Read Jarai Yôb 23 Bible Online

Yôb 23 - Jarai bible

Yôb 23

¹Giŏng anŭn, Yôb laĭ tui anai:

²“Hrơi anai kâo ăt dŏ brŏk ruă phĭ̱ hăng Ơi Adai; Ñu ăt dŏ taih ama̱ng kâo wơ̆t tơdah kâo ăt dŏ ruă nuă kơtang.

³Hiam yơh tơdah kâo kơnơ̆ng thâo anih pă kiăng hơduah Ñu; hiam yơh tơdah kâo dưi nao pơ anih Ñu dŏ!

⁴Kâo či pŏk pơblang tơhơnal tơlơi kâo ƀơi anăp Ñu laih anŭn či pơgăl pơgang kâo pô bă blai yơh.

⁵Kâo či thâo krăn yơh hơget tơlơi Ñu či laĭ glaĭ kơ kâo, laih anŭn pơmĭn kơ hơget tơlơi Ñu či laĭ anŭn yơh.

⁶Ñu či pơkơdơ̆ng glaĭ hăng kâo hăng tơlơi dưi mơyang prŏng hă? Ơ ơh, Ñu ƀu či phŏng kơđi kơ kâo jing mơnuih soh ôh.

⁷Pơ anih anŭn yơh mơnuih tơpă hơnơ̆ng kar hăng kâo anai dưi pơrơđah tơhơnal tơlơi Ñu ƀơi anăp Ñu, laih anŭn Ñu či pơklaih hĭ kâo hlŏng lar mơ̆ng ƀing hlơi pô phŏng kơđi kơ kâo jing mơnuih soh yơh.

⁸“Samơ̆ tơdah kâo nao pơ gah ngŏ̱, Ñu ƀu dŏ pơ anih anŭn ôh; tơdah kâo nao pơ gah yŭ̱, kâo kŏn hơduah ƀuh Ñu lơi.

⁹Tơdang Ñu mă bruă amăng anih gah dư̱r, kâo ƀu ƀuh Ñu ôh; tơdang Ñu wơ̆t nao pơ gah thu̱ng, kâo kŏn ƀuh Ñu lơi.

¹⁰Samơ̆ Ñu thâo krăn jơlan kâo nao; tơdang Ñu hơmâo lông lăng kâo laih, kâo či jing kar hăng mah yơh.

¹¹Kâo đuaĭ tui jĕ Ñu pơpă Ñu dui ba kâo; kâo hơmâo đuaĭ tui pơpă Ñu kơčrâo brơi kơ kâo yơh.

¹²Kâo hơmâo tui gưt laih hơdôm tơlơi Ñu hơmâo pơđar laih; kâo hơmâo pơmĭn ƀlơ̆ng laih hơdôm tơlơi Ñu pơđar jing yom pơphan hloh kơ gơnam ƀơ̆ng kâo kơƀah kiăng rĭm hrơi yơh.

¹³“Samơ̆ kơnơ̆ng hơjăn Ñu đôč yơh jing Ơi Adai, tui anŭn ƀu hơmâo hlơi pô ôh dưi pơkơdơ̆ng glaĭ hăng Ñu. Ñu ngă tui hăng tơlơi Ñu kiăng kơ ngă yơh.

¹⁴Ñu či ngă tui hăng tơlơi Ñu kiăng kơ ngă pơkơdơ̆ng glaĭ hăng kâo, laih anŭn hơmâo lu hơdră kar hăng anŭn Ñu ăt hơmâo pơkra laih hơdră kơ kâo.

¹⁵Anŭn yơh jing tơhơnal tơlơi yua hơget kâo huĭ bra̱l ƀơi anăp Ñu; tơdang kâo pơmĭn kơ abih bang tơlơi anŭn, kâo huĭ kơ Ñu yơh.

¹⁶Ơi Adai hơmâo brơi kơ kâo tah hơtai; Pô Dưi Kơtang hơmâo pơbra̱l hĭ kâo laih.

¹⁷Samơ̆ kâo ƀu či dŏ rơiăt ôh yua mơ̆ng tơlơi kơnăm mơmŏt, ƀôdah yua mơ̆ng tơlơi kơnăm mơmŏt kơpa̱l anŭn pơgăn hĭ kâo ƀu dưi ƀuh ôh.