Read Jarai Yôb 14 Bible Online

Yôb 14 - Jarai bible

Yôb 14

¹“Mơnuih mơnam hơmâo tơkeng rai mơ̆ng đah kơmơi ƀu hơmâo tơlơi djru ôh, laih anŭn hơdip kơnơ̆ng ƀiă thŭn samơ̆ hơmâo lu tơlơi rŭng răng.

²Ñu bluh đĭ hrup hăng bơnga laih anŭn gliu hĭ, kar hăng bơngăt tơui đuaĭ kơdŏp hĭ, ƀu dŏ dơnơ̆ng nanao ôh.

³Ih anăm lăng ƀơi mơnuih kar hăng anŭn ôh. Ih anăm ngă kơ kâo rai ƀơi anăp Ih kiăng kơ phat kơđi kâo ôh.

⁴Hlơi mơnuih ƀu rơgoh dưi ngă hơdôm mơta tơlơi rơgoh lĕ? Sĭt ƀu hơmâo hlơi pô ôh.

⁵Khul hrơi mơnuih mơnam hơdip Ih hơmâo pơkă laih; Ih hơmâo pơkơ̆ng laih mrô khul blan ñu laih anŭn hơmâo pioh laih guai pơkă kơ ñu ƀu dưi nao hloh ôh.

⁶Hơnŭn yơh, rơkâo kơ Ih anăm pơtơpăk hĭ ñu ôh laih anŭn lui bĕ kơ ñu dŏ hơjăn, laih anŭn amăng jơlan anŭn yơh, ñu dưi pơdơi ƀơi hơnăl tuč kơ tơlơi ñu mă bruă amăng hrơi.

⁷“Mơnuih dưi čang rơmang kơ tơlơi sa ƀĕ kơyâo, wơ̆t tơdah arăng dro̱m rơbuh hĭ, samơ̆ ñu či bluh đĭ khul than dơ̆ng mơ̆n, laih anŭn khul čơnŭh ñu čơnăt đĭ ƀu pơdơi ôh.

⁸Khul akha ñu či jing hĭ krañ tha amăng lŏn laih anŭn tơmĕh phŭn ñu brŭ hĭ amăng tơnah,

⁹samơ̆ tơdang hơmâo kơhŭl ia, ñu či čă bluh đĭ laih anŭn khul čơnŭh ñu čơnăt đĭ jing sa ƀĕ kơyâo yơh.

¹⁰Samơ̆ mơnuih mơnam djai laih anŭn jing hĭ đôč đač; ñu ƀu suă jua laih anŭn ƀu hơdip dơ̆ng tah.

¹¹Kar hăng ia rơngiă hĭ thĕng mơ̆ng ia rơsĭ ƀôdah krong kho̱t hĭ hăng thu krô,

¹²ăt tui anŭn mơ̆n mơnuih mơnam djai laih anŭn ƀu hơdip glaĭ dơ̆ng tah; mơnuih mơnam ƀu či hơdip dơ̆ng tah ƀôdah kŏn či hơdip glaĭ mơ̆ng djai lơi tơdang adai rơngit ăt dŏ dơnơ̆ng.

¹³“Kâo kwưh kiăng biă mă kơ tơlơi Ih či pơdŏp hĭ kâo amăng anih ƀing mơnuih djai laih anŭn pơgang brơi kâo tơl Ih ƀu hil kơ kâo dơ̆ng tah! Kâo kwưh kiăng biă mă yơh kơ tơlơi Ih dưi pơkă hrơi mông kơ kâo kiăng dŏ pơ anŭn laih anŭn ƀu či wơr bĭt ôh kiăng pơklaih hĭ kâo!

¹⁴Tơdah sa čô mơnuih djai hĭ, ñu či hơdip glaĭ dơ̆ng mơ̆? Amăng abih bang hrơi kâo mă bruă tơl kâo gleh; kâo či dŏ tơguan tơl hơmâo mơnuih či rai hăng pơrơngai hĭ kâo mơ̆ng anih anŭn yơh.

¹⁵Ih či iâu laih anŭn kâo či laĭ glaĭ kơ Ih; Ih či pơmĭn ƀlơ̆ng kơ kâo jing pô Ih hơmâo hrih pơjing rai laih.

¹⁶Giŏng anŭn, sĭt yơh Ih či wai lăng kâo pơpă anih kâo nao yơh, samơ̆ Ih ƀu čih pioh ôh tơlơi soh kâo.

¹⁷Ih či pap kơ kâo hăng pap brơi tơlơi kâo hơmâo ngă wĕ wŏ laih; Ih či sut lui hĭ tơlơi soh kâo yơh.

¹⁸“Samơ̆ kar hăng čư̆ glưh pơčah hĭ laih anŭn kar hăng boh pơtâo tơglŭng đuaĭ hĭ mơ̆ng anih ñu,

¹⁹kar hăng ia pơluih hĭ khul boh pơtâo laih anŭn khul ia li̱ng lip pơđuaĭ hĭ tơnah lŏn, ăt tui anŭn mơ̆n, Ih ngă kơ mơnuih ƀu hơmâo tơlơi čang rơmang ôh.

²⁰Ih pơgŏ̱ mă hĭ ñu sa wơ̆t laih anŭn ñu rơngiă hĭ thĕng yơh; Ih pơplih hĭ ƀô̆ mơta ñu laih anŭn ngă kơ ñu djai hĭ yơh.

²¹Tơdah arăng pơpŭ pơyom kơ ƀing ană đah rơkơi ñu, ñu ƀu či thâo ôh; tơdah arăng pơmlâo hĭ ƀing ană ñu anŭn, ñu ăt kŏn thâo ƀuh lơi.

²²Ñu ƀu pơmưn hơget ôh rơngiao kơ tơlơi ruă drơi jan ñu pô laih anŭn rơngot hơning kơnơ̆ng kơ ñu pô đôč yơh.”