem uol taim sitn de don we wid.”

⁷ Gad we did sidong pan di chuon se, “Mi a mek evriting nyuu!” Den im se, “Rait dis dong, kaaz wa mi a se a chuu an evribadi kyan biliiv it.”

⁸ Im se tu mi se, “Evriting don nou. Mi a di fos an mi a di laas. Evriting staat wid mi an evriting don wid mi. Aal uufa chuot jrai, mi a-go gi dem waata fi jringk — waata fram di spring we gi laif, an mi a-go gi dem it frii.

⁹ Enibadi we biit di devl an no gi iin tu di sitn dem we im waahn dem fi du, gweehn get aal dem nais sitn ya. An mi a-go bi fi dem Gad an dem a-go bi fi mi pikni.

¹⁰ Bot di wan dem we a kowad, we no biliiv iina Gad, we mek demself doti wid aal a di naasi sitn we dem du, we kil piipl, we tek paat iina aal kain-a seks sin, we wok uobiya, we worship faalz gad an we tel lai — dem a-go get fling dong iina di liek a faiya we a bon wid solfa. A dis a di sekan det.”

¹¹ Di sevn ienjel dem we did av di sevn boul ful-a di sevn laas sitn dem fi mek piipl sofa wikid wikid, wan a dem se tu mi se, “Kum, mek mi shuo yu di braid, di Biebi Shiip waif.”

¹² Den di Spirit tek kanchuol a mi an di ienjel kyari mi we go op a di tap a wan ai ai mountn. Im shuo mi di uoli siti, Jeruusilem, we did a kom dong fram Gad, outa evn.

¹³ Di siti did ful-a Gad brait brait lait. Di wie it did so brait, it luk laik wan dier griin an bluu stuon we niem jaspa. Di stuon did so klier, yu kuda si rait chuu it, siem laik ou yu kyan si chuu kristal.

¹⁴ Di siti waal did wel ai an it did av twelv giet. Evri wan a di twelv giet dem did av wan ienjel a gyaad it, an di niem a wan a Izrel twelv chraib dem did rait dong pan it.

¹⁵ Di siti did shiep laik wan baks. Pan evri wan a di said dem, yu did av chrii giet: chrii pan di naat said, chrii pan di sout said, chrii pan di iis said, an chrii pan di wes said.

¹⁶ Di waal a di siti did bil op pan twelv big big stuon. An evri wan a di stuon dem did av di niem fi wan a di Biebi Shiip twelv apasl dem rait dong pan it.

¹⁷ Di ienjel we did a taak tu mi did av wan ruula iina im an we mek outa guol. Da ruula de a did fi meja di siti, di giet dem an di waal dem.

¹⁸ Nou, di siti did shiep laik wan baks. Lang wie an kraas wie it meja di siem ting. Wen di ienjel meja it, it a did 1,400 mail lang, 1,400 mail waid, an 1,400 mail ai (aal a di said dem meja di siem ting).

¹⁹ Im meja di siti waal wid im ruula an it a did 216 fut ai (azkaadn tu ou piipl meja tingz, an a di siem wie fi meja di ienjel did a yuuz).

²⁰ Di siti waal did mek outa som priti griin an bluu stuon we niem jaspa. An di siti did mek outa di bes kain-a guol. An di wie di guol did so gud, it komiin laik lait did a shain chuu it jos laik ou lait shain chuu glaas.

²¹ Di twelv big stuon we di siti waal did bil pan did mek outa aal kain-a priti dier stuon. Di fos stuon mek outa jaspa, stuon nomba tuu a did wan bluu stuon niem safaiya, nomba chrii a did kalsiduoni we did griin wid nof ada kola, stuon nomba fuo a did wan red an griin stuon niem emral,

²² nomba faiv a did wan saadaniks stuon we av red an som ada kola, stuon nomba siks a did wan red an griin stuon niem kaanieliyan, nomba sevn a did wan yelo guol stuon niem krisolait, nomba iet a did wan stuon niem beril wid bluu an griin an nof ada kola, stuon nomba nain a did tuopaz — it yelo, stuon nomba ten a did krisopries we luk laik griin apl, nomba ilevn a did jasint we miks wid red, arinj, bluu an griin, an stuon nomba twelv a wan porpl stuon niem amatis.

²³ Di twelv giet dem a twelv porl, so wan giet mek outa wan porl. An di mien ruod iina di siti di mek outa di bes kain-a guol. An di wie ou di guol did so gud, it komiin laik lait did a shain chuu it jos laik ou lait shain chuu glaas.

²⁴ Mi neehn si Gad ous iina di siti, kaaz di Laad Gad we nobadi no powaful laik an di Biebi Shiip, a dem a Gad ous.

²⁵ Di siti no niid di son ar di muun fi lait it op, kaaz Gad brait brait lait, lait it op, an di Biebi Shiip a di lamp fi di siti.

²⁶ Di piipl dem fram aal a di konchri dem iina di worl a-go liv iina di lait we a shain fram di siti, an di king dem we ruul di worl a-go kyari aal a di sitn dem we mek dem rich go iina di siti.

²⁷ Di giet fi di siti neva lak a die taim (an dem no av no nait de).