Read Jarai Čơdơ̆ng Phŭn 25 Bible Online

Čơdơ̆ng Phŭn 25 - Jarai bible

Čơdơ̆ng Phŭn 25

¹Abraham dŏ bơnai dơ̆ng, anăn gơ̆ jing HʼKeturah.

²Ñu tơkeng rai kơ Abraham jing Zimran, Yoksan, Mêdan, Midyan, Isbak laih anŭn Suah.

³Yoksan jing ama kơ Seba laih anŭn Dedan; ƀing kơnung djuai Dedan jing ƀing Assur, ƀing Letus laih anŭn ƀing Leum.

⁴Ƀing ană Midyan jing Êphah, Êpher, Hanôk, Abida laih anŭn Elđaah. Abih bang ƀing anŭn jing ƀing kơnung djuai tơbiă rai mơ̆ng HʼKeturah yơh.

⁵Abraham jao abih bang gơnam ñu hơmâo kơ Isa̱k.

⁶Samơ̆ tơdang ñu hlak dŏ hơdip, ñu pơpha gơnam kơ ƀing ană đah rơkơi bơnai hle̱ ñu laih anŭn brơi ƀing gơñu đuaĭ ataih hĭ mơ̆ng ană ñu Isa̱k gah ngŏ̱ kơ anih lŏn anŭn.

⁷Hrŏm abih bang, Abraham hơdip sui truh kơ sa-rơtuh tơjuhpluh-rơma[122] thŭn.

⁸Giŏng anŭn, Abraham suă jua hơnăl tuč hăng tơĭ pran rơnŭk rơnua amăng thŭn tha ñu laih anŭn ñu wơ̆t glaĭ hrŏm hăng ƀing ơi adon ñu yơh.

⁹Ƀing ană ñu Isa̱k hăng Yismaêl dơ̱r atâo ñu amăng pa̱r pơsat Makpêlah jĕ anih Mamre, jing amăng đang hơma Êphrôn ană Zôhar ƀing Hit anŭn.

¹⁰Anŭn jing hơma Abraham blơi laih mơ̆ng ƀing Hit; pơ anŭn yơh, ƀing gơñu dơ̱r atâo Abraham hrŏm hăng atâo bơnai gơ̆ HʼSarah.[123]

¹¹Tơdơi kơ Abraham djai laih, Ơi Adai bơni hiam kơ ană ñu Isa̱k laih anŭn ñu dŏ hơdip jĕ anih Beêr Lahai Roi.

¹²Anai yơh jing hră čih pioh ƀing kơnung djuai ană Yismaêl, jing ană Abraham; Yismaêl jing ană đah rơkơi HʼHagar, hlŭn HʼSarah mơ̆ng čar Êjip, hơmâo tơkeng rai kơ Abraham.

¹³Anai jing khul anăn ƀing ană đah rơkơi Yismaêl, hơmâo čih pioh tŏ tơroai tui hăng tơlơi tơkeng rai ƀing gơñu: Nebayôt jing ană kơčoa ñu, Kêdar, Adbeel, Mibsam,

¹⁴Misma, Dumah, Massa,

¹⁵Hadad, Têma, Yetur, Naphis laih anŭn Khêdemah.

¹⁶Anai jing khul anăn ƀing ană đah rơkơi Yismaêl, laih anŭn anai ăt jing anăn pluh-dua čô khua ba akŏ tui hăng anih tring gơñu dŏ laih anŭn hơdip mơ̆n.

¹⁷Hrŏm abih bang, Yismaêl hơdip truh kơ sa-rơtuh klâopluh-tơjuh[124] thŭn. Ñu suă jua hơnăl tuč laih anŭn tơĭ pran, tui anŭn ñu wơ̆t glaĭ pơ ƀing ơi adon ñu.

¹⁸Kơnung djuai ñu dŏ amăng anih tring mơ̆ng Hawilah truh kơ Sur, jĕ guai čar Êjip, kơtuai jơlan rơbat anăp nao pơ Assur. Laih anŭn ƀing gơñu hơdip pơkơdơ̆ng glaĭ hăng abih bang ƀing adơi ai gơñu.

¹⁹Anai jing hră ruai kơ ană Abraham Isa̱k. Abraham jing ama Isa̱k,

²⁰laih anŭn Isa̱k hlak pă̱pluh thŭn tơdang ñu dŏ kơ HʼRebekah, jing ană đah kơmơi Bethuêl, ƀing Aram mơ̆ng anih Paddan, laih anŭn HʼRebekah ăt jing adơi Laban mơ̆n.

²¹Isa̱k iâu laĭ Yahweh kiăng kơ pơhla̱o hĭ bơnai ñu, yuakơ gơ̆ jing sa čô đah kơmơi plao. Yahweh laĭ glaĭ tơlơi ñu iâu laĭ, tui anŭn bơnai ñu HʼRebekah pi kian yơh.

²²Ƀing ană nge amăng lăm kian HʼRebekah pơtơlư̆ tơdruă gơñu laih anŭn ñu pơmĭn amăng pran jua ñu tui anai, “Yua hơget tơlơi anai hơmâo truh kơ kâo lĕ?” Tui anŭn, ñu nao tơña Yahweh.

²³Yahweh laĭ glaĭ kơ ñu, Ơi adon kơ dua boh lŏn čar hlak dŏ amăng kian ih, laih anŭn dua kơnung djuai mơ̆ng amăng lăm ih či hơmâo tơlơi pơčơlah; kơnung djuai anai či kơtang hloh kơ kơnung djuai adih, laih anŭn ayŏng ñu či mă bruă kơ adơi ñu.[125]

²⁴Tơdang mông đih apui ñu truh laih, hơmâo dua čô ană đah rơkơi amăng kian ñu.

²⁵Pô blung hlâo tơbiă rai mriah, abih drơi jan ñu kar hăng sum ao blâo; tui anŭn ƀing gơñu pơanăn gơ̆ Esâo.

²⁶Tơdơi kơ anai, adơi ñu tơbiă rai, tơngan ñu djă̱ ƀơi kơđŭl tơkai ayŏng ñu; laih anŭn ƀing gơñu pơanăn gơ̆ Yakôb. Hlak Isa̱k nămpluh thŭn tơdang HʼRebekah hơmâo rai ană kơmar anŭn.

²⁷Ƀing čơđai anŭn prŏng đĭ, laih anŭn Esâo jing pô hyu lua rơgơi, jing mơnuih khăp hơdip ƀơi tơdron tač, tơdang anŭn Yakôb jing sa čô mơnuih rơiăt kre̱p, khăp mă bruă dŏ dơnơ̆ng sa anih đôč.

²⁸Isa̱k jing mơnuih khăp ƀơ̆ng añăm hlô mơnơ̆ng glai, tui anŭn ñu khăp kơ Esâo, samơ̆ HʼRebekah khăp kơ Yakôb.

²⁹Hơmâo sa wơ̆t tơdang Yakôb hlak hơtŭk añăm, Esâo glaĭ mơ̆ng tơdron tač hăng gleh rơmơ̆n biă mă.

³⁰Ñu laĭ kơ Yakôb, “Tañ bĕ, brơi kâo ƀơ̆ng añăm mriah ih anŭn bĕ! Kâo hlak rơpa đơi!” Yuakơ anŭn yơh arăng iâu kơ ñu Edôm.

³¹Yakôb laĭ glaĭ, “Blung hlâo sĭ hĭ bĕ kơ kâo tơlơi jing ayŏng tha ih.”

³²Esâo laĭ, “Anai nê, kâo jĕ či djai laih, hơget hiam kơ kâo jing ayŏng tha lĕ?”

³³Samơ̆ Yakôb laĭ, “Ƀuăn rơ̆ng hăng kâo amơĭ hlâo.” Tui anŭn, ñu ƀuăn rơ̆ng hăng Yakôb hăng sĭ hĭ tơlơi jing ayŏng tha ñu kơ Yakôb.[126]

³⁴Giŏng anŭn, Yakôb brơi kơ Esâo ƀañ tơpŭng laih anŭn añăm jĕh rơtă̱ anŭn. Ñu ƀơ̆ng mơñum laih anŭn ñu tơbiă đuaĭ hĭ. Tui anŭn yơh, Esâo hơmâo djik djak hĭ laih kơ tơlơi ñu jing ayŏng tha.