Read Jamaican Patois Revilieshan 5 Bible Online

Revilieshan 5 - Jamaican Patois bible

Revilieshan 5

² Wen mi luk agen, di wan we sidong pan di chuon av wan ruol op buk iina im rait an tai op tait wid sevn chring. Di tu saida di buk av sitn rait pan dem.

³ An mi si wan powaful ienjel a shout out iina wan loud vais se, “Uu gud inof fi kot di chring dem an uopm di ruol op buk?”

⁴ Bot nobadi iina evn, nobadi pan ort ar nobadi anda di ort kuda uopm di ruol op buk ar iivn luk iina it.

⁵ So mi staat wan piis a baalin kaaz dem kudn fain nobadi we gud inof fi uopm di buk ar iivn luk iina it.

⁶ Den wan a di elda dem se tu mi se, “No bada baal! Luk, di wan we dem kaal di Laiyan we kom fram Juuda Chraib, di powaful wan we kom fram Dievid fambili, im biit di enimi an im no gi iin tu di sitn dem we di enimi waahn im fi du. Im av di powa fi uopm di ruol op buk an fi luus di sevn chring dem we tai it op.”

⁷ Den mi luk an si wan Biebi Shiip we luk laik dem did kil im bot im kom bak alaiv. Mi si im tan op nier di chuon, an di fuo laiv sitn dem an di elda dem tan op roun im. Im av sevn aan an sevn yai we a Gad Uoli Spirit we im sen aal bout di ort.

⁸ Di Biebi Shiip kom an tek di ruol op buk outa di rait an a di wan we did a sidong pan di chuon.

⁹ Afta im tek it, di fuo laiv sitn dem an di twenti-fuo elda dem fling dong demself infronta di Biebi Shiip. Evri wan a dem did av wan aap an wan guol boul ful-a som spais we dem bon we sumel swiit. Da spais de a riili di prieya a Gad piipl dem.

¹⁰ An dem sing wan nyuu sang: “Yu gud inof fi tek di ruol op buk an fi bos aaf di chring dem, kaaz yu did get kil. An yu tek yu blod bai piipl fi Gad fram evri chraib an langwij an piipl an konchri.

¹¹ An yu ton dem iina wan kindom we ful-a priis fi sorv wi Gad, an dem a-go ruul pan di ort.”

¹² Den mi luk an ier di vais a wan uol iip a ienjel. An ef yu fi ad dem op bout touzn an touzn an touzn — yu kyaahn kount dem. Dem gyada roun di chuon an roun di sitn dem an di elda dem.

¹³ An di uol a dem sing da sang ya iina wan loud vais: “Di Biebi Shiip gud inof fi get nof ana an rispek, kaaz dem did kil im. Im gud inof fi get priez kaaz im wel powaful an im wel rich an wel waiz an im wel chrang. An im gud inof fi get ana an rispek fram evriting we im mek!”

¹⁴ Den mi ier evriting iina evn an evriting pan di ort an evriting we anda di ort an we iina di sii sing da sang ya: “Wi gi priez an ana an powa tu di wan we sidong pan di chuon an wi priez di Biebi Shiip tu. Wi priez dem fi eva an eva!”