Read Jarai Yôb 36 Bible Online

Yôb 36 - Jarai bible

Yôb 36

¹Elihu pơhiăp dơ̆ng tui anai,

²“Gir run hăng kâo sui ƀiă bĕ tui anŭn kâo či pơrơđah brơi kơ ih dơ̆ng hơmâo lu tơlơi dơ̆ng kiăng pơhiăp pơala brơi kơ Ơi Adai.

³Kâo či pơrơđah kơ tơlơi kâo thâo lu mơta tơlơi biă mă; kâo či pơrơđah Pô Hrih Pơjing kâo jing pô ngă djơ̆ hơnơ̆ng kơ rĭm čô mơnuih.

⁴Tơlơi kâo pơhiăp či jing tơlơi sĭt biă mă yơh; kâo yơh jing sa čô thâo khul mơta tơlơi hlo̱m ƀo̱m hlak dŏ ƀơi anăp ih.

⁵“Ơi Adai jing dưi kơtang, samơ̆ Ñu ƀu djik djak kơ hlơi pô ôh; Ñu jing dưi kơtang laih anŭn thâo hluh abih bang tơlơi.

⁶Ñu ƀu brơi ôh kơ ƀing mơnuih sat ƀai tŏ tui hơdip samơ̆ Ñu ngă djơ̆ hơnơ̆ng kơ ƀing hlơi pô tŭ ƀing mơnuih sat ƀai kơtư̆ juă.

⁷Ñu wai lăng ƀing tơpă hơnơ̆ng kiăng kơ răk rong ba ƀing gơ̆; Ñu djru brơi kơ ƀing gơ̆ kiăng kơ git gai ƀing ană plei kar hăng ƀing pơtao laih anŭn pơpŭ pơyom ƀing gơ̆ hlŏng lar yơh.

⁸Samơ̆ tơdah arăng akă hĭ ƀing gơñu hăng hrĕ čuăk, laih anŭn pơtơnap hĭ ƀing gơñu hăng khul hrĕ păl wăl jum dar ƀing gơñu yơh,

⁹tui anŭn, Ñu či kơčrâo brơi kơ ƀing gơñu tơlơi ƀing gơñu hơmâo ngă laih, anŭn jing tơlơi ƀing gơñu ngă soh yuakơ ƀing gơñu pơgao ang yơh.

¹⁰Ñu brơi kơ ƀing gơñu hơmư̆ tơdang Ñu pơkơđiăng kơ ƀing gơñu laih anŭn ngă brơi kơ ƀing gơñu kơhma̱l hĭ tơlơi sat ƀai gơñu yơh.

¹¹Tơdah ƀing gơñu tui gưt laih anŭn mă bruă kơ Ñu, ƀing gơñu či hơdip đĭ kơyar amăng abih khul hrơi gơñu laih anŭn hơdip rơnŭk rơnua abih khul thŭn gơñu yơh.

¹²Samơ̆ ƀing gơñu ƀu kiăng tui gưt kơ Ñu ôh, ƀing gơñu či răm rai hĭ yua mơ̆ng đao gưm arăng laih anŭn djai hĭ yuakơ ƀing gơñu jing ƀing ƀu thâo phe pho yơh.

¹³“Ƀing mơnuih ƀu đaŏ kơnang kơ Ơi Adai jing ƀing mơnuih nanao hil nač kơ Ñu yơh; wơ̆t tơdah tơdang Ơi Adai pơkơhma̱l hĭ ƀing gơñu, ƀing gơñu ƀu či kwưh kơ Ñu kiăng kơ djru brơi kơ ƀing gơñu ôh.

¹⁴Ƀing gơñu djai hĭ tơdang ƀing gơñu ăt dŏ hlak ai, ƀing gơñu pơmlâo hĭ gơñu pô amăng ƀing đah rơkơi rĭh răm.

¹⁵Samơ̆ ƀing hlơi pô tơnap ruă, Ñu pơklaih hĭ mơ̆ng tơlơi tơnap ruă ƀing gơ̆ yơh; Ñu pơhiăp hăng ƀing gơ̆ amăng tơlơi pơruă hĭ ƀing gơ̆ yơh.

¹⁶“Ñu ăt khăp kiăng ƀu pơtơnap hĭ ih dơ̆ng tah kiăng kơ ih či mơak mơai biă mă laih anŭn dŏ rơnŭk rơnua amăng anih rơhaih, laih anŭn ăt kiăng kơ ih tŭ ƀơ̆ng mơak mơai khul gơnam ƀơ̆ng hiam hloh yơh.

¹⁷Samơ̆ ră anai Ñu hlak pơkơhma̱l hĭ ih kar hăng Ñu hlak pơkơhma̱l hĭ ƀing sat ƀai; Ñu hlak pơkơhma̱l hĭ ih tui hăng tơlơi ih năng tŭ yơh.

¹⁸Brơi răng pơñen bĕ, anăm brơi ôh hlơi pô plư ih kiăng kơ jing hĭ pơdrŏng săh; anăm brơi hlơi pô ôh brơi gơnam plŏm ƀlŏr kơ ih kiăng kơ ih ƀu jing tơpă dơ̆ng tah.

¹⁹Tơlơi ih jing pơdrŏng ƀu ba rai kơ ih tơlơi hiam hơget ôh; tơlơi ih gir jing kơtang ăt kŏn dưi djru kơ ih lơi ră anai.

²⁰Anăm čang tơguan kơ tơlơi mơmŏt ôh tơdang ƀing mơnuih blĭp blăp rơngiă hĭ thĕng mơ̆ng sang dŏ ƀing gơ̆.

²¹Răng bĕ, anăm čơdơ̆ng ngă tơlơi sat ƀai ôh, sĭt yơh anŭn jing tơlơi ih khăp ngă hloh kơ tŭ gleh tơnap.

²²“Anai nê, tơlơi Ơi Adai ngă dưi mơyang pơrơđah kơ tơlơi Ñu jing prŏng kơtang biă mă. Ƀu hơmâo hlơi pô ôh jing nai pơtô kar hăng Ñu!

²³Ƀu hơmâo hlơi pô ôh dưi pơtô laĭ kơ Ñu hơget tơlơi kiăng kơ ngă! Laih anŭn ƀu hơmâo hlơi pô ôh dưi laĭ kơ Ñu tui anai, ‘Ih hơmâo ngă soh laih.’

²⁴Hơdơr bơni bĕ kơ tơlơi bruă Ñu hơmâo ngă laih, jing tơlơi bruă mơnuih mơnam hơmâo bơni hơơč laih hăng tơlơi adoh.

²⁵Abih bang mơnuih le̱ng kơ ƀuh soh sel hơget tơlơi Ñu hơmâo ngă laih; ƀing mơnuih lăng pơñen ƀơi anŭn mơ̆ng ataih.

²⁶Ơi Adai jing Pô yom pơphan prŏng prin biă mă, hloh kơ tơlơi ƀing ta dưi thâo hluh yơh! Ƀing ta ƀu dưi yap ôh khul thŭn Ñu.

²⁷“Ñu pơƀut glaĭ hơdôm tơdjŏh ia, laih anŭn Ñu pơplih hĭ kơhŭl ia anŭn jing hĭ ia hơjan;

²⁸khul kơthul tuh trŭn kơhŭl ia mơsăh gơñu laih anŭn ia hơjan bă blai hơjan trŭn ƀơi mơnuih mơnam.

²⁹Ƀu hơmâo hlơi pô ôh dưi thâo hluh hiư̆m pă Ñu yaih la̱ng kơthul, laih anŭn hiư̆m pă Ñu pơgrŏm trŭn mơ̆ng anih Ñu dŏ.

³⁰Anai nê, Ñu traih pơlar kơmlă amăng djŏp djang adai, samơ̆ anih dơlăm ia rơsĭ ăt dŏ kơnăm mơmŏt.

³¹Anai yơh jing hiư̆m Ñu git gai ƀing lŏn čar laih anŭn pha brơi gơnam ƀơ̆ng bă blai kơ ƀing gơñu.

³²Ñu git gai kơmlă laih anŭn pơđar kơmlă anŭn klă̱ djơ̆ ƀơi gru Ñu treh laih.

³³Grŏm Ñu laĭ pơthâo kơ mơnuih mơnam thâo kơ tơlơi angĭn rơbŭ hlak rai; khul rơmô ăt thâo krăn mơ̆n hơjan angĭn anŭn hlak rai.”