Read Jarai Yôb 31 Bible Online

Yôb 31 - Jarai bible

Yôb 31

¹“Kâo pơjing tơlơi pơgop hăng kâo pô kơ tơlơi ƀu lăng kluh amoaih ôh ƀơi đah kơmơi.

²Tui anŭn, hơget tơlơi Ơi Adai gah ngŏ adih ngă kơ kâo lĕ? Pô Dưi Kơtang pơ anih glông adih či pơkơhma̱l hĭ kâo yơh.

³Ñu či pơrai hĭ ƀing mơnuih sat ƀai, laih anŭn ngă brơi kơ tơlơi truh sat truh ƀơi ƀing hlơi pô ngă soh yơh.

⁴Ñu ƀuh abih bang tơlơi bruă kâo ngă laih anŭn yap rĭm yak rơbat kâo rơbat yơh.

⁵“Tơdah kâo hơmâo kơnuih soh sat ƀôdah kâo hơmâo ječ ameč laih plŏm ƀlŏr ƀing arăng,

⁶brơi bĕ Ơi Adai pơkơtraŏ kâo amăng gai pơkơtraŏ tơpă laih anŭn Ñu či thâo krăn yơh kâo ƀu soh ôh.

⁷Tơdah kâo pơdơi hĭ hăng ƀu ngă tơlơi tơpă hơnơ̆ng dơ̆ng tah, tơdah tơlơi kâo ƀuh ngă brơi kơ kâo kiăng kơ ngă tơlơi sat ƀai, ƀôdah tơdah sĭt kâo hơmâo ngă laih khul tơlơi soh sat,

⁸tui anŭn brơi ƀing arăng mă ƀơ̆ng bĕ hơget gơnam kâo hơmâo pla laih, laih anŭn brơi arăng buč hĭ bĕ gơnam tăm kâo pla.

⁹“Tơdah kâo hơmâo kluh amoaih laih bơnai pô re̱ng gah kâo, laih anŭn hơmâo tơguan laih kơ pô re̱ng gah kâo tơbiă đuaĭ hĭ mơ̆ng sang ñu,

¹⁰tui anŭn brơi bĕ bơnai kâo jing ding kơna mă bruă kơ đah rơkơi pơkŏn, laih anŭn brơi bĕ ƀing mơnuih pơkŏn đih hrŏm hăng ñu.

¹¹Ngă tơlơi anŭn či jing tơlơi mlâo mlañ yơh, ƀing khua phat kơđi khŏm pơkơhma̱l hĭ pô soh sat anŭn yơh.

¹²Tơlơi klĕ pyu jing kar hăng apui či čuh hăng pơrai hĭ kâo yơh; ñu či pơrai hĭ hơdôm mơta tơlơi kâo hơmâo yơh.

¹³“Tơdah kâo hơmâo hơngah hĭ ƀu kiăng ngă tơlơi tơpă ôh hăng ƀing ding kơna đah rơkơi đah kơmơi kâo tơdang ƀing gơñu hơmâo tơlơi rơngot hơning pơkơdơ̆ng glaĭ hăng kâo,

¹⁴kâo ƀu dưi ngă hơget ôh tơdang Ơi Adai laĭ glaĭ kơ kâo. Kâo ƀu thâo laĭ glaĭ kơ Ñu ôh tơdang Ñu tơña phat kơ kâo.

¹⁵Pô hơmâo pơjing laih kâo amăng sang ană, ăt pơjing hĭ ƀing gơñu mơ̆n. Ñu ăt jing Pô hơmâo pơjing laih ƀing gơñu hăng kâo pơdơ̆ pơđơ̱r amăng kian ƀing amĭ ta.

¹⁶“Tơdah kâo hơmâo hơngah hĭ laih khul tơlơi kơƀah kiăng ƀing ƀun rin ƀôdah lui brơi mơta ƀing đah kơmơi kơmai rơgah rơmơ̆n,

¹⁷tơdah kâo hơmâo djă̱ pioh gơnam ƀơ̆ng kơ kâo pô, ƀu pơpha brơi kơ ƀing tơhrit ama,

¹⁸samơ̆ čơdơ̆ng mơ̆ng kâo dŏ hlak ai, kâo răk rong ba laih ƀing gơñu kar hăng ama gơñu, laih anŭn mơ̆ng kâo dŏ hlak krah, kâo dui ba laih đah kơmơi kơmai,

¹⁹tơdah kâo ƀuh hlơi pô răm rai hĭ yuakơ ƀu hơmâo sum ao ôh, ƀôdah pô đah rơkơi kơƀah ƀu hơmâo ao hơô ôh,

²⁰laih anŭn ñu ƀu tŭ bơni hiam yua mơ̆ng kâo ôh yuakơ brơi pơđao laih kơ ñu hăng ao blâo triu kâo,

²¹tơdah kâo hơmâo kơtư̆ juă hĭ laih pô tơhrit ama, yuakơ kâo hơmâo ƀing mơnuih djru hơmư̆ kâo ƀơi anih mơnuih lu pơƀut glaĭ,

²²tui anŭn brơi bĕ hơpăl tơngan kâo tơhlăh trŭn hĭ mơ̆ng bra kâo, brơi bĕ ñu jŏh tơĭ hĭ mơ̆ng anih pơtŏ anŭn.

²³Kâo ƀu dưi ngă hơdôm tơlơi anŭn ôh yuakơ kâo huĭ biă mă kơ tơlơi Ơi Adai či pơrai hĭ kâo tơdah kâo ngă, laih anŭn yuakơ huĭ pơpŭ kơ tơlơi ang yang prŏng Ñu.

²⁴“Tơdah kâo hơmâo đaŏ kơnang laih ƀơi mah ƀôdah laĭ kơ tơlơi hơmâo mah phŭn jing tơlơi ngă brơi kơ kâo dŏ rơnŭk rơno̱m,

²⁵tơdah kâo hơmâo hơ̆k mơak laih yuakơ kâo pơdrŏng săh, laih anŭn mŭk dram kâo hơmâo pơjing rai laih,

²⁶tơdah kâo hơmâo ƀuh laih yang hrơi pơčrang suai pơđiă ñu ƀôdah yang blan pơrơđah tơlơi ang yang ñu,

²⁷yuakơ anŭn kâo lê̆ hĭ amăng tơlơi plư laih anŭn kâo čum kơkuh pơpŭ hĭ ƀing gơñu,

²⁸tui anŭn Ơi Adai či pơkơhma̱l hĭ kâo yơh yuakơ kâo jing mơnuih soh, laih anŭn yuakơ kâo ƀu dŏ tŏng ten ôh hăng Ơi Adai amăng anih glông adih.

²⁹“Tơdah kâo hơmâo hơ̆k mơak laih yuakơ pô rŏh kâo tŭ gleh tơnap ƀôdah mơak mơai yuakơ tơlơi truh sat truh laih ƀơi gơ̆,

³⁰biă mă ñu, kâo ƀu soh ôh hăng tơlơi kâo pơhiăp laih anŭn pơhiăp hơtŏm păh pơkơdơ̆ng glaĭ hăng gơ̆,

³¹tơdah ƀing mơnuih amăng sang anŏ kâo ƀu hơmâo laĭ ôh tui anai, ‘Ƀing gơmơi hơmâo ƀơ̆ng djŏp laih mơ̆ng gơnam ƀơ̆ng Yôb,’

³²samơ̆ ƀu hơmâo tuai pă ôh đŏm mlam gah rơngiao jơlan, yuakơ kâo nanao mơak ju̱m ƀing tuai rai mơ̆ng djŏp anih,

³³tơdah kâo hơmâo pơdŏp hĭ laih mơ̆ng ƀing arăng thâo kơ tơlơi kâo hơmâo ngă soh laih, jing tơlơi či jing hĭ tơlơi soh hơgŏm,

³⁴yuakơ kâo huĭ kơ ƀing mơnuih lu thâo biă mă laih anŭn huĭ bra̱l kơ tơlơi ƀing kơnung djuai kâo či djik djak hĭ kâo, tơl kâo dŏ rơiăt laih anŭn ƀu khĭn tơbiă gah rơngiao ôh jing anih arăng či djik mưč kơ kâo,

³⁵“Ơ kâo kiăng biă mă yơh tơdah hơmâo hlơi dưi hơmư̆ tơlơi kâo pơhiăp! Kâo kač anăn kâo kiăng kơ pơrơđah kơ tơlơi abih bang tơlơi kâo hơmâo pơhiăp laih jing sĭt: Brơi kơ Pô Dưi Kơtang laĭ glaĭ kơ kâo bĕ! Brơi Pô Phŏng Kơđi kâo čih tơbiă bĕ tơlơi Ñu phŏng kơ kâo.

³⁶Sĭt yơh kâo či băk ñu ƀơi bra kâo, kâo či troă tơlơi anŭn kar hăng troă đoăn pơtao yơh.

³⁷Kâo či pơblang brơi kơ Ñu abih bang tơlơi kâo hơmâo ngă laih, jing khĭn kar hăng khua ba akŏ yơh kâo či nao jĕ pơ Ñu.

³⁸tơdah ƀing arăng yua anih lŏn kâo brŏk pơkơdơ̆ng glaĭ hăng kâo laih anŭn abih bang glông kai ñu jing mơsăh hăng ia mơta gơñu,

³⁹tơdah kâo hơmâo ƀơ̆ng laih gơnam tăm ñu laih anŭn ƀu kla ôh kơ ƀing mă bruă ƀôdah kơtư̆ juă hĭ ƀing mă bruă anih lŏn anŭn,

⁴⁰tui anŭn amăng anih lŏn anŭn brơi bĕ khul rơ̆k drơi čă đĭ pơala kơ pơdai kơtor laih anŭn khul rơ̆k čă đĭ pơala kơ pơdai kơtur yơh.” Khul boh hiăp Yôb pơjưh hĭ ƀơi anai yơh.