Read Jarai Yôb 28 Bible Online

Yôb 28 - Jarai bible

Yôb 28

¹Giŏng anŭn, Yôb pơhiăp dơ̆ng tui anai, “Hơmâo khul anih pa̱r arăng klơi hơduah amrăk laih anŭn khul anih arăng čuh pơrơgoh hĭ mah.

²Arăng mă pơsơi mơ̆ng lŏn tơnah, laih anŭn arăng pơli̱k hĭ ko̱ng mơ̆ng khul boh pơtâo.

³Ƀing mơnuih mơnam ba mŭt tơlơi bơngač pơ anih kơnăm mơmŏt; ƀing gơñu hơduah truh pơ guai anih ataih hloh gah yŭ lŏn yuakơ khul boh pơtâo yom anŭn dŏ amăng anih kơnăm mơmŏt biă mă yơh.

⁴Ataih mơ̆ng anih mơnuih mơnam dŏ yơh ƀing gơñu khăt pŏk jơlan tơlo̱ng, jing amăng khul anih pa̱r tơkai mơnuih ƀu juă djơ̆ ôh hlâo adih; ataih mơ̆ng mơnuih mơnam yơh ƀing gơñu păk yol dai nao rai kar hăng păk yol ƀơi hrĕ.

⁵Lŏn tơnah yơh jing anih pơtơbiă rai gơnam ƀơ̆ng, samơ̆ gah yŭ lŏn tơnah hơmâo pơplih hĭ laih yua mơ̆ng apui;

⁶Pơtâo yom saphir hơmâo rai mơ̆ng khul boh pơtâo hơmâo pơtâo saphir anŭn, laih anŭn ƀruih lŏn pơtâo anŭn hơmâo rai mah.

⁷Ƀu hơmâo čim ƀơ̆ng añăm pă ôh thâo krăn jơlan hơgŏm anŭn, ƀu hơmâo mơta čim kla̱ng juang lua pă ôh hơmâo ƀuh laih jơlan anŭn.

⁸Khul hlô mơnơ̆ng kơtang ƀu nao truh pơ anih anŭn ôh, laih anŭn rơmung dŭl kŏn pơgrao lơi pơ anih anŭn.

⁹Ƀing mơnuih mơnam klơi khul boh pơtâo khăng, ƀing gơñu klơi mŭt truh pơ khul atur čư̆ čan.

¹⁰Ñu klơi amăng mŭt găn amăng boh pơtâo; mơta ñu ƀuh abih bang mŭk dram pơ anŭn.

¹¹Ƀing gơñu kơsem hơduah khul phŭn krong ia laih anŭn ba tơbiă abih bang khul gơnam kiăng kơ arăng lăng.

¹²“Samơ̆ ƀu hơmâo anih pă ôh sa čô mơnuih dưi nao kiăng kơ jing hĭ rơgơi. Ƀu hơmâo anih pă ôh ñu dưi nao kiăng thâo hluh abih bang tơlơi.

¹³Mơnuih mơnam ƀu thâo hluh ôh nua yom kơ tơlơi jing rơgơi; ƀing gơñu ƀu dưi thâo hluh kơ abih bang tơlơi ôh tơdang ƀing gơñu hlak dŏ hơdip.

¹⁴Mơnuih mơnam ƀu dưi jing hĭ rơgơi yua mơ̆ng ƀing gơñu nao pơ anih dơlăm ôh; ƀing gơñu kŏn ngă tui anŭn lơi yua mơ̆ng ƀing gơñu trŭn nao pơ ia rơsĭ.

¹⁵Ƀing gơñu ƀu dưi jing hĭ rơgơi ôh yua mơ̆ng ƀing gơñu blơi tơlơi anŭn hăng mah phŭn, ƀing gơñu kŏn dưi ngă tui anŭn lơi yua mơ̆ng ƀing gơñu blơi tơlơi anŭn hăng amrăk phŭn.

¹⁶Mơnuih mơnam ƀu dưi jing hĭ rơgơi yua mơ̆ng pha brơi mah yom biă mă ôh kơ tơlơi anŭn, ƀôdah pha brơi khul pơtâo yom Ônik ƀôdah pơtâo yom Saphir.

¹⁷Tơlơi jing rơgơi jing yom pơphan hloh kơ mah laih anŭn kĕl jơngeh yơh, ƀing arăng kŏn dưi jing hĭ rơgơi yua mơ̆ng pha brơi khul gơnam pơhrôp mah lơi.

¹⁸Pơtâo krơh laih anŭn pơtâo jasper ƀu jing yom hơjăn ôh tơdang pơhơmu hăng sa čô jing rơgơi, yuakơ tơlơi anŭn jing yom hloh kơ khul pơtâo yom sardôn yơh.

¹⁹Pơtâo yom tôpas mơ̆ng lŏn čar ƀing Kus ƀu dưi pơhơmu hăng tơlơi jing rơgơi anŭn ôh, laih anŭn ƀing arăng kŏn dưi ngă tui anŭn lơi yua mơ̆ng tơlơi blơi mă ñu hăng mah phŭn.

²⁰“Hơnŭn yơh, pơpă ƀing mơnuih dưi nao kiăng kơ jing rơgơi lĕ? Pơpă jing anih ƀing gơñu dưi thâo hluh khul mơta tơlơi lĕ?

²¹Anih anŭn ăt dŏ hơgŏm mơ̆ng abih bang djuai hơdip, laih anŭn ăt hơgŏm mơ̆ng khul čim brĭm jing djuai thâo pŏr mơ̆n.

²²Ƀing mơnuih dŏ amăng anih ƀing djai, kơnơ̆ng hơmư̆ ƀing mơnuih pơkŏn pơruai kơ tơlơi anŭn đôč.

²³Ơi Adai thâo krăn hiư̆m mơnuih mơnam dưi jing rơgơi laih anŭn kơnơ̆ng hơjăn Ñu đôč yơh thâo krăn anih ƀing gơñu nao kiăng kơ jing rơgơi,

²⁴yuakơ Ñu lăng ƀuh abih bang tơlơi ƀơi lŏn tơnah laih anŭn dŏ lăng rĭm mơta tơlơi gah yŭ kơ adai.

²⁵Tơdang Ñu pơkơjăp angĭn kơtang, laih anŭn pơkă pơkơtraŏ khul ia,

²⁶tơdang Ñu pơkra khul tơlơi phiăn pơmĭn ƀlơ̆ng kơ hơjan laih anŭn jơlan rơbat kơ ta̱l grŏm,

²⁷sĭt yơh Ñu thâo laih hiư̆m tơlơi jing rơgơi jing yom pơphan biă mă; Ñu kơsem pơmĭn pơñen laih anŭn ngă bruă hăng tơlơi rơgơi yơh.

²⁸Giŏng anŭn, Ñu laĭ kơ mơnuih, ‘Ƀing gih jing hĭ rơgơi yua mơ̆ng ƀing gih huĭ pơpŭ hăng kơkuh pơpŭ kơ Khua Yang yơh, laih anŭn ƀing gih jing hĭ thâo hluh yua mơ̆ng ƀing gih ƀu ngă ôh tơlơi sat ƀai.’ ”[36]