Read Jamaican Patois Revilieshan 22 Bible Online

Revilieshan 22 - Jamaican Patois bible

Revilieshan 22

¹ Notn we no kliin, nobadi we du wikid an torbl naasinis, an nobadi we tel lai kyan go iina di siti. Onggl di piipl dem uufa niem rait dong iina di buk we di Biebi Shiip av kyan go iin de.

²A iina da buk de Gad rait dong di niem a di piipl dem we a-go liv fi eva an eva.

³ Den di ienjel shuo mi di riva wid di waata we gi laif. Di waata did a kom fram Gad an di Biebi Shiip chuon. Di waata did so klier it luk laik kristal.

⁴ Di waata did a ron dong di migl a di siti mien ruod. Pan di tuu saida di riva, di chrii we gi laif did a gruo. Di chrii bier fruut twelv taim fi di ier — wan taim fi evri mont a di ier. Di piipl iina di worl yuuz di liif dem fi mek dem beta wen dem sik.

⁵ Notn ar nobadi we Gad no tek iin kyaahn go iina di siti. Gad an di Biebi Shiip chuon a-go iina di siti an Gad piipl a-go worship im.

⁶ Dem a-go si Gad fies tu fies, an im niem a-go rait pan dem farid.

⁷ No muo nait naa go kom iina di siti, so Gad piipl dem naa go niid no lamp lait ar no son lait, kaaz di Laad Gad brait brait lait a-go lait op di siti. An Gad piipl a-go ruul fi eva an eva.

⁸ Di ienjel tel mi se, “Aal a dem sitn ya we mi a tel yu chuu an evribadi kyan biliiv dem. Di Laad, di Gad we gi’im Spirit tu im prafit dem fi priich im wod, sen im ienjel kom shuo im sorvant di sitn dem we suun apm.”

⁹ Jiizas se, “Lisn, aal a unu, mi suun kom! Unu si enibadi we du aal we rait dong iina da buk ya bout wa a-go apm nou an wa a-go apm lieta, a dem wel api.”

¹⁰ A mi, Jan, we ier an rait dong dem sitn ya. An wen mi did ier an si dem sitn de, mi fling dong miself a di ienjel fut we did a shuo mi di sitn dem. Mi did bout fi worship im,

¹¹ bot di ienjel se tu mi se, “Nuo, no du dat! Mi a wan sorvant jos laik yu an yu breda — di prafit dem, an aal uu du we rait dong iina da buk ya. A Gad yu fi worship!

¹² “Di sitn dem we bout fi apm nou, an di sitn dem we a-go apm lieta we rait dong iina da buk ya, no aid dem fram piipl, kaaz di taim suun kom fi aal a dem apm.

¹³ So, di piipl dem we a du rang mos gwaan du rang. Di piipl dem we a du aal kain-a naasinis mos gwaan du dem naasinis. Di piipl dem we a liv rait mos gwaan liv rait, an di piipl dem we a kip demself kliin mos gwaan kip demself kliin.

¹⁴ “Lisn, aal a unu, mi suun kom! An wen mi kom mi a-go ponish di piipl dem we du rang, an mi a-go gi di piipl dem we a liv rait wa mi did se mi wuda gi dem. Evribadi a-go get wa dem fi get bies pan wa dem du.

¹⁵ Mi a di fos an mi a di laas — Evriting staat wid mi, an evriting don wid mi.

¹⁶ “Di wan dem we wash dem lang jakit a dem api, kaaz a dem a-go get di rait fi go iina di siti an fi iit fruut fram di chrii we gi laif.

¹⁷ Bot di piipl dem we mek demself doti wid aal kain-a naasinis kyaahn go iina di siti: piipl we wok uobiya, du aal kain-a seks sin, kil piipl, worship faalz gad, an piipl we lov fi tel lai, non a dem kyaahn go iina di siti.

¹⁸ “A mi, Jiizas, sen mi ienjel kom tel yu dem sitn ya fi tel di choch dem. Mi a di wan we kom fram King Dievid fambili — Mi a di wan we komiin laik di brait staar we shain wen di son a kom op a maanin taim.”

¹⁹ Di Spirit an di braid se, “Kom Laad Jiizas!” An aal uu ier wa de iina da buk ya, se, “Kom Laad Jiizas!” Aal uufa chuot jrai an we waahn waata fi jringk, kom kom tek di frii waata we gi laif.

²⁰ Mi a waan enibadi we ier di sitn dem we rait dong iina da buk ya bout wa a-go apm. Mi a waan unu, ef nobadi ad notn, Gad a-go mek dem go chuu di sevn torbl sitn dem we rait dong iina da buk ya.

²¹ An ef enibadi tek we eni paat a di mesij we iina da buk ya bout we Gad se a-go apm, Gad a-go tek we fi dem rait fi iit non a di fruut fram di chrii we gi laif an im rait fi liv iina di uoli siti, we rait dong iina da buk ya.