Read Jamaican Patois Revilieshan 3 Bible Online

Revilieshan 3 - Jamaican Patois bible

Revilieshan 3

² An im se tu mi agen se, “Rait da leta ya go gi di liida fi di choch we iina Saadis an tel im se: Di wan we av Gad Uoli Spirit an we uol di sevn staar dem se, mi nuo evriting bout unu. Piipl tingk se unu a fala mi, bot unu riili naa fala mi at aal.

³ So wiek op, an staat liv agen laik ou unu nuo Gad piipl fi liv, bifuo evriting mash op, kaaz mi fain se di wie unu a liv no mach op wid di wie fi mi Gad waahn unu fi liv.

⁴ So memba di mesij we unu did ier an biliiv; du we it se, ton we fram unu sin. Ef unu no wiek op, mi a-go kom tu unu laik wan tiif, an unu naa go nuo di taim wen mi a-go kom gens unu.

⁵ Bot unu av som piipl mongks unu iina Saadis we kip dem kluoz kliin — dem naa liv iina sin. An dem piipl de a-go jres op iina wait kluoz an waak wid mi kaaz dem liv ou Gad waahn dem fi liv.

⁶ Enibadi we no gi iin tu di sitn dem we di devl waahn dem fi du, dem a-go get jres op iina wait kluoz tu. Mi naa go kraas out dem niem outa di buk we Gad rait dong di niem a di piipl dem we a-go get fi liv fi eva, bot wen mi tan op infronta mi Faada an im ienjel dem, mi wi se dat dem a fi mi falara.

⁷ Aal a uu kyan ier beta lisn gud we di Uoli Spirit a se tu di choch dem.”

⁸ Im se tu mi agen se, “Rait da leta ya go gi di liida fi di choch we iina Filidelfiya an tel im se: Da mesij ya a kom fram di wan we uoli an we aalwiez du we Gad waahn im fi du. A im av King Dievid kii we shuo se im av di powa fi ruul. Wa im uopm nobadi kyaahn shot, an wa im shot nobadi kyaahn uopm.

⁹ Mi nuo evriting bout unu. (Luk ya, mi uopm wan duor infronta unu we nobadi kyaahn shot). Mi nuo se unu no chrang, bot unu stil eng aan pan mi wod an unu neva ton unu bak pan mi an se unu no biliiv mi.

¹⁰ Lisn! A gweehn mek di laiyad piipl dem we bilang tu Sietan choch, we se dem a Juu wen dem a no no Juu — a gweehn mek dem kom lidong a unu fut wid dem fies a grong an mek dem andastan se mi lov unu.

¹¹ Kaaz mi tel unu fi tan op chrang an no gi op wen chobl tek unu, an unu dwi’it, mi a-go kip unu sief iina da taim de wen torbl kraasiz an sofarieshan a-go kom pan di uol worl fi tes aal uu liv pan di ort.

¹² Mi suun kom so eng aan pan we unu av so dat nobadi kyaahn tek we unu kroun.

¹³ Evri wan a unu we biit di devl an no gi iin tu di sitn dem we im waahn unu fi du, mi a-go mek unu komiin laka wan impuotant kalom iina fi mi Gad ous, an unu naa go lef, unu a-go tan de fi eva an eva. An mi a-go rait fi mi Gad niem pan im, an mi a-go rait pan im Nyuu Jeruusilem, we a fi mi Gad siti niem. Da siti de kom fram Gad an a-go kom dong fram evn. An mi a-go rait dong fi mi nyuu niem pan im tu.

¹⁴ Aal uu av iez beta lisn we di Uoli Spirit a se tu di choch dem.”

¹⁵ An den im se, “Rait da leta ya go gi di liida fi di choch we iina Leyodiisiya an tel im se: Da mesij ya a kom fram di wan we niem di Iemen, di wan we aalwiez shuo wi di chuut bout Gad, an a im Gad yuuz fi mek evriting.

¹⁶ Mi nuo evriting bout unu. Mi nuo se unu no kuol an unu no at. Mi wish unu did koul ar at.

¹⁷ Bot unu si laik ou unu jos waam — an unu no kuol an unu no at — mi out fi pit unu outa mi mout rait ya nou.

¹⁸ Unu se, ‘Mi rich; mi av uol iip a moni an evriting mi waahn.’ Bot yu no si ou yu mash op an tan bad, an pap dong laik oul shuuz bak, an puor, an blain an na’av aan no kluoz?

¹⁹ Dis a wa mi tingk unu shuda du, bai guol fram mi, guol we bon iina faiya fi get out aal wa no fi iina it. Ef unu bai da guol de, unu wuda riili get rich. Bai wait kluoz fram mi so unu kyan kova op unuself. Da wie de unu na’afi shiem kaaz unu na’av aan no kluoz. An bai yai jrap fram mi tu fi jrap iina unu yai dem so unu kyan si.

²⁰ Di piipl we mi lov, mi taak tu dem aad an chrietn dem out an mek dem nuo se we dem a du rang. So get siiros an ton we fram unu sin dem an shuo se unu sari.

²¹ Lisn mi! Mi tan op rait a di duor an a nak. Ef enibadi ier mi a kaal an uopm di duor, mi wi kom iina im ous an mi an im wi nyam an jringk tugeda.

²² Enibadi we biit di devl an no gi iin tu di sitn dem we im waahn dem fi du, mi a-go gi im di rait fi sidong saida mi, pan mi chuon, siem laik ou mi did biit di devl an no gi iin tu di sitn dem we im did waahn mi fi du, an sidong saida mi Faada pan fi’im chuon.