Read Jamaican Patois Revilieshan 9 Bible Online

Revilieshan 9 - Jamaican Patois bible

Revilieshan 9

² Wen di fif ienjel bluo im chompit, mi si wan staar we did jrap pan di ort. Sumadi gi di staar di kii fi di tonel we liid tu di diip diip pit we no av no batam.

³ Wen im uopm di tonel we liid go dong a di pit, sumuok kom op fram di pit laik sumuok we kom fram wan big faiya-said. Di sumuok we kom outa di tonel did so blak an tik dat it blak out di son lait an daak op di skai.

⁴ Den som sitn we luk laik graasapa kom outa di sumuok pan di ort. An dem get powa fi bait laik wen skaapiyan bait piipl.

⁵ Gad gi dem powa fi bait piipl an aada dem se dem onggl fi mek di wan dem we no av fi im maak iina dem farid sofa. Bot dem no fi chobl di graas, ar di griin plaant, ar non a di chrii dem pan di ort.

⁶ Dem neva get powa fi kil di piipl dem niida. Dem onggl did fi mek dem sofa fi faiv mont. An di pien we dem sofa komiin laik wen skaapiyan bait sumadi.

⁷ Fi di faiv mont di piipl gweehn du evriting fi kil demself. Bot no mata we dem du dem naa go ded.

⁸ Di graasapa dem luk laik aas we redi fi go a waar. Dem av aan sitn we luk laik guol kroun pan dem ed an dem fies luk laik man fies.

⁹ Dem ier luk laik uman ier, an dem tiit komiin laik laiyan tiit.

¹⁰ Di graasapa dem did av aan sitn we luk laik di aiyan jakit we suoja wier fi protek demself. An dem wing soun laik di naiz fram wan uol iip a aas an kyaat wid suoja a gyalop go a waar.

¹¹ Dem av tiel an dem av sting, laik we skaapiyan av. An dem av powa iina dem tiel fi mek piipl sofa fi faiv mont.

¹² Dem did av wan king. A im a di ienjel fi di pit. Iina di Iibruu langwij, im niem Abadan. An iina di Griik langwij im niem Apaliyan.

¹³ Dat a di fos set a sofarieshan dem did afi go chuu. Dem av tuu muor fi kom.

¹⁴ Wen ienjel nomba siks bluo fi im chompit, mi ier wan vais a kom fram di aan we de pan di guol alta we de infronta Gad.

¹⁵ Di vais se tu da ienjel de, “Luus di fuo ienjel dem we tai op a di big big riva Yuufrietiiz.”

¹⁶ So di ienjel luus di fuo ienjel dem we did de de redi fi da siem owa, da siem die, da siem mont an da siem ier ya. Fi dem jab a fi kil wan outa evri chrii sumadi we pan di ort.

¹⁷ An sumadi tel mi di nomba a suoja we did a raid waar aas. A did tuu onjrid miliyan a dem.

¹⁸ Di aas an di raida dem we mi si iina mi vijan, a so dem luk: dem av aan sitn laik aiyan jakit we suoja wier fi protek demself. Dem kola red laik faiya, an daak bluu, an yelo laik solfa. Dem ed luk laik laiyan ed, an faiya, sumuok, an solfa did a kom outa dem mout.

¹⁹ Di faiya, sumuok, an solfa we kom outa di aas dem mout kil aaf wan outa evri chrii sumadi pan di ort.

²⁰ An di aas dem powa did iina dem mout an iina dem tiel. An dem tiel komiin laik siniek wid ed we dem yuuz fi bait piipl.

²¹ Di res a di piipl dem we neva get kil fram di faiya, di sumuok, ar di solfa, stil neva ton we fram dem wikidnis. Dem neva tap worship diiman, an faalz gad we mek outa guol, silva, branz, stuon, an wud — faalz gad we kyaahn si ar ier ar waak.