Read Jarai Yôb 12 Bible Online

Yôb 12 - Jarai bible

Yôb 12

¹Giŏng anŭn, Yôb pơhiăp tui anai dơ̆ng:

²“Ƀing gih pơmĭn kơ tơlơi ƀing gih pơhiăp kơ rĭm čô mơnuih, laih anŭn tơdang ƀing gih djai, ƀu či hơmâo mơnuih rơgơi dŏ glaĭ dơ̆ng tah!

³Samơ̆ kâo ăt hơmâo tơlơi pơmĭn hiam klă hrup hăng ƀing gih mơ̆n; kâo ƀu djơ̆ dŏ gah yŭ kơ ƀing gih ôh. Rĭm čô le̱ng kơ thâo krăn abih bang khul tơlơi anai soh sel.

⁴“Ră anai ƀing gơyut kâo klao djik kơ kâo, wơ̆t tơdah hlâo kơ mông anai kâo iâu laĭ kơ Ơi Adai laih anŭn Ñu laĭ glaĭ laih kơ kâo. Samơ̆ ră anai ƀing gơñu klao djik kơ kâo, wơ̆t tơdah kâo jing mơnuih tơpă hơnơ̆ng laih anŭn arăng ƀu thâo jăm ƀuăh kơ kâo ôh!

⁵Ƀing mơnuih hơdip rơnŭk rơnua djik djak kơ ƀing hlơi pô bưp djơ̆ tơlơi truh sat, laih anŭn tơlơi truh sat truh nanao ƀơi mơnuih jing pô hơmâo laih khul tơlơi rŭng răng.

⁶Ƀing klĕ dŏp ăt dŏ rơnŭk rơnua amăng sang khăn gơñu, laih anŭn ƀing hlơi pô čuih kiăng kơ Ơi Adai hil dŏ hơđơ̆ng, ƀing gơñu kơnang ƀơi gơñu pô yơh.

⁷“Samơ̆ lăng kơsem bĕ kơ khul hlô mơnơ̆ng, tui anŭn ih či hrăm mơ̆ng gơñu yơh, ƀôdah lăng kơsem bĕ khul čim brĭm hăng adai, tui anŭn ih ăt či hrăm mơ̆ng gơñu yơh;

⁸ƀôdah lăng kơsem bĕ lŏn tơnah, tui anŭn ih či hrăm mơ̆ng anŭn yơh, ƀôdah ih či hrăm mơ̆ng akan amăng ia rơsĭ yơh.

⁹Amăng abih bang khul djuai mơnơ̆ng anai, ƀing gơñu ngă kar hăng ƀing gơñu thâo soh sel kơ tơlơi Khua Yang yơh hơmâo pơgiŏng hĭ laih tơlơi anai.

¹⁰Ơi Adai djru brơi kơ rĭm djuai mơnơ̆ng kiăng kơ hơdip laih anŭn ăt djru kơ abih bang mơnuih mơnam kiăng kơ hơdip mơ̆n.

¹¹Ƀing ta hơmư̆ arăng pơhiăp kiăng kơ thâo tơdah khul boh hiăp ñu anŭn djơ̆ mơ̆n thâo kơnơ̆ng kar hăng ƀing ta ƀơ̆ng lăng gơnam ƀơ̆ng kiăng kơ thâo gơnam ƀơ̆ng anŭn jing jơma̱n yơh.

¹²Amăng ƀing mơnuih thŭn tha jing ƀing rơgơi, laih anŭn ƀing mơnuih hơdip sui thâo hluh lu mơta tơlơi yơh.

¹³“Samơ̆ Ơi Adai jing Pô rơgơi wơ̆t hăng dưi mơyang; Ñu pơkra hơdră laih anŭn thâo hluh hiư̆m khul mơta tơlơi ngă bruă yơh.

¹⁴Hơget tơlơi Ñu pơrai hĭ laih, arăng ƀu dưi pơdơ̆ng glaĭ dơ̆ng tah; mơnuih pă Ñu mă krư̆ hĭ laih, arăng ƀu dưi pŏk rơngai hĭ ñu dơ̆ng tah.

¹⁵Tơdah Ñu ƀu brơi rai ia hơjan, khul ia či thu krô hĭ yơh; samơ̆ tơdah Ñu ngă brơi hơjan lu, ia či li̱ng lip hĭ anih lŏn yơh.

¹⁶Ñu jing kơtang laih anŭn dưi hĭ nanao; Ñu git gai mơnuih jing pô ƀlŏr kơ arăng laih anŭn arăng jing pô tŭ tơlơi ƀlŏr anŭn.

¹⁷Ñu dui ba ƀing khua djru pơmĭn jing hĭ đôč đač laih anŭn pơmlŭk hĭ ƀing khua phat kơđi.

¹⁸Ñu pơglưh hĭ ƀing pơtao laih anŭn ngă kơ ƀing gơñu jing hĭ hlŭn mơnă.

¹⁹Ñu dui ba ƀing khua ngă yang jing hĭ đôč đač laih anŭn ngă kơ ƀing khua moa ƀing ană plei ƀu jing ƀing git gai dơ̆ng tah.

²⁰Ñu pơrơiăt hĭ tơƀông bah ƀing djru pơmĭn arăng đaŏ kơnang laih anŭn ngă kơ ƀing kŏng tha ƀu thâo hiư̆m kiăng kơ phat kơđi brơi ƀing ană plei dơ̆ng tah.

²¹Ñu klao djik kơ ƀing kơdrưh kơang laih anŭn ngă kơ ƀing djă̱ akŏ kơtang ƀu dưi git gai ană plei dơ̆ng tah.

²²Ñu pơrơđah tơbiă khul tơlơi sat ƀai mơnuih mơnam gir kiăng kơ pơdŏp laih anŭn ngă kơ arăng thâo abih bang tơlơi hơgŏm anŭn kar hăng pơčrang tơlơi bơngač rơđah amăng anih kơnăm mơmŏt yơh.

²³Ñu ngă kơ ƀing lŏn čar đĭ kơyar prŏng tui, laih anŭn Ñu pơrai hĭ ƀing lŏn čar anŭn; Ñu pơlar ƀing lŏn čar prŏng tui, laih anŭn pơčơlah hĭ ƀing lŏn čar anŭn bru bra.

²⁴Ñu ngă kơ ƀing khua djă̱ akŏ ƀơi lŏn tơnah anai pơmĭn hĭ mlŭk; Ñu ngă kơ ƀing gơñu jrôk jơlan laih anŭn jing hĭ răm rơngiă yơh.

²⁵Ƀing khua anŭn hyu rơwa amăng kơnăm mơmŏt ƀu hơmâo tơlơi bơngač ôh; Ñu ngă kơ ƀing gơñu rơbat sêng grêng kar hăng ƀing măt tơpai yơh.