Read Jamaican Patois Revilieshan 8 Bible Online

Revilieshan 8 - Jamaican Patois bible

Revilieshan 8

² Wen di Biebi Shiip brok chring nomba sevn, yu kudn ier a soun iina evn fi bout aaf owa siek-a ou di plies kwaiyat.

³ Wen mi luk mi si sevn ienjel we tan op infronta Gad an sumadi did gi dem sevn chompit.

⁴ Den mi si wan neda ienjel wid wan guol pan iina im an we av wan anggl. Im kom tan op infronta di alta an sumadi gi im wan uol iip a swiit spais fi bon mek sakrifais. Im did fi put it wid Gad piipl dem prieya an bon it pan di guol alta we de infronta di chuon.

⁵ Di sumuok fram di spais we dem bon, miks op wid Gad piipl dem prieya, go op tu Gad fram di ienjel an.

⁶ Den di ienjel tek di guol pan we uol di swiit spais we dem bon, ful it op wid faiya fram di alta, an fling it pan di ort. An som torbl tonda ruol, an laitnin flash, an di ort shiek op.

⁷ Afta dat, di sevn ienjel dem we av di sevn chompit dem get redi fi bluo dem.

⁸ Di fos ienjel bluo im chompit, an iel an faiya miks op wid blod get fling dong fram di skai pan di ort an wan outa di chrii paat a di ort get bon op. Wan outa evri chrii a di chrii dem we did a gruo an aal a di griin graas get bon op tu.

⁹ Wen di sekan ienjel bluo fi im chompit, sitn laik wan big mountn we kech a faiya get fling dong iina di sii. An ef yu plit op di sii iina chrii paat, wan outa di chrii paat dem did ton iina blod.

¹⁰ An wan outa evri chrii sitn we did liv iina di sii ded aaf, an wan outa evri chrii ship we did de pan di sii get mash op.

¹¹ Wen di tord ienjel bluo fi im chompit, wan big staar we did a bon laik faiya jrap fram di skai. An ef yu plit op di riva waata dem an di spring waata dem iina chrii paat, di staar did jrap pan wan paat a dem.

¹² Di staar did niem wormwud. So wan outa chrii paat a di waata did ton bita. So it did kil aaf uol iip a piipl we did jringk it.

¹³ Wen di fuot ienjel bluo fi im chompit, sitn lik di son, an di muun an di staar dem. An ef yu plit dem op iina chrii paat, wan paat a dem ton daak. An ef yu plit op di die an di nait dem iina chrii paat, wan paat a dem neehn av no lait.