Read Jarai 1 Hră Ruai 11 Bible Online

1 Hră Ruai 11 - Jarai bible

1 Hră Ruai 11

¹Tơdơi kơ anŭn, abih bang ƀing Israel rai pơgop hrŏm hơbĭt hăng Dawid ƀơi plei pơnăng Hebrôn laih anŭn laĭ tui anai, Ƀing gơmơi jing drơi jan drah kơtăk ih pô yơh.

²Hlâo adih, wơ̆t tơdah Saul jing pơtao kơ ƀing gơmơi, ih yơh jing pô dui ba ƀing ling tơhan Israel tơbiă nao amăng khul tơlơi blah ngă gơñu, laih anŭn ba glaĭ hăng tơlơi dưi hĭ. Laih anŭn Yahweh Ơi Adai ih ăt laĭ laih hăng ih tui anai mơ̆n, “Ih yơh či wai lăng ƀing ană plei Kâo Israel kar hăng pô wai lăng tơpul triu, sĭt Ih či jing pô khua djă̱ akŏ gơñu yơh!”

³Tui anŭn yơh, abih bang ƀing kŏng tha Israel rai pơgop hăng pơtao Dawid ƀơi plei Hebrôn. Ƀơi plei Hebrôn anŭn, Dawid pơjing sa tơlơi pơgop hăng ƀing kŏng tha anŭn ƀơi anăp Yahweh, laih anŭn ƀing gơñu trôč ia jâo ƀơi Dawid kiăng kơ pơjing ñu jing pơtao kơ ƀing Israel kar hăng Yahweh hơmâo ƀuăn laih mơ̆ng pô pơala Ñu Samuêl.

⁴Pơtao Dawid hăng abih bang ƀing ling tơhan Israel tơbiă kơsung nao pơ plei Yerusalaim. Hlak anŭn, anăn plei anŭn jing Yebus laih anŭn amăng rơnŭk anŭn ƀing Yebus yơh hlak hơdip pơ anŭn.

⁵Ƀing Yebus anŭn laĭ kơ Dawid tui anai, “Ih ƀu thâo mŭt amăng anai ôh.” Wơ̆t tơdah ƀing gơñu laĭ tui anŭn, samơ̆ Dawid ăt blah mă hĭ kơđông kơjăp gơñu, anih Ziôn anŭn, jing anih ñu pơanăn Plei Dawid.

⁶Hlâo kơ kơsung blah plei Yebus anŭn, Dawid ăt hơmâo pơtă laih tui anai mơ̆n hăng ƀing ling tơhan ñu, “Hlơi pô blung hlâo đĭ nao pơdjai hĭ sa čô amăng ƀing Yebus, ñu anŭn či jing hĭ khua djă̱ akŏ abih bang ƀing ling tơhan kâo yơh.” Tui anŭn, yuakơ Yôab jing ană đah rơkơi HʼZeruyah[57] đĭ nao hlâo, ñu yơh mă tŭ tơlơi bơni anŭn.

⁷Tơdơi kơ Dawid blah mă hĭ anih kơđông kơjăp anŭn laih, ñu mŭt dŏ amăng anih anŭn laih anŭn pơanăn anih anŭn jing Plei Dawid.

⁸Ñu ăt pơdơ̆ng đĭ plei Yerusalaim jum dar anih anŭn čơdơ̆ng mơ̆ng anih Millô truh kơ pơnăng jum dar laih anŭn Yôab pơkra glaĭ abih anih dŏ glaĭ amăng plei anŭn jing anih aka pơkra ôh.

⁹Tơdơi kơ anŭn, Dawid ƀrư̆ hrơi ƀrư̆ kơtang tui yuakơ Yahweh Ơi Adai Dưi Kơtang dŏ hrŏm hăng ñu.

¹⁰Gah yŭ anai yơh jing ƀing khua prŏng ling tơhan khĭn kơtang Dawid. Ƀing gơñu hrŏm hơbĭt hăng abih bang ƀing Israel djru pơkơjăp kơ Dawid jing pơtao, kiăng kơ tơlơi git gai ñu pơlar djŏp amăng anih lŏn Israel kar hăng Yahweh hơmâo ƀuăn brơi laih.

¹¹Anai yơh jing khul anăn ƀing ling tơhan khĭn kơtang Dawid: Yasôbeam,[58] jing mơnuih Hakmôn, jing khua prŏng kơ klâo čô khĭn kơtang hloh.[59] Ñu yua tơbăk ñu blah pơkơdơ̆ng glaĭ hăng klâo-rơtuh[60] čô mơnuih, jing mơnuih ñu pơdjai hĭ laih amăng sa wơ̆t pơblah.

¹²Tŏ tui ñu jing Eleazar, ană đah rơkơi Dôdai jing mơnuih Ahôh. Ñu jing sa čô amăng klâo čô khĭn kơtang hloh.

¹³Hlâo adih ñu nao hrŏm hăng Dawid pơ plei Pas-Dammim tơdang ƀing ling tơhan Philistia pơƀut glaĭ tơdruă gơñu pơ anih anŭn kiăng pơblah. Anŭn jing ƀơi anih tơdron đang bă hăng pơdai kơtur laih anŭn ƀing ling tơhan Israel kơdŭn đuaĭ hĭ mơ̆ng ƀing Philistia.

¹⁴Samơ̆ gơñu dua dŏ dơ̆ng glaĭ kiăng kơ pơblah amăng tŏng krah đang anŭn. Ƀing gơñu pơgang kơ đang anŭn hăng pơrai hĭ ƀing Philistia. Tui anŭn, Yahweh brơi kơ ƀing gơñu dưi hĭ prŏng prin amăng hrơi anŭn.

¹⁵Hơmâo sa wơ̆t, klâo čô khĭn kơtang hloh amăng klâopluh čô khĭn kơtang trŭn nao bưp Dawid jĕ anih boh pơtâo prŏng ƀơi pa̱r čư̆ Adullam. Hlak anŭn, ăt hơmâo ƀing ling tơhan Philistia dŏ jưh amăng Dơnung Rephaim.

¹⁶Hlak anŭn, Dawid dŏ amăng sa anih kơđông kơjăp laih anŭn sa grup ƀing ling tơhan Philistia hlak dŏ amăng plei Bêtlehem.

¹⁷Dawid mơhao ia biă mă laih anŭn laĭ tui anai, “Sĭt hiam yơh tơdah hơmâo hlơi pô nao mă brơi kơ kâo ia mơñum mơ̆ng ia dơmŭn jĕ amăng ja̱ng plei Bêtlehem!”[61]

¹⁸Tui anŭn, klâo čô khĭn kơtang hloh anŭn mŭt nao amăng anih jưh ƀing Philistia, tuăh mă ia mơ̆ng ia dơmŭn jĕ amăng ja̱ng plei Bêtlehem laih anŭn glăm glaĭ pơ Dawid. Samơ̆ Dawid hơngah ƀu kiăng mơñum ia anŭn ôh. Kơđai glaĭ, ñu tuh hĭ ia anŭn pơyơr ƀơi anăp Yahweh.

¹⁹Ñu laĭ tui anai, “Ƀu hiam klă ƀơi anăp Yahweh ôh kơ tơlơi kâo ngă anŭn. Kâo ƀu dưi mơñum ôh ia anŭn, yuakơ ia anŭn jing kar hăng drah ƀing pơsăn tơlơi hơdip gơñu yơh kiăng kơ nao mă ia anŭn.” Tui anŭn, Dawid ƀu mơñum ôh yuakơ ƀing gơ̆ hơmâo pơsăn laih tơlơi hơdip ƀing gơ̆ kiăng kơ ba glaĭ ia mơñum anŭn. Anŭn yơh jing tơlơi pơruai pơrơđah kơ klâo čô khĭn kơtang hloh anŭn.

²⁰Abisai, adơi Yôab, jing khua prŏng kơ klâopluh čô khĭn kơtang anŭn. Ñu yua tơbăk ñu pơkơdơ̆ng glaĭ hăng pơrai hĭ klâo-rơtuh[62] čô mơnuih, tui anŭn ñu jing hĭ hing ang hrup hăng klâo čô khĭn kơtang hloh anŭn mơ̆n.

²¹Arăng pơpŭ pơyom kơ ñu prŏng hloh kơ klâopluh čô khĭn kơtang anŭn laih anŭn ñu jing hĭ khua git gai kơ ƀing klâopluh anŭn yơh, wơ̆t tơdah arăng ƀu yap ôh ñu hrŏm hăng ƀing klâo čô kơtang hloh anŭn.

²²Benayah, ană đah rơkơi Yehôyada, jing pô pơblah kơtang mơ̆ng plei Kabzeêl. Ñu ăt ngă lu tơlơi khĭn kơtang mơ̆n. Hơmâo sa wơ̆t, ñu pơdjai hĭ dua čô tơhan kơtang hloh amăng ƀing Môab. Hơmâo sa wơ̆t pơkŏn dơ̆ng ƀơi hrơi hơmâo ple̱r tơpŭng lê̆, ñu ăt trŭn mŭt amăng sa boh amăng luh laih anŭn pơdjai hĭ sa drơi rơmung dŭl amăng anŭn mơ̆n.

²³Ăt sa wơ̆t dơ̆ng, ñu pơdjai hĭ sa čô mơnuih Êjip prŏng glông tơjuh rơma haih mơ̆n. Wơ̆t tơdah pô Êjip anŭn hơmâo tơbăk amăng tơngan ñu kar hăng sa ƀĕ hơlâo prŏng, samơ̆ Benayah nao pơkơdơ̆ng glaĭ hăng ñu kơnơ̆ng hăng sa ƀĕ gai jra đôč. Ñu hơñăk[63]-mă hĭ tơbăk mơ̆ng tơngan pô Êjip anŭn laih anŭn pơdjai hĭ gơ̆ hăng tơbăk gơ̆ pô mơ̆n.

²⁴Anŭn yơh jing tơlơi pơruai pơrơđah kơ Benayah ană đah rơkơi Yehôyada. Ñu ăt jing sa čô pô hing ang kar hăng klâo čô khĭn kơtang hloh adih mơ̆n.

²⁵Arăng pơpŭ pơyom kơ ñu biă mă hloh kơ ƀing klâopluh čô adih mơ̆n, samơ̆ arăng ƀu yap ôh ñu hrŏm hăng ƀing klâo čô khĭn kơtang hloh adih. Ñu anŭn, Dawid jao kơ gơ̆ jing khua djă̱ akŏ ƀing răng wai brơi kơ Dawid pô yơh.

²⁶Ƀing klâopluh čô ling tơhan khĭn kơtang anŭn jing: Asahêl jing adơi Yôab; Elhanan jing ană đah rơkơi Dôdô mơ̆ng plei Bêtlehem;

²⁷Sammôt jing mơnuih Harôr; Halez jing mơnuih Pelôn;

²⁸Ira jing ană đah rơkơi Ikkes mơ̆ng plei Tekoa; Abiezer mơ̆ng plei Anathôt;

²⁹Sibkhai jing mơ̆ng plei Husah; Ilai[64] jing mơnuih Ahôh;

³⁰Maharai mơ̆ng plei Netôphat; Hêled jing ană đah rơkơi Baanah mơ̆ng plei Netôphat;

³¹Ithai jing ană đah rơkơi Ribai mơ̆ng plei Gibeah amăng tring Benyamin; Benayah mơ̆ng plei Pirathôn;

³²Hurai[65] mơ̆ng anih čroh ia rô mơ̆ng čư̆ Gaas; Abiêl[66] jing mơnuih Arbat;

³³Azmawet mơ̆ng plei Bahurim; Êliahba mơ̆ng anih Saalbon;

³⁴ƀing ană đah rơkơi Hasem[67] jing mơnuih Gizôn; Yônathan jing ană đah rơkơi Sagêh,[68] mơ̆ng anih Harar;

³⁵Ahiam jing ană đah rơkơi Sakhar, mơ̆ng anih Harar; Eliphal ană đah rơkơi Ur,

³⁶Hêpher mơ̆ng anih Mekhêrah; Ahiyah jing mơnuih Pelôn;

³⁷Hezrô mơ̆ng plei Karmel; Naarai jing ană đah rơkơi Ezbai;

³⁸Yôêl jing ayŏng adơi Nathan; Mibhar jing ană đah rơkơi Hagri;

³⁹Zelek mơ̆ng lŏn čar Ammôn; Naharai, mơ̆ng plei Bêrôt, jing pô glăm gơnam blah kơ Yôab ană đah rơkơi HʼZeruyah;

⁴⁰Ira jing mơnuih Ithri; Gareb jing mơnuih Yether;

⁴¹Uriah jing mơnuih Hit; Zabad jing ană đah rơkơi Ahlai;

⁴²Adina jing ană đah rơkơi Siza, mơnuih mơ̆ng kơnung djuai Reuben. Ñu yơh jing sa čô khua prŏng kơ ƀing Reuben laih anŭn ăt hơmâo klâopluh čô tơhan dơ̆ng mơ̆n hrŏm hăng ñu;

⁴³Hanan jing ană đah rơkơi Maakhah; Yôsaphat jing mơnuih Mitni;

⁴⁴Uzzia jing mơnuih Asterat; Sama hăng Yeiêl jing ƀing ană đah rơkơi Hôtham, mơnuih Arôêr;

⁴⁵Yediaêl jing ană đah rơkơi Simri; ayŏng adơi ñu jing Yôha, mơnuih Tizi;

⁴⁶Eliêl jing mơnuih Mahawơ; Yeribai hăng Yôsawiah jing ƀing ană đah rơkơi Elnaam; Itmah jing mơnuih Môab;

⁴⁷Eliêl hăng Ôbed; laih anŭn Yaasiêl jing mơnuih Mezôbai.