Read Jarai Yôb 16 Bible Online

Yôb 16 - Jarai bible

Yôb 16

¹Giŏng anŭn, Yôb pơhiăp dơ̆ng tui anai:

²“Kâo hơmâo hơmư̆ laih mơnuih mơnam pơhiăp kar hăng anai hlâo adih; ƀing gih ƀu djru kâo ôh, samơ̆ jai pơtơnap kâo lu hloh dơ̆ng!

³Ƀing gih anăm pơhiăp đôč đač dơ̆ng tah! Kâo ƀu hơmâo ngă hơget ôh kơ ƀing gih tơl ƀing gih kiăng pơgăl nanao.

⁴Kâo ăt dưi pơhiăp kar hăng ƀing gih mơ̆n, tơdah ƀing gih jing kâo laih anŭn kâo jing ƀing gih; kâo ăt dưi pơhiăp pơkơdơ̆ng glaĭ hăng ƀing gih laih anŭn tơtăh akŏ kâo kiăng klao kơ ƀing gih yơh.

⁵Samơ̆ kâo gir biă mă yơh kiăng kơ pơđu̱r pơkơjăp ƀing gih; kâo či pơhiăp pơalum ƀing gih kiăng kơ pơhrŏ hĭ tơlơi tơnap gih.

⁶“Samơ̆ tơdah kâo pơhiăp, tơlơi kâo ruă ƀu plai hĭ ôh; tơdah kâo ƀu pơhiăp ôh, tơlơi ruă kâo ăt kŏn hrŏ hĭ lơi.

⁷Sĭt yơh, Ơ Ơi Adai hơi, Ih hơmâo pơtơdu hĭ laih kâo; Ih hơmâo pơrai hĭ laih abih bang sang anŏ kâo.

⁸Ih hơmâo hret hĭ klĭ kâo laih anŭn tơlơi anŭn jing kar hăng sa čô mơnuih ngă gơ̆ng jơlan pơkơdơ̆ng glaĭ hăng kâo yơh. Ƀing arăng ăt pơmĭn kơ tơlơi kâo tŭ hret hĭ jing tơlơi pơrơđah kơ tơlơi kâo jing mơnuih soh yơh.

⁹Kar hăng hlô mơnơ̆ng kheñ đet yơh Ơi Adai hơmâo hek hĭ laih kâo; Ñu kĕ tơgơi Ñu ƀơi kâo yuakơ Ñu pơrơmut kơ kâo, laih anŭn kar hăng pô rŏh ayăt yơh Ñu hil lăng gle̱ng ƀơi kâo.

¹⁰Ƀing mơnuih ha̱ amăng bah djik djak kơ kâo; ƀing gơñu păh meng kâo hăng tơlơi klao djik laih anŭn ƀing gơñu pơkra mơneč hăng tơdruă kiăng kơ kơsung blah kâo.

¹¹Ơi Adai hơmâo jao hĭ laih kâo kơ ƀing mơnuih sat ƀai laih anŭn glŏm hĭ laih kâo kiăng kơ tŭ tơnap tap mơ̆ng ƀing mơnuih soh sat.

¹²Hlâo adih kâo dŏ rơnŭk rơnua, samơ̆ Ñu pơrăm hĭ kâo; Ñu păn mă kâo ƀơi tơkuai laih anŭn pơphač hĭ kâo. Ñu pơdơ̆ng đĭ kâo kar hăng anih kơñăm Ñu;

¹³khul ƀrŏm hraŏ Ñu pŏr jum dar kâo. Ñu pơnăh boh ƀlĕh kâo, ƀu hơmâo tơlơi pap ôh laih anŭn pơhŏk trŭn hĭ phĭ̱ kâo ƀơi lŏn.

¹⁴Ñu pơrơka hĭ kâo nanao; Ñu kơsung blah kâo kar hăng sa čô tơhan khĭn kơtang.

¹⁵“Kâo hơmâo sĭt hĭ laih ao tâo kiăng go̱m hĭ klĭ kâo laih anŭn kâo hơmâo pơtrŭn hĭ ƀô̆ mơta kâo ƀơi ƀruih lŏn.

¹⁶Ƀô̆ mơta kâo mriah yuakơ čŏk hia, tơlơi brŏm brăh yơh ƀơi jum dar mơta kâo;

¹⁷samơ̆ kâo ƀu hơmâo ngă tơlơi ƀrưh ƀai ôh laih anŭn kâo iâu laĭ hăng tơlơi tơpă sĭt yơh.

¹⁸“Ơ ƀing mơnuih ƀơi lŏn tơnah, kâo kar hăng sa čô mơnuih arăng hơmâo pơdjai hĭ laih yơh; anăm brơi kơ hlơi pô gir pơdŏp hĭ tơlơi soh sat anŭn ôh!

¹⁹Mông anai yơh Pô gơ̆ng jơlan kâo dŏ amăng adai adih. Pô pơgăl brơi kơ kâo dŏ pơ anih glông.[31]

²⁰Ƀing gơyut gơyâo kâo klao djik kơ kâo; samơ̆ kâo hia lăng nao pơ Ơi Adai yơh;

²¹kâo kwưh kiăng kơ tơlơi kâo hơmâo hlơi pô či iâu laĭ kơ Ơi Adai pơala brơi kơ kâo, hrup hăng sa čô kwưh rơkâo brơi kơ gơyut gơyâo ñu yơh.

²²“Dŏ kơnơ̆ng ƀiă thŭn dơ̆ng kâo či djai hĭ yơh, laih anŭn kâo či nao laih anŭn ƀu či wơ̆t glaĭ dơ̆ng tah.