Read Jarai Čơdơ̆ng Phŭn 40 Bible Online

Čơdơ̆ng Phŭn 40 - Jarai bible

Čơdơ̆ng Phŭn 40

¹Tơdơi ƀiă kơ anŭn, pô yŏng kơčŏk hăng pô ŏm ƀañ tơpŭng kơ Pharaoh pơtao ƀing Êjip ƀu pơmơak kơ khua gơñu ôh.

²Tui anŭn, Pharaoh hil biă mă kơ dua čô khua moa anai, jing pô khua yŏng kơčŏk laih anŭn pô khua ŏm ƀañ tơpŭng,

³laih anŭn ñu iâu rai pô khua wai lăng sang mơnă hăng jao krư̆ hĭ dua čô anai amăng sang mơnă khua ƀing gak, jing anih hrŏm hăng anih Yôsêp dŏ.

⁴Khua ƀing gak jao dua čô anai kơ Yôsêp kiăng kơ mă bruă djru brơi ƀing gơñu laih anŭn ƀing gơñu dŏ amăng sang krư̆ sui ƀiă.

⁵Hơmâo sa mlam, rĭm čô amăng dua gơñu, pô yŏng kơčŏk hăng pô ŏm ƀañ tơpŭng kơ pơtao Êjip, jing ƀing hlak dŏ amăng sang mơnă, hơmâo sa tơlơi rơpơi hrŏm amăng mlam anŭn laih anŭn rĭm tơlơi rơpơi hơmâo tơlơi kiăng laĭ phara.

⁶Tơdang Yôsêp rai pơ ƀing gơñu amăng mơguah ưm hrơi tŏ tui, ñu hli̱ng hla̱ng yơh tơdang ƀuh ƀing gơ̆ rŭng răng.

⁷Tui anŭn, ñu tơña kơ ƀing gơ̆ jing ƀing dŏ amăng sang krư̆ khua ƀing gak ñu, “Yua hơget hrơi anai ƀô̆ mơta gih rơngot lĕ?”

⁸Ƀing gơñu laĭ glaĭ tui anai, “Dua gơmơi hơmâo khul tơlơi rơpơi, samơ̆ pơ anih anai ƀu hơmâo hlơi pô ôh dưi pơblang gơñu.” Giŏng anŭn, Yôsêp laĭ kơ ƀing gơñu tui anai, “Ruai kơ kâo bĕ khul tơlơi rơpơi gih anŭn yuakơ tơlơi pơblang kơ tơlơi rơpơi jing lŏm kơ Ơi Adai yơh.”

⁹Tui anŭn, pô khua yŏng kơčŏk ră ruai tơlơi rơpơi ñu kơ Yôsêp. Ñu laĭ kơ Yôsêp, “Amăng tơlơi rơpơi kâo, kâo ƀuh sa phŭn hrĕ ƀơi anăp kâo,

¹⁰laih anŭn ƀơi ngŏ phŭn hrĕ anŭn hơmâo klâo than. Tơdang ñu čơnŭh đĭ, bluh bơnga laih anŭn bơnga anŭn blĭp blăp jing hĭ boh kơƀâo.

¹¹Kâo hlak djă̱ kơčŏk Pharaoh ƀơi tơngan kâo tui anŭn kâo mă boh kơƀâo anŭn, djet gơñu amăng kơčŏk Pharaoh hăng yơr đĭ ƀơi tơngan ñu kiăng kơ mơñum.”

¹²Yôsêp laĭ kơ ñu, “Anai jing tơlơi kiăng laĭ, klâo ƀĕ than jing klâo hrơi.

¹³Amăng klâo hrơi dơ̆ng, Pharaoh či pŭ̱ đĭ ih mơ̆ng sang mơnă anai hăng pioh ih glaĭ pơ anih ih hlâo adih, laih anŭn ih či yơr đĭ kơčŏk ƀơi tơngan Pharaoh dơ̆ng hrup hăng ih hơmâo ngă laih hlâo adih tơdang ih jing pô yŏng kơčŏk kơ ñu.

¹⁴Samơ̆ tơdang abih bang tơlơi hơmâo truh hiam laih kơ ih, hơdơr kơ kâo đa hăng pơrơđah kơ kâo tơlơi hiam klă; rơkâo kơ Pharaoh pơtơbiă hĭ kâo mơ̆ng anih sang mơnă anai.

¹⁵Arăng mă pơgŏ̱ kâo đuaĭ hĭ mơ̆ng anih lŏn ƀing Hêbrơ, laih anŭn wơ̆t dah pơ anai kâo ƀu hơmâo ngă tơlơi hơget ôh lăp kơ dŏ amăng jim anai.”

¹⁶Tơdang pô khua ŏm ƀañ tơpŭng ƀuh Yôsêp hơmâo brơi sa tơlơi pơblang hiam, ñu laĭ kơ Yôsêp, “Kâo ăt hơmâo tơlơi rơpơi mơ̆n: ƀơi akŏ kâo hơmâo klâo bai ƀañ tơpŭng.

¹⁷Ƀơi bai gah ngŏ kơ abih bang bai hơmâo djŏp mơta ƀañ tơpŭng kơ Pharaoh, samơ̆ khul čim rai ƀơ̆ng hĭ abih amăng bai gah ngŏ anŭn.”

¹⁸Yôsêp pơhiăp, “Anai yơh jing tơlơi kiăng laĭ, klâo boh bai jing klâo hrơi.

¹⁹Amăng klâo hrơi Pharaoh či pŭ̱ đĭ ih mơ̆ng sang mơnă anai mơ̆n laih anŭn yol hĭ tơkuai ih ƀơi kơyâo. Laih anŭn khul čim yơh či rai ƀơ̆ng hĭ drơi jan ih.”

²⁰Ƀơi hrơi tal klâo, jing hrơi tơkeng kơ Pharaoh, ñu pŏk tơlơi ƀơ̆ng huă kơ abih bang ƀing khua moa ñu. Ñu brơi arăng iâu rai ƀing khua yŏng kơčŏk hăng khua ŏm ƀañ tơpŭng ƀơi anăp abih bang ƀing tuai:

²¹ñu iâu glaĭ pô khua yŏng kơčŏk wơ̆t glaĭ pơ anih ñu hlâo adih, tui anŭn sa wơ̆t dơ̆ng ñu yơr đĭ kơčŏk ƀơi tơngan Pharaoh;

²²samơ̆ ñu yol tơkuai pô khua ŏm ƀañ tơpŭng kar hăng Yôsêp hơmâo pơrơđah laih amăng tơlơi pơblang ñu.

²³Wơ̆t tơdah tui anŭn, pô khua yŏng kơčŏk ƀu hơdơr ôh kơ Yôsêp; ñu wơr bĭt hĭ gơ̆ laih.