Read Jarai Yôb 39 Bible Online

Yôb 39 - Jarai bible

Yôb 39

¹“Ih thâo krăn mơ̆ hơbĭn khul bơbe čư̆ tŭh ană? Ih lăng ƀuh mơ̆ tơdang rơsa ania tŭh rai ană ñu?

²Ih thâo yap mơ̆ khul blan ñu bo̱r[44]? Ih thâo mơ̆ ƀơi mông pă ñu či tŭh?

³Gơñu pun laih anŭn tŭh rai ană gơñu, jing tơlơi ruă nuă gơñu abih hĭ.

⁴Khul ană gơñu jing prŏng kơtang amăng glai kơmrơ̆ng; gơñu đuaĭ nao laih anŭn ƀu či wơ̆t glaĭ ôh.

⁵“Hlơi pô brơi kơ aseh glai hơdip rơngai amăng glai lĕ? Hlơi pô tơleh hĭ hrĕ ñu lĕ?

⁶Kâo pha brơi laih anih tơdron tač jing anih ñu dŏ, laih anŭn anih lŏn mơsĭn jing anih ñu juăt jưh.

⁷Ñu dŏ ataih biă mă mơ̆ng tơlơi ngañ bañ[45] amăng plei pơnăng; ñu kŏn hơmư̆ lơi hlơi pô ur ƀơi ñu kiăng kơ ñu ngă bruă.

⁸Ñu hơduah amăng khul bŏl čư̆ kơ anih tơdron rơ̆k ñu laih anŭn hơduah sem gơnam tăm mơda amăng anŭn.

⁹“Rơmô tơno glai či tŭ ư mă bruă kơ ih hă? Ñu či dŏ ƀơi atong rơ̆k ih tơdang mlam mơ̆?

¹⁰Ih dưi đoa oč ƀơi ñu kiăng kơ kai hơma mơ̆? Ñu či jik hơma amăng dơnung anŭn tui gah rŏng ih mơ̆?

¹¹Ih či kơnang ƀơi ñu yuakơ tơlơi kơtang ñu hă? Ih či lui brơi bruă kơtraŏ ih kơ ñu ngă hă?

¹²Ih dưi kơnang kơ ñu ba rai kơ ih pơdai laih anŭn pơƀut brơi pơdai pơ anih prăh pơdai ih mơ̆?

¹³“Khul čăng čim samô păh pung hơ̆k mơak, samơ̆ gơñu ƀu dưi pơhơmu ôh hăng blâo čăng čim sưng thâo pŏr.

¹⁴Ñu pơboh khul boh ñu ƀơi lŏn laih anŭn pioh khul boh ñu pơđao amăng čuah,

¹⁵ñu ƀu pơmĭn ôh huĭdah tơkai či juă djơ̆ khul boh anŭn, ƀôdah đơđa hlô mơnơ̆ng glai či juă pơčah hĭ hơdôm boh anŭn.

¹⁶Ñu rong khul ană ñu pơtơnap biă mă, kar hăng khul ană anŭn ƀu djơ̆ jing ană ñu pô ôh; ñu ƀu bơngơ̆t ôh kơ bruă ñu ruă pơboh anŭn jing đôč đač,

¹⁷yuakơ Kâo, jing Ơi Adai, ƀu ngă brơi kơ ñu jing rơgơi ôh ƀôdah ngă brơi kơ ñu kiăng kơ pơmĭn hiam.

¹⁸Samơ̆ tơdang ñu blang blâo čăng ñu kiăng kơ đuaĭ, ñu klao djik kơ aseh wơ̆t hăng pô đĭ ƀơi aseh anŭn yơh yuakơ ñu dưi đuaĭ tañ hloh dơ̆ng.

¹⁹“Ih hơmâo brơi mơ̆ kơ aseh tơlơi kơtang ñu ƀôdah buh brơi ƀơi tơkuai aseh anŭn hăng blâo ƀŭk mơ̆?

²⁰Ih pơjing mơ̆ kơ aseh kơplŏng đĭ kar hăng kơtop, laih anŭn pơhuĭ pơbra̱l hĭ arăng hăng tơlơi ñu suă jua kơtang?

²¹Ñu klơi tơnah amăng dơnung, hơ̆k mơak kơ tơlơi ñu jing kơtang; laih anŭn đuaĭ anăp nao pơ tơlơi pơblah hăng abih tơlơi kơtang ñu.

²²Ñu klao djik kơ tơlơi arăng huĭ laih anŭn ƀu či huĭ hơget gĕt ôh; ñu ƀu pơpĕ đuaĭ hĭ ôh mơ̆ng arăng hơmâo đao gưm.

²³Khul gơnam pơblah jing gơnam pô đĭ ñu djă̱, wơ̆t hăng hơlă[46] ƀlĭp ƀlăp amăng yang hrơi pơčrang.

²⁴Ñu đuaĭ tañ, kơplŏng jai hre̱k ur jai, tơdang tơdiăp ayŭp, ñu ƀu dưi pơkơ̆ng glaĭ ñu pô ôh.

²⁵Tơdang tơdiăp ayŭp đĭ, ñu ur hre̱k đĭ: Hih! Hih! Ñu ƀâo mơnâo tơlơi pơblah mơ̆ng anih ataih, jing tơlơi ƀing khua djă̱ akŏ ur dreo laih anŭn tơlơi ur dreo amăng tơlơi pơblah yơh.

²⁶“Yua mơ̆ng ih jing rơgơi hă tơl ih brơi kơ čim kla̱ng juang thâo pŏr laih anŭn blang čăng ñu pŏr nao pơ gah thu̱ng?

²⁷Mơ̆ng tơlơi ih pơđar kơ čim si̱ng hă tơl ñu pŏr đĭ laih anŭn pơkra hruh ñu ƀơi anih glông?

²⁸Ñu dŏ ƀơi anih čư̆ hơ̆ng dơ̆ng laih anŭn đŏm mlam pơ anŭn; ƀơi kơčŏng čư̆ glông anŭn yơh jing anih dŏ kơjăp ñu.

²⁹Mơ̆ng anih anŭn yơh ñu hơduah sem gơnam ƀơ̆ng ñu; mơta ñu kơsem lăng gơnam ƀơ̆ng mơ̆ng ataih yơh.

³⁰Ñu čem ƀơ̆ng khul ană anet ñu hăng drah laih anŭn pơpă hơmâo khul atâo djai jing ƀing mơnuih arăng hơmâo pơdjai hĭ laih, pơ anŭn yơh ñu nao.”[47]