Read Jamaican Patois Revilieshan 7 Bible Online

Revilieshan 7 - Jamaican Patois bible

Revilieshan 7

² Afta dat mi si fuo ienjel tan op a di fuo kaana a di ort. Dem did a tap di fuo briiz dem we bluo pan di ort fram bluo pan di lan ar pan di sii ar pan di chrii dem.

³ Den mi si wan neda ienjel kom fram di iis. Iina im an, im did av wan stamp we did bilang tu Gad we liv fi eva an eva. Im kaal out iina wan loud vais tu di fuo ienjel dem we get powa fi mash op di lan an di sii:

⁴ “No chobl di lan ar di sii ar di chrii dem til wi put wan maak iina di piipl dem farid we bilang tu fi wi Gad.”

⁵ Den mi ier umoch piipl a-go get di maak. A wan onjrid an faati-fuo touzn piipl fram di twelv chraib dem we mek op Izrel.

⁶ Fram Juuda chraib, twelv touzn, fram Ruuben chraib twelv touzn, fram Gad chraib twelv touzn.

⁷ A twelv touzn fram Asha chraib, twelv touzn fram Naftali chraib, twelv touzn, fram Manase chraib.

⁸ Fram Simiyan chraib twelv touzn, fram Liivai chraib twelv touzn, fram Isakyar chraib twelv touzn.

⁹ A twelv touzn fram Zebyulan chraib, twelv touzn fram Juozif chraib, an fram Benjamin chraib twelv touzn. Aal a dem piipl de get di maak.

¹⁰ Afta dat mi si wan big kroud a piipl tan op infronta mi, dem did so nof dat nobadi kudn kount dem. Dem kom fram evri konchri, chraib, an piipl we chat aal kain-a langwij. Dem kom tan op infronta di chuon an infronta di Biebi Shiip. Dem did av aan wait jakit we kech dem klier dong a dem fut, an dem did av paam liif iina dem an.

¹¹ An dem baal out iina wan loud loud vais an se: “A fi wi Gad we sidong pan im chuon an di Biebi Shiip siev wi.”

¹² Aal a di ienjel dem faam wan sorkl roun di chuon, di elda dem, an di fuo sitn dem. Dem fling dong demself infronta di chuon, put dem fies a grong an worship Gad

¹³ an se: “Iemen! Wi Gad, wi gi yu priez an ana an rispek. Yu waiz, an powaful an chrang an wi aalwiez gi yu tangks fi eva an eva. Iemen!”

¹⁴ Den wan a di elda dem aks mi, “Dem piipl ya we av aan lang wait jakit — a uu dem bi, an we dem kom fram?”

¹⁵ Mi ansa im se, “Sa, yu nuo di ansa.” Den im se, “Yu si dem piipl ya, dem a di wan dem we go chuu di torbl torbl sofarieshan. Dem wash dem kluoz wait wait iina di Biebi Shiip blod.

¹⁶ Siek-a dat “dem tan op infronta Gad chuon nou an a sorv im die an nait iina im ous. An di wan we sidong pan di chuon a-go liv wid dem an protek dem.

¹⁷ Dem naa go get onggri no muo an dem chuot naa go jrai no muo. Di at son naa go bon dem, ar no iit naa go skaach dem op.