Read Jarai Yôb 10 Bible Online

Yôb 10 - Jarai bible

Yôb 10

¹“Kâo hrăp laih kơ tơlơi dŏ hơdip anai. Hơnŭn yơh, kâo či pơhiăp brŏk hăng arăng laih anŭn pơhiăp amăng tơlơi bơngăt kâo ruă phĭ̱ yơh.

²Kâo či pơhiăp hăng Ơi Adai tui anai: Anăm klă̱ kơđi ƀơi kâo jing mơnuih soh ôh, samơ̆ ruai bĕ kơ kâo hơget tơlơi Ih hơmâo ƀuăh pơkơdơ̆ng glaĭ laih hăng kâo.

³Tơlơi anŭn pơmơak kơ Ih hă tơl Ih kơpĭ kơpe̱t hĭ kâo, djik djak hăng lui hĭ kâo jing pô Ih pơjing, tơdang anŭn Ih kar hăng mơak hăng khul hơdră mơneč mơnuih sat ƀai?

⁴Ih hơmâo mơta kơđeh asar mơ̆? Ih ƀuh kar hăng mơnuih mơnam ƀuh mơ̆?

⁵Hiư̆m ngă, khul hrơi Ih hơdip be̱r hrup hăng khul hrơi ƀing mơnuih mơnam hă, ƀôdah khul thŭn Ih jing ƀiă kar hăng khul thŭn mơnuih hơdip hă?

⁶Yua hơget Ih khŏm ep kơsem kơ khul tơlơi soh kâo laih anŭn hơduah tơña tơlơi soh sat kâo,

⁷wơ̆t dah Ih thâo krăn kâo jing mơnuih ƀu soh, laih anŭn tơl ƀu hơmâo ôh hlơi pô pơklaih hĭ kâo mơ̆ng Ih lĕ?

⁸“Tơngan Ih yơh ma̱n bĭn đĭ kâo. Ră anai Ih či pơplih laih anŭn pơrai hĭ kâo hă?

⁹Rơkâo kơ Ih hơdơr bĕ, Ih ma̱n pơdơ̆ng đĭ kâo kar hăng lŏn kraĭ yơh. Ră anai Ih či pơplih hăng ngă kơ kâo jing hĭ ƀruih lŏn dơ̆ng hă?

¹⁰Ih tuh hĭ laih kâo kar hăng ia tơsâo mŭt pơ kian amĭ kâo, laih anŭn Ih ngă kơ kâo čơdơ̆ng prŏng tui pơ anŭn.

¹¹Ih pioh klĭ hăng asar ƀơi kâo laih anŭn djă̱ kâo hrŏm hơbĭt hăng khul tơlang hăng arăt.

¹²Ih brơi kơ kâo hơdip laih anŭn ngă hiam kơ kâo, laih anŭn Ih khăp hăng răk wai brơi kâo.

¹³“Samơ̆ anai yơh jing tơlơi Ih hlak pơkra hơgŏm, laih anŭn kâo thâo tơlơi anai jing tơlơi Ih hlak pơmĭn yơh:

¹⁴Tơdah kâo ngă soh, Ih yơh či lăng kơsem kâo laih anŭn ƀu či pap brơi kơ kâo hơdôm tơlơi soh kâo ngă ôh.

¹⁵Tơdah kâo ngă soh, sĭt Ih či pơkơhma̱l hĭ kâo! Wơ̆t tơdah tơdah kâo jing mơnuih ƀu soh, kâo ƀu pơgao pơang ôh, yuakơ kâo mlâo mlañ laih anŭn ruă nuă biă mă yơh.

¹⁶Tơdah kâo jing hĭ pơgao pơang, Ih či lua mă kâo kar hăng arăng lua mă rơmung dŭl, laih anŭn dơ̆ng Ih pơrơđah tơlơi mơyang Ih kiăng pơruă hĭ kâo yơh.

¹⁷Ih ba rai ƀing ngă gơ̆ng jơlan phrâo pơkơdơ̆ng glaĭ hăng kâo laih anŭn Ih hil kơtang biă mă pơkơdơ̆ng glaĭ hăng kâo; Ih kơsung blah kâo kar hăng lu ƀing ling tơhan rai pơkơdơ̆ng glaĭ hăng kâo yơh.

¹⁸“Tui anŭn, yua hơget Ih ba kâo tơbiă mơ̆ng kian amĭ kâo lĕ? Kâo kwưh kiăng kâo hơmâo djai hĭ laih hlâo kơ arăng ƀuh kâo.

¹⁹Tơdah tui anŭn kâo ƀu či hơmâo rai hơdip laih ôh, yuakơ phrâo tơbiă mơ̆ng kian, arăng hlŏng ba tơpă nao pơ anih pơsat yơh!

²⁰Ƀu djơ̆ hơdôm hrơi kâo hơdip, gơñu jĕ či rơgao hĭ abih ôh hă? Wĕh đuaĭ hĭ bĕ mơ̆ng kâo tui anŭn yơh kâo dưi hơmâo rơnŭk mơak ƀiă

²¹hlâo kơ kâo nao pơ anih ƀu či wơ̆t glaĭ dơ̆ng tah, jing anih lŏn tơu hăng kơnăm mơmŏt,

²²jing pơ anih kơnăm mơmŏt biă mă, jing anih hơmâo tơu kơnăm mơmŏt laih anŭn kơnơ̆ng hơmâo tơlơi sŭl kŭl đôč, jing anih ƀu hơmâo tơlơi bơngač ôh samơ̆ kơnơ̆ng tơlơi kơnăm mơmŏt đôč yơh.”