Read Jamaican Patois Revilieshan 6 Bible Online

Revilieshan 6 - Jamaican Patois bible

Revilieshan 6

² Mi wach di Biebi Shiip brok di sevn chring dem wan wan. Wen im brok di fos chring, mi ier wan a di fuo sitn dem se iina wan vais we soun laik tonda, “Kum ya!”

³ Wen mi luk mi si, wan wait aas tan op infronta mi! Di man we did a raid di wait aas did av wan buo an aro iina im an, an im did get wan kroun. An im raid outa evn go a ort laik wan suoja we fait an biit op im enimi dem aredi an a go biit dem op agen.

⁴ Wen di Biebi Shiip brok di sekan chring, mi ier di sekan sitn se, “Kum!”

⁵ Den mi si wan sekan aas kom out, red laik faiya. Di sumadi we did a raid im did get powa fi mek di piipl dem pan ort ton gens dem wan aneda an kil aaf dem wan aneda iina waar. Im did get wan big suod tu.

⁶ Wen di Biebi Shiip brok di tord chring, mi ier di tord sitn se, “Kum!” Wen mi luk mi si wan blak aas! Di wan we sidong pan it av wan skiel iina im an.

⁷ Den mi ier sopm laik wan vais mongks di fuo sitn dem a se, “Wan poun a biekin flowa a-go kaas wan uol die pie, an siks poun a kounta flowa a-go kaas wan uol die pie, bot no faas wid di ail an di wain!”

⁸ Wen di Biebi Shiip brok di fuot chring, mi ier di vais a di fuot sitn se, “Kum!”

⁹ Wen mi luk, mi si wan aas we av wan yelo-griin kola! Di wan we did a raid di aas niem det, an di wan we niem, di Plies we Ded Piipl Go did a fala rait baka im. Di tuu a dem did get powa fi yuuz suod, staavieshan, siknis, an wail wail animal fi kil aaf kwaata a di piipl dem pan ort.

¹⁰ Wen im brok di fif chring, mi si anda di alta di suol a di piipl dem we did get kil kaaz dem biliiv Gad wod an kaaz dem tel piipl bout Gad.

¹¹ Di suol dem anda di alta kaal out wid wan loud vais, “Ou lang, powaful Laad, yu we uoli an we aalwiez du we Gad waahn yu fi du, ou lang yu a-go wiet fi joj an ponish di piipl dem pan ort we kil wi aaf?

¹² Den evri wan a dem get wan lang wait jakit we kech dem klier dong a dem fut, an sumadi tel dem se dem fi wiet likl langga til di res a Gad piipl dem we fi get kil laik dem, get kil.

¹³ Den mi si wen di Biebi Shiip brok di siks chring an wan torbl ortkwiek apm. Di son tap shain an di uol plies ton blak blak laik wen nait wel daak, an di muun ton red laik blod,

¹⁴ an di staar dem we iina di skai jrap a grong laik wen griin fruut jrap aafa chrii wen chrang briiz a bluo.

¹⁵ Di skai ruol op laik wan ruol op buk an disapier. An evri mountn an konchri tombl dong outa dem plies.

¹⁶ Den di king dem pan ort, di impuotant piipl dem, di aami liida dem, rich piipl, evribadi, weda dem a sliev ar dem frii, ron go aid iina kiev an baka di mountn rak dem.

¹⁷ Dem baal out an beg di mountn an di rak dem fi: “Jrap pan wi an aid wi fram di wan we sidong pan di chuon, an fram di Biebi Shiip so dat im kyaahn fain wi fi ponish wi.