Read Jarai Yôb 32 Bible Online

Yôb 32 - Jarai bible

Yôb 32

¹Tui anŭn yơh, klâo čô gơyut Yôb anŭn ƀu pơhiăp hơget gĕt dơ̆ng tah hăng Yôb, yuakơ ñu pŏk pơblang kơ tơlơi ñu yap ñu pô jing mơnuih tơpă hơnơ̆ng.

²Samơ̆ Elihu hil biă mă hăng Yôb kơ tơlơi ñu yap ñu pô jing tơpă hơnơ̆ng laih anŭn ƀu yap ôh kơ Ơi Adai jing djơ̆ tơpă. Elihu jing ană đah rơkơi Barakhêl, mơnuih mơ̆ng sang anŏ Ram laih anŭn mơ̆ng anih lŏn arăng pơanăn Buz.

³Ñu ăt hil hăng klâo čô gơyut Yôb adih mơ̆n yuakơ ƀing gơñu ƀu dưi pơgăl glaĭ ôh hăng Yôb, samơ̆ ƀing gơñu hơmâo klă̱ kơđi laih kơ Yôb.

⁴Hlak anŭn, Elihu hơmâo dŏ tơguan laih hlâo kơ pơhiăp hăng Yôb yuakơ abih bang ƀing gơñu jing tha hloh kơ Elihu.

⁵Samơ̆ tơdang ñu ƀuh klâo čô adih ƀu hơmâo hơget tơlơi kiăng pơhiăp dơ̆ng tah, ñu hil biă mă yơh.

⁶Tui anŭn, Elihu pơhiăp tui anai, “Kâo jing mơda amăng thŭn, laih anŭn ƀing gih jing tha; anŭn yơh jing tơlơi kâo pơpŭ pơyom, ƀu khĭn pơhiăp hăng ƀing gih ôh hơget tơlơi kâo thâo.

⁷Kâo pơmĭn, ‘Mơnuih tha năng pơhiăp; mơnuih hơmâo thŭn lu năng pơtô tơlơi rơgơi yơh.’

⁸Samơ̆ anŭn jing bơngăt jua amăng sa čô mơnuih, laih anŭn Pô Dưi Kơtang yơh bluh jua ƀơi gơ̆ kiăng kơ ngă brơi kơ gơ̆ thâo hluh khul mơta tơlơi.

⁹Ƀu djơ̆ kơnơ̆ng kơ mơnuih tha đôč ôh jing rơgơi, ƀu djơ̆ kơnơ̆ng mơnuih hơmâo lu thŭn đôč ôh jing pô thâo hluh tơlơi djơ̆ găl.

¹⁰“Hơnŭn yơh kâo laĭ tui anai: Hơmư̆ kâo bĕ; kâo mơ̆n či ră ruai kơ ƀing gih tơlơi kâo thâo.

¹¹Kâo dŏ tơguan laih tơdang ƀing gih pơhiăp, kâo hơmư̆ laih tơhơnal tơlơi ƀing gih pơruai; tơdang ƀing gih hlak kơsem pơmĭn kơ tơlơi kiăng kơ pơhiăp,

¹²kâo pơđi̱ng hơmư̆ laih abih tơlơi gih. Samơ̆ ƀu hơmâo ôh hlơi amăng ƀing gih hơmâo pơrơđah laih Yôb jing soh; ƀu hơmâo hlơi amăng ƀing gih ôh laĭ glaĭ kơ tơlơi ñu pơgăl.

¹³Anăm laĭ ôh, ‘Ƀing gơmơi hơmâo jing hĭ rơgơi laih; lui brơi bĕ kơ Ơi Adai pơklă kơ ñu, ƀu djơ̆ mơnuih ôh ngă anŭn.’

¹⁴Samơ̆ Yôb ƀu pơhiăp pơkơdơ̆ng glaĭ hăng kâo, tui anŭn kâo ƀu či laĭ glaĭ kơ ñu hăng khul tơlơi ƀing gih pơgăl anŭn ôh.

¹⁵“Ƀing gơñu anŭn dŏ hli̱ng hla̱ng laih anŭn ƀu thâo pơhiăp dơ̆ng tah; ƀing gơñu hơmâo dŏ rơiăt hĭ laih yơh.

¹⁶Ră anai ƀing gơñu dŏ rơiăt laih, tui anŭn kâo khŏm dŏ tơguan hă, tơdang ră anai ƀing gơñu dŏ dơ̆ng pơ anŭn ƀu thâo pơhiăp ôh?

¹⁷Kâo ăt či pơhiăp tơhơnal tơlơi kâo mơ̆n; kâo ăt či ră ruai hơget tơlơi kâo thâo.

¹⁸Kâo hơmâo lu mơta tơlơi biă mă kiăng kơ pơhiăp, laih anŭn jua bơngăt amăng kâo pơtrŭt kâo kiăng pơhiăp;

¹⁹amăng lăm kâo, kâo jing kar hăng ge̱t tơpai boh kơƀâo aka pŏk kơnŏp ôh, kar hăng ge̱t klĭ tơpai boh kơƀâo phrâo jĕ či pơčah tơbiă yơh.

²⁰Kâo khŏm pơhiăp yơh kiăng kơ pơhrŏ hĭ ƀiă tơlơi hil kâo; kâo khŏm laĭ glaĭ yơh.

²¹Kâo ƀu či ngă be̱r glông kơ hlơi pô ôh, kâo kŏn či pơhlŭ bơni kơ hlơi pô lơi;

²²yuakơ tơdah kâo pơhlŭ bơni arăng, Pô Hrih Pơjing kâo či tañ ngă brơi kơ kâo djai hĭ yơh.”